Sembulo 13:1-18
13 Lodrago wema etikwesihlabatsi saselwandle.
Ngabese ngibona silo sasendle senyuka siphuma elwandle, sinetimphondvo letilishumi netinhloko letisikhombisa, kuletimphondvo taso kunemichele lelishumi, kantsi etinhloko taso kunemagama lahlambalatako.
2 Lesilo sasendle lengasibona besifana nengwe, kepha tinyawo taso betifana netidladla telibhele, umlomo waso unjengewelibhubesi. Drago wanika lesilo emandla nesihlalo sakhe sebukhosi kanye neligunya lelikhulu.
3 Ngabona kutsi lenye yetinhloko taso beyihlatjwe shengatsi iyabulawa, kodvwa lelinceba lelibi lelashwa, futsi wonkhe umhlaba walandzela lesilo usibabata.
4 Bamkhonta lodrago ngobe abenike lesilo sasendle ligunya, naso basikhonta batsi: “Ngubani lonjengesilo sasendle, futsi ukhona yini longalwa naso?”
5 Sanikwa umlomo lokhuluma tintfo letinkhulu nalohlambalatako, sanikwa neligunya lekwenta loko tinyanga letingemashumi lamane nakubili.
6 Savula umlomo waso kuze sihlambalate Nkulunkulu, futsi sahlambalata libito lakhe, indzawo yakhe yekuhlala kanye nalabo labahlala ezulwini.
7 Savunyelwa kutsi silwe nalabangcwele futsi sibancobe, sanikwa neligunya etikwato tonkhe tinhlanga, bantfu, tilwimi, netive.
8 Bonkhe labahlala emhlabeni batasikhonta. Kusukela kwasekelwa umhlaba, kute ngisho nalinye emabitweni abo lelabhalwa emculwini wekuphila weliWundlu lelahlatjwa.
9 Lonendlebe akeve.
10 Nangabe umuntfu kufanele atfunjwe, utawutfunjwa. Nangabe lotsite atawubulala ngenkemba, kufanele abulawe ngenkemba. Loku kudzinga kutsi labangcwele bacinisele futsi babe nekukholwa.
11 Ngabona lesinye silo sasendle siphuma emhlabeni, sinetimphondvo letimbili letinjengeteliwundlu, kodvwa sacala kukhuluma njengadrago.
12 Sisebentisa lonkhe ligunya lesilo sasendle sekucala lesisembikwaso. Senta kutsi umhlaba kanye nalabahlala kuwo bakhonte lesilo sasendle sekucala, leselashwa linceba lelibi.
13 Lesilo senta tibonakaliso letinkhulu, sente ngisho nemlilo kutsi wehle uvela ezulwini ute emhlabeni embikwebantfu.
14 Sidukisa labo labahlala emhlabeni ngenca yetibonakaliso lokwatsiwa sitente embikwesilo sasendle, sibe sitjela labo labahlala emhlabeni kutsi bente umfanekiso walesilo sasendle lesahlatjwa ngenkemba kodvwa sasindza.
15 Kwatsiwa asiphefumulele lomfanekiso walesilo sasendle, kuze ukhulume, ubangele nekutsi bonkhe labangavumi kuwukhonta babulawe.
16 Siphocelela bonkhe bantfu, labancane nalabakhulu, labanjingile nalabeswele, labakhululekile nalabatigcili, kutsi babekwe luphawu etandleni tabo tangesekudla nobe emabuntini,
17 nekutsi kubete lotsengako nobe lotsengisako, ngaphandle kwemuntfu lonaloluphawu, lokulibito lesilo sasendle nobe inombolo yelibito laso.
18 Loku-ke kudzinga kuhlakanipha: Lonekucondza akabale lenombolo yesilo sasendle, ngobe lena yinombolo yemuntfu; lenombolo yaso ingemakhulu lasitfupha nemashumi lasitfupha nesitfupha.
