LiBhayibheli Lelingcwele liyindlela yaNkulunkulu yekuchumana natsi sonkhe. Kufanele silifundze kuze simati uMbhali walo. (Johane 17:3; 2 KuThimothi 3:​16) Emakhasini alo, Jehova Nkulunkulu wembula injongo yakhe ngebantfu nangelikhaya labo lelingumhlaba.​—Genesisi 3:​15; Sembulo 21:​3, 4.

Kute lenye incwadzi letsintsa kuphila kwebantfu kwendlula liBhayibheli. LiBhayibheli lisenta sikhombise buntfu baJehova lobulutsandvo, umusa neluvelo. Liniketa litsemba, lisite nebantfu kutsi babeketelele timo letimatima kakhulu. Liyachubeka litiveta ebaleni timo talelive letingahambisani nentsandvo yaNkulunkulu lephelele.​—Tihlabelelo 119:​105; KumaHebheru 4:​12; 1 Johane 2:​15-17.

Ekucaleni liBhayibheli belibhalwe ngesiHebheru, ngesi-Aramu nangesiGriki. Nyalo selihunyushwe ngetilwimi letingetulu kwa-3 000 liphelele nobe liyincenye. Liyincwadzi lehunyushwa iphindze isakatwe kakhulu kutendlula tonkhe tincwadzi emlandvweni. Kute lokufanele sikulindzele kwendlula loku. Siphrofetho seliBhayibheli sitsi: “Letindzaba letimnandzi teMbuso [umlayeto loyinhloko loseBhayibhelini] titawushunyayelwa emhlabeni wonkhe, kuze tiviwe ngito tonkhe tive, bese-ke kuphela kuyefika.”​—Matewu 24:14.

Sitsite nasibona kubaluleka kwemlayeto loseBhayibhelini, sancuma kulibuyeketa, kepha loko sikwente ngenhlonipho lenkhulu yaloko lokucuketfwe ngilo. Sitiva sinemtfwalo lomkhulu wekwendlulisela umlayeto walo ngendlela lengiyo. Lelihumusho lelibuketiwe lisuselwe kulamanye emahumusho e-LiBhayibheli—Lihumusho Lemhlaba Lomusha LemiBhalo Lengcwele, lokuliBhayibheli lelakhululwa kwekucala eminyakeni lengetulu kwalengu-60 leyendlulile. Nobe kunjalo, lulwimi lwesiNgisi lushintjile kuleminyaka lengu-50 leyengcile. Lolushintjo lwente emalunga lakhona nyalo eKomidi Yekuhunyushwa KweliBhayibheli Lemhlaba Lomusha kutsi abone sidzingo sekubuketa lelihumusho. Umgomo wetfu kutsi kushicilelwe lihumusho lelisho loko lebekushiwo yimibhalo lebeyibhalwe ngetilwimi tekucala, lokulula kulicondza futsi lefundzeka melula. Tihloko letikuSandzisanchazo letitsi “Timiso Letisetjentisiwe Nakuhunyushwa LiBhayibheli,” “Tintfo Letinhle Letitfolakala Kulelihumusho,” nalesitsi “Indlela Lesalitfola Ngayo LiBhayibheli” tikhuluma ngelushintjo lolwentiwe elulwimini kute lelihumusho livakale kahle.

Labo labatsandza Jehova Nkulunkulu nalabamkhontako, bafuna lihumusho leliVi laNkulunkulu lelishaya emhlolweni nalelivakala kahle. (1 KuThimothi 2:4) Kungako sente lelihumusho lelibuketiwe latfolakala ngesiNgisi, sibe sinemgomo wekuphindze silihumushele etilwimini letinyenti. Kusifiso setfu futsi sithantazela kutsi wena mfundzi lotsandzekako ukutfole kuzuzisa kufundza LeliBhayibheli Lelingcwele njengobe unemgomo ‘wekufuna Nkulunkulu . . . futsi umtfole.’​—Imisebenti 17:27.