Roma 4:1-25
4 Ngako singatsini ngakhokho wetfu Abrahama lesivela kuye?
2 Kube Abrahama kwatsiwa ulungile ngenca yemisebenti, abetawuba nesizatfu sekutigabatisa, kodvwa hhayi embikwaNkulunkulu.
3 Utsini umbhalo? Utsi: “Abrahama wabonisa kukholwa kuJehova, kwatsiwa ulungile.”
4 Umuntfu losebentako utfola umvuzo wakhe, hhayi ngobe akhonjiswa umusa, kodvwa uwutfola ngobe awufanele.
5 Ngakulokunye, umuntfu longetsembeli emisebentini yakhe, kodvwa lowetsembela kuloyo lotsi bantfu lababi balungile, kutawutsiwa ulungile ngenca yekukholwa kwakhe.
6 NaDavide wakhuluma ngenjabulo letfolwa ngumuntfu Nkulunkulu latsi ulungile ngaphandle kwemisebenti, watsi:
7 “Bayajabula labo labatsetselelwe tento tabo letimbi, nalabo tono tabo letimbonyiwe;
8 uyajabula umuntfu Jehova langeke aze ambalele sono sakhe.”
9 Lenjabulo itfolwa ngulabasokile kuphela yini, nobe nalabo labangakasoki bayayitfola? Ngobe sitsi: “Abrahama kwatsiwa ulungile ngenca yekukholwa kwakhe.”
10 Kwashiwo nini kutsi ulungile? Ngesikhatsi asasokile nobe ngesikhatsi asengakasoki? Kwashiwo ngesikhatsi asengakasoki.
11 Wanikwa luphawu, lolukusoka, lolwaba sicinisekiso sekutsi kutsiwe ulungile ngekukholwa labenako ngesikhatsi asengakasoki, kuze abe nguyise wabo bonkhe lababa nekukholwa ngisho bangakasoki, khona nabo kutawutsiwa balungile;
12 kute aphindze abe nguyise webantfwana labasokile, hhayi labo labasoke enyameni kuphela, kodvwa nalabo labahamba ngendlela lefanele etinyatselweni tababe wetfu Abrahama, ngekukholwa labenako ngesikhatsi asengakasoki.
13 Abrahama nentalelwane yakhe abazange banikwe setsembiso sekuba tindlalifa telive ngenca yemtsetfo, kodvwa kwakungenca yekutsi kwatsiwa balungile ngekukholwa kwabo.
14 Ngobe nangabe labo labagcina uMtsetfo batindlalifa, kukholwa akusenamsebenti, nalesetsembiso sesiphelile.
15 Ecinisweni, uMtsetfo wenta umuntfu afanelwe yintfukutselo yaNkulunkulu, kodvwa nakute umtsetfo, kute nesiphambeko.
16 Loku kwaba khona ngenca yekukholwa kuze lesetsembiso sitewucinisekiswa kuyo yonkhe intalelwane yakhe, futsi loko kwakungenca yemusa waNkulunkulu, hhayi kulabo labagcina uMtsetfo kuphela kodvwa nakulabo labanekukholwa lokufana nekwa-Abrahama, longubabe wetfu sonkhe.
17 (Kunjengobe nje kubhaliwe kutsi: “Ngikukhetsele kutsi ube nguyise wetive letinyenti.”) Lesetsembiso sentiwa nguNkulunkulu, Loyo Abrahama labekholwa kuye, lovusa bantfu labafile, nalokhuluma ngetintfo letisengekho kube shengatsi tikhona.
18 Kodvwa Abrahama wetsemba nanobe bekete sizatfu sekuba nelitsemba, wakholwa kutsi utawuba nguyise wetive letinyenti ngekwaloko lebekushiwo, kutsi: “Itawuba ngaka intalo yakho.”
19 Ngisho nobe kukholwa kwakhe kungazange kunciphe, wabona kutsi umtimba wakhe sekufana nekutsi ufile ngobe abesaneminyaka lengaba likhulu budzala, naSara abengabatfoli bantfwana.
20 Kodvwa ngenca yesetsembiso saNkulunkulu wakholwa futsi wangangabati, esikhundleni saloko wacina ngesizatfu sekukholwa kwakhe, wakhatimulisa Nkulunkulu.
21 Abeciniseka kutsi loko labemetsembise kona utawukwati kukwenta.
22 Ngako “kwatsiwa ulungile.”
23 Nanobe kunjalo, lamavi latsi “kwatsiwa ulungile” akazange abhalelwe yena kuphela,
24 kodvwa abhalelwa natsi lokutawutsiwa silungile ngobe siyakholwa kuloyo lowavusa Jesu iNkhosi yetfu ekufeni,
25 leyanikelwa ngenca yetono tetfu futsi yavuswa kuze kutsiwe silungile.
