Roma 2:1-29
2 Ngako-ke nangabe wena wehlulela, ute taba ngisho nobe ungubani. Ngobe nawehlulela lomunye umuntfu kodvwa wena ube wenta tintfo letifanako, usuke utilahla wena.
2 Siyati kutsi Nkulunkulu ubehlulela ngekuvumelana neliciniso labo labenta tintfo letinjalo.
3 Ucabanga kutsi nangabe wehlulela lomunye umuntfu kodvwa wena ube wenta tona letintfo latentako, utakubalekela yini kwehlulelwa nguNkulunkulu?
4 Nobe ububukela phansi yini bukhulu bemusa wakhe, kutibamba kanye nekubeketela kwakhe, ngobe ungati kutsi ngalomusa wakhe, Nkulunkulu ufuna kukwenta uphendvuke?
5 Kodvwa ngenca yenkhani nebulukhuni benhlitiyo yakho, utibekela lulaka ngelilanga laNkulunkulu lentfukutselo nelekwehlulela.
6 Yena utawunika umuntfu ngamunye umvuzo, kuye ngemisebenti yakhe.
7 Utabanika kuphila lokuphakadze labo labafuna inkhatimulo, ludvumo, nekungonakali, ngekutsi bachubeke benta tintfo letinhle;
8 kodvwa labo labatsandza imibango, nalabangalilaleli liciniso, futsi labenta lokungakalungi batawutfola intfukutselo nelulaka.
9 Wonkhe umuntfu* lowenta lokubi utawuhlupheka futsi acindzeteleke, kumJuda kucala kulandzele umGriki;
10 kodvwa wonkhe umuntfu lowenta lokuhle utawutfola inkhatimulo, ludvumo, nekuthula, kumJuda kucala kulandzele umGriki,
11 ngobe Nkulunkulu akakhetsi.
12 Bonkhe labona bete umtsetfo batakufa bete umtsetfo, kodvwa bonkhe labona banemtsetfo batakwehlulelwa ngemtsetfo.
13 Labalungile emehlweni aNkulunkulu akusibo labeva umtsetfo, kodvwa labo labaphila ngekuvumelana nemtsetfo kutawutsiwa balungile.
14 Ngobe nobe nini nakutentakalela kutsi bantfu betive labete umtsetfo bente tintfo letivumelana nemtsetfo, ngisho nobe bete umtsetfo, baveta kutsi banawo etingcondvweni tabo.
15 Bona ngekwabo bakhombisa kutsi loko lokufunwa ngumtsetfo kubhaliwe etinhlitiyweni tabo, nanembeza wabo uvumelana nabo, futsi imicabango yabo iyabalahla nobe ibavumele.
16 Loku kutawukwenteka ngelilanga lapho Nkulunkulu atawusebentisa khona Khristu Jesu kuze ehlulele tintfo letifihlekile tebantfu, ngekuvumelana netindzaba letimnandzi lengitimemetelako.
17 Nangabe utibita ngekutsi ungumJuda, uwulalela uMtsetfo, utigabatisa ngaNkulunkulu,
18 uyati nentsandvo yakhe, futsi utsandza tintfo letinhle ngobe ufundziswe ngeMtsetfo;
19 ukholelwa kutsi wena ungumholi wetimphumphutse, ukukhanya kwalabo labasebumnyameni,
20 ucecesha labo labete ingcondvo, ufundzisa bantfwana, nekutsi unesisekelo selwati neseliciniso leliseMtsetfweni,
21 kodvwa njengobe ufundzisa labanye, awutifundzisi yini wena? Wena loshumayela utsi: “Ungebi,” awebi yini?
22 Wena lotsi: “Ungaphingi,” awuphingi yini? Wena lowenyanya titfombe, ugcekeza emathempeli yini?
23 Wena lotigabatisa ngemtsetfo, wedzelela Nkulunkulu yini ngekwephula kwakho uMtsetfo?
24 Ngobe “libito laNkulunkulu liyahlanjalatwa kubantfu betive ngenca yenu,” njengobe nje kubhaliwe.
25 Kusoka kuzuzisa kuphela nangabe ulandzela uMtsetfo, kodvwa nangabe uwephula, kusoka kwakho kuvele kufane nekungasoki.
26 Angitsi nangabe umuntfu longakasoki agcina loko lokufunwa nguMtsetfo, kungasoki kwakhe kuvele kufane nekusoka?
27 Ngekugcina kwakhe uMtsetfo, umuntfu longakasoki enyameni utawunehlulela, ngobe nine nephula uMtsetfo nanobe nibhalelwe wona futsi nisokile.
28 Umuntfu longumJuda ngaphandle akasuye umJuda mbamba, nekusoka akusiko kwangaphandle enyameni.
29 Umuntfu longumJuda enhlitiyweni usuke angumJuda mbamba, futsi usuke asoke enhlitiyweni ngemoya longcwele, hhayi ngemtsetfo lobhalwe phansi. Ludvumo lwaloyo muntfu aluveli kubantfu kodvwa luvela kuNkulunkulu.
Imibhalo lengentansi
^ Nakuhunyushwe njengobe kunjalo kutsi, “umphefumulo wawo wonkhe umuntfu.”
