Sembulo 22:1-21
22 Lengilosi yangikhombisa umfula wemanti ekuphila locwebetela njengekristalu, ugeleta usuka esihlalweni sebukhosi saNkulunkulu neseliWundlu,
2 wehlela emkhatsini wemgwaco lomkhulu walelidolobha. Ngala nangala kwalomfula bekunetihlahla tekuphila lebetitsela titselo letilishumi nakubili, betitsela inyanga nenyanga. Emacembe ato abewekuphilisa tive.
3 Ngeke sisaba khona sicalekiso. Kodvwa sihlalo sebukhosi saNkulunkulu neseliWundlu sitawuba kulelidolobha, netinceku takhe titawumentela umsebenti longcwele;
4 titabubona buso bakhe, nelibito lakhe litawubhalwa emabuntini ato.
5 Busuku ngeke busaba khona, ngeke tikudzinge nekukhanya kwesibane nobe kwelilanga, ngobe Jehova Nkulunkulu utatikhanyisela, futsi titawubusa njengemakhosi phakadze naphakadze.
6 Yatsi kimi: “Lamavi atsembekile futsi aliciniso; Jehova Nkulunkulu lowaphefumulela baphrofethi, utfume ingilosi yakhe kutsi ibonise tinceku takhe tintfo letitawukwenteka ngekushesha.
7 Ngiyeta masinyane. Uyajabula loyo logcina emavi esiphrofetho salomculu.”
8 Mine Johane ngimi lengativa ngaphindze ngatibona letintfo. Ngesikhatsi ngitiva futsi ngitibona, ngawa kuze ngikhotsame etinyaweni talengilosi lebeyingitjengisa tona.
9 Kodvwa yatsi kimi: “Ungakwenti loku! Ngobe mine ngimane nje ngiyinceku njengawe nebazalwane bakho lababaphrofethi, nalabo labagcina lamavi alomculu. Ngako khonta Nkulunkulu.”
10 Yaphindze yatsi kimi: “Ungawafihli lamavi esiphrofetho salomculu, ngobe sikhatsi lesibekiwe sesisondzele.
11 Longakalungi akachubeke nekwenta lokungakalungi; nalongcolile akachubeke nekwenta lokungcolile; kodvwa lolungile akachubeke nekwenta lokulungile, naloyo longcwele akachubeke ebungcweleni bakhe.
12 “‘Ngiyeta masinyane, futsi ngita nemvuzo kuze nginike umuntfu ngamunye umvuzo ngekwemisebenti yakhe.
13 Mine ngingu-Alfa na-Omega, wekucala newekugcina, losicalo nesiphetfo.
14 Bayajabula labo labahlanta tingubo tabo kuze babe neligunya lekuya etihlahleni tekuphila, nekutsi bakwati kungena edolobheni ngemasango alo.
15 Ngaphandle kunetinja nalabasebentelana nemimoya, tidlundlulu, babulali, labakhonta titfombe, nabo bonkhe bantfu labatsandza emanga nalabachubeka bacala emanga.’
16 “‘Mine Jesu ngatfuma ingilosi yami kutsi ifakaze kini ngaletintfo ngenca yemabandla. Ngiyimphandze nentalelwane yaDavide, futsi ngiyinkhanyeti yekusa lekhanyako.’”
17 Umoya namakoti bachubeka batsi: “Kota!” Nobe ngubani lovako akatsi: “Kota!” Nobe ngubani lowomile akete; nanobe ngubani lofisako akawatsatse mahhala emanti ekuphila.
18 “Ngifakaza kunobe ngubani lova lamavi esiphrofetho salomculu. Nangabe kukhona lowengeta lokutsite kuletintfo, Nkulunkulu utamengetela tishayo letibhalwe kulomculu;
19 nangabe kukhona lokhipha lokutsite kulamavi esiphrofetho lasemculwini, Nkulunkulu utawutsatsa sabelo sakhe etihlahleni tekuphila nakulelidolobha lelingcwele, lokusho tintfo letibhalwe kulomculu.
20 “Loyo lofakaza ngaletintfo utsi: ‘Yebo ngiyeta masinyane.’”
“Amen! Kota Nkhosi Jesu.”
21 Shengatsi umusa weNkhosi Jesu Khristu ungaba nalabangcwele.
