Sembulo 9:1-21
9 Ingilosi yesihlanu nayo yashaya licilongo layo. Ngabona inkhanyeti leyawela emhlabeni isuka ezulwini, yanikwa sikhiya semgodzi longenamkhawulo.
2 Yavula lomgodzi, kwaphuma intfutfu lenjengeyemlilo lomkhulu, lilanga kanye nemoya kwaba mnyama ngenca yalentfutfu leyaphuma kuwo.
3 Kulentfutfu kwaphuma sikhonyane sehlela etikwemhlaba; sanikwa emandla lafanana newabofecele basemhlabeni.
4 Satjelwa kutsi singakulimati lokumila emhlabeni, nobe ngutiphi titjalo letiluhlata, nanobe ngusiphi sihlahla, kodvwa silimate kuphela bantfu labete luphawu lwaNkulunkulu emabuntini abo.
5 Lesikhonyane savunyelwa kutsi sibahluphe tinyanga letisihlanu kodvwa singababulali, futsi lokuhlushwa kwabo bekufana nebuhlungu umuntfu labuvako nakasutelwa ngufecele.
6 Ngalawo malanga, bantfu bayawukufuna kufa kodvwa ngeke baze bakutfole, batawufisa kutsi bafe kodvwa kufa kutawubabalekela.
7 Lesikhonyane besinjengemahhashi lalungiselwe imphi; etinhloko taso bekunalokutsite lokunjengemichele yeligolide, nebuso baso bunjengebuso bebantfu,
8 kodvwa tinwele taso betinjengetinwele tebantfu labasikati. Ematinyo aso abenjengewemabhubesi;
9 besifake tivikelo tesifuba letinjengetivikelo tesifuba tensimbi. Umsindvo wetimphiko taso wawunjengemsindvo wetinkalishi letidvonswa ngemahhashi lagijimela emphini.
10 Besiphindze sibe nemisila netindvonsi njengabofecele; imisila yaso beyinemandla ekulimata labantfu tinyanga letisihlanu.
11 Sinenkhosi, lokuyingilosi yemgodzi longenamkhawulo. NgesiHebheru ibitwa ngekutsi ngu-Abhadoni, kodvwa ngesiGriki ibitwa ngekutsi ngu-Apholiyoni.
12 Sewendlulile maye wekucala. Emvakwaletintfo kuseta bomaye lababili.
13 Ingilosi yesitfupha nayo yashaya licilongo layo. Ngeva livi lelivela etimphondvweni telilati leligolide lelisembikwaNkulunkulu,
14 likhuluma nalengilosi yesitfupha lebeyinelicilongo litsi: “Khumula tingilosi letine letiboshwe emfuleni lomkhulu iYufrathe.”
15 Letingilosi letine takhunyulwa, leto letilungiselwe li-awa, lilanga, inyanga, nemnyaka, kuze tibulale incenye yesitsatfu yebantfu.
16 Ngeva linani lelibutfo lalabagibele emahhashi, bebatigidzi letingemakhulu lamabili.
17 Kulombono ngulena indlela lengawabona angiyo lamahhashi nalabo lebebagibele kuwo: bebafake tivikelo tesifuba letinalokubovu njengemlilo, lokuluhlata kwesibhakabhaka, nalokumtfubi; tinhloko talamahhashi betinjengetinhloko temabhubesi, emlonyeni wawo bekuphuma umlilo, intfutfu, nesibabule.
18 Ngaletinhlupho letintsatfu, incenye yesitsatfu yebantfu yafa, ibulawa ngumlilo, yintfutfu nesibabule lebesiphuma emilonyeni yawo.
19 Emandla alamahhashi asemilonyeni nasemisileni yawo; ngobe imisila yawo injengetinyoka futsi inetinhloko, ngiyo lalimata ngayo.
20 Bonkhe bantfu labangazange babulawe nguletinhlupho abaphendvukanga emisebentini yabo; abazange bayekele kukhonta emadimoni netitfombe teligolide, telisiliva, telitfusi, telitje netelugodvo, lokutintfo letingaboni, letingeva naletingahambi.
21 Abaphendvukanga nasekubulaleni kwabo, ekusebentelaneni nemimoya, ekwenteni budlundlulu nasekwebeni.
