Roma 9:1-33
9 Ngikhuluma liciniso ngenca yaKhristu; angicali emanga ngobe nembeza wami uyangifakazela ngemoya longcwele,
2 kutsi nginelusizi lolukhulu nebuhlungu lobungapheli enhlitiyweni yami.
3 Ngobe bengingafisa kwehlukaniswa naKhristu njengalocalekisiwe ngenca yebanaketfu labatihlobo tami enyameni,
4 lokungema-Israyeli. Bona batsatfwa bentiwa emadvodzana futsi bemukela inkhatimulo, tivumelwane, uMtsetfo, umsebenti longcwele, netetsembiso.
5 Bavela kubokhokho, naKhristu wavela kubo ayinyama: Nkulunkulu losetikwako konkhe akadvunyiswe kuze kube phakadze. Amen.
6 Kodvwa akusho kutsi livi laNkulunkulu lehlulekile. Ngobe akusibo bonkhe labavela ku-Israyeli “labangu-Israyeli” mbamba.
7 Akusibo bonkhe lababantfwana ngobe bayintalelwane ya-Abrahama, ngobe kwatsiwa: “Loko lokutawubitwa ngekutsi ‘yintalelwane yakho’ kutawuvela ku-Isaka.”
8 Loku kusho kutsi bantfwana benyama akusibo vele lababantfwana baNkulunkulu, kodvwa bantfwana besetsembiso ngibo lokutsiwa bayintalelwane.
9 Ngobe lesetsembiso besitsi: “Ngalesikhatsi lesi ngitawufika, futsi Sara utawuba nendvodzana.”
10 Akuzange kube kulapho kuphela, kodvwa kwaba njalo nangesikhatsi Rebheka atetfwele atewutfola emaphahla ku-Isaka longukhokho wetfu.
11 Ngesikhatsi lamaphahla asengakatalwa futsi asengakenti lutfo loluhle nobe lolubi, kuze injongo yaNkulunkulu yekukhetfwa kwawo ingayi ngemisebenti, kodvwa iye ngaLoyo lowabitako,
12 kwatsiwa kuRebheka: “Lomdzala utawuba sigcili salomncane.”
13 Kunjengobe kubhaliwe kutsi: “Jakobe ngamtsandza, kodvwa Esawu ngamtondza.”
14 Singatsini-ke? Nkulunkulu akakalungi yini? Cha akusinjalo!
15 Ngobe watsi kuMosi: “Ngitawuba nesihawu kunobe ngubani lengifuna kuba nesihawu kuye, futsi ngitawumvela nobe ngubani lengifuna kumvela.”
16 Ngako-ke akuyi ngaloyo lofisako nobe ngaloyo lotikhandlako, kodvwa kuya ngaNkulunkulu lonesihawu.
17 Ngobe umBhalo wakhuluma ngaFaro watsi: “Ngulesi sizatfu lesingente ngakuyekela, kuze ngente emandla ami abonakale ngawe, nelibito lami limenyetelwe emhlabeni wonkhe.”
18 Ngako uba nesihawu kuloyo lafuna kumbonisa sihawu, kodvwa labo lafuna babe lukhuni ubayekela babe lukhuni.
19 Nine nitawutsi kimi: “Usabasolelani-ke bantfu? Ngobe ngubani longamelana nentsandvo yakhe?”
20 Ungubani wena kutsi ungaphendvulana naNkulunkulu? Intfo lebunjiwe ingasho yini kuloyo loyibumbile kutsi: “Ungibumbeleni kanjena?”
21 Anati yini kutsi umbumbi unemandla ekusebentisa sigadla lesifanako selubumba kute ente sitja selikhetselo aphindze ente nalesingasiso selikhetselo?
22 Kutsiwani-ke nangabe Nkulunkulu abefuna kuveta intfukutselo yakhe futsi ente nemandla akhe abonakale, kodvwa wabayekela waphindze wababeketelela labo labatitja letifanelwe yintfukutselo nekubhujiswa?
23 Kutsiwani-ke nangabe loku wakwenta kuze avete kutsi inkhatimulo yakhe yinkhulu kulabo labatitja letifanelwe sihawu, labahlelela kusengaphambili kutsi batfole inkhatimulo,
24 lokungitsi tsine lasibita, hhayi kumaJuda kuphela kodvwa nakubantfu betive?
25 Kunjengobe nje asho kuHoseya nakatsi: “Labo labangasibo bantfu bami ngitawubabita ngekutsi ‘bantfu bami,’ naloyo lobekangatsandvwa ngitawutsi ‘ngulotsandzekako.’
26 Nakulendzawo lapho ngatsi kubo: ‘Anisibo bantfu bami,’ kulapho lebatawubitwa khona ngekutsi ‘ngemadvodzana aNkulunkulu lophilako.’”
27 Ngetulu kwaloko, Isaya wakhuluma mayelana nema-Israyeli watsi: “Ngisho nobe emadvodzana aka-Israyeli angaba ngangesihlabatsi saselwandle, ngulabo labasele kuphela labatawusindziswa.
28 Ngobe Jehova utawukwenta umhlaba ulandzise, futsi loko utawukwenta ngalokuphelele nangekushesha.”
29 Isaya wabiketela watsi: “Kube Jehova wemabutfo akazange asishiyele intalelwane besitawuba njengeSodoma, futsi sentiwe sifane neGomora.”
30 Singatsini-ke? Bantfu betive baba ngulabalungile ngisho nobe bangazange basebentele kuba ngulabalungile, lokukulunga lokuletfwa kukholwa;
31 kodvwa nanobe ema-Israyeli awusebentela umtsetfo wekulunga, akawugcinanga.
32 Ngasiphi sizatfu? Ngobe akazange awusebentele ngekukholwa, kodvwa abecabanga kutsi kuba ngulabalungile kuya ngemisebenti. Akhutjwa “litje lelibangela kukhubeka,”
33 njengobe kubhaliwe kutsi: “ESiyoni ngibeka litje lelibangela kukhubeka nelidvwala leliwisanako, kodvwa loyo lokholwa kulo ngeke advumateke.”
