Incwadzi Yekucala YemaKhosi 13:1-34
13 Ngelivi laJehova, umuntfu waNkulunkulu+ wafika eBetheli asuka kaJuda ngesikhatsi Jerobowamu eme eceleni kweli-al’thare+ kuze ente umhlatjelo wekushiswa.
2 Lomuntfu waNkulunkulu wabese ukhuluma livi laJehova aphrofetha mayelana naleli-al’thare, watsi: “Maye al’thare, al’thare! Naku lokushiwo nguJehova: ‘Kunendvodzana letawutalwa endlini yaDavide, ligama layo nguJosaya!+ Itawunikela kuwe ngebaphristi etindzaweni letiphakeme, labo labenta imihlatjelo yekushiswa kuwe futsi itawushisa nematsambo ebantfu kuwe.’”+
3 Waniketa luphawu* ngalelolanga watsi: “Nalu luphawu* loluvela kuJehova: Nakanjani leli-al’thare litawuhlukana ekhatsi futsi umlotsa* lokulo utawucitseka.”
4 Ngekushesha nje inkhosi Jerobowamu nayiva kutsi umuntfu waNkulunkulu weliciniso uphrofethile ngeli-al’thare laseBetheli, yasusa sandla sayo yaselulela ngakulomuntfu waNkulunkulu, yase itsi: “Mbopheni!”+ Ngekushesha sandla sayo lebeyiselulele ngakulomuntfu waNkulunkulu sachwala* futsi ayizane isakhona kusibuyisela emuva.+
5 Leli-al’thare lase lehlukana ekhatsi futsi umlotsa walo wacitseka ngekuvumelana naloluphawu* lobelunikwe ngulomuntfu waNkulunkulu ngelivi laJehova.
6 Inkhosi yabese itsi kulomuntfu waNkulunkulu: “Ngicela ungicelele umusa kuJehova Nkulunkulu wakho, futsi ungithantazele kuze sandla sami selapheke.”+ Nakeva loko, lomuntfu waNkulunkulu weliciniso wacela umusa kuJehova, lesandla senkhosi sabuyela sasebenta kahle.
7 Inkhosi yase itsi kulomuntfu waNkulunkulu weliciniso: “Asambe siye ekhaya siyodla futsi ngikuphe sipho.”
8 Kodvwa lomuntfu waNkulunkulu weliciniso waphendvula inkhosi watsi: “Ngisho noma unganginika incenye yesigodlo sakho angeke ngihambe nawe ngiyokudla sinkhwa noma nginatse emanti kulendzawo.
9 Ngobe livi laJehova linginikete nangu umyalo lotsi: ‘Akukafaneli udle sinkhwa noma unatse emanti futsi akukafaneli ubuyele emuva ngendlela lochamuke ngayo.’”
10 Ngako lomuntfu waNkulunkulu wabuyela emuva ngalenye indlela, akazange ajike ngendlela lebekete ngayo eBetheli.
11 Bekunemphrofethi losakhulile lebekahlala eBetheli. Emadvodzana akhe abuya ekhaya afike amtjela ngato tonkhe tintfo lebetentiwe ngulomuntfu waNkulunkulu ngalelolanga eBetheli, kanye nemavi lebekawakhulume enkhosini. Ngemuva kwekutsi lamadvodzana asamtjelile babe wawo ngaleyondzaba,
12 lobabe wawabuta watsi: “Ujike ngayiphi indlela lomuntfu?” Lamadvodzana amkhombisa indlela lajike ngayo lomuntfu waNkulunkulu weliciniso lovela kaJuda.
13 Wase utsi kulamadvodzana akhe: “Bophelani sihlalo embongolweni yami.” Basibophela lesihlalo embongolweni, wase uyayigibela.
14 Wamlandzela lomuntfu waNkulunkulu welicinso wamkhandza ahleti ngephansi kwesihlahla lesikhulu, wase utsi kuye: “Unguye yini wena lomuntfu waNkulunkulu weliciniso losuka kaJuda?”+ Yena watsi: “Yebo nginguye.”
15 Lomphrofethi losakhulile watsi: “Asambe siye kami siyokudla sinkhwa.”
16 Kodvwa lomuntfu waNkulunkulu watsi kuye: “Ngeke ngijike nawe nobe ngemukele simemo sakho, futsi ngeke ngidle sinkhwa ngiphindze nginatse emanti nawe kulendzawo.
17 Ngobe livi laJehova litsite kimi, ‘Akukafaneli udle sinkhwa noma unatse emanti lapho futsi akukafaneli ubuyele emuva ngendlela lochamuke ngayo.’”
18 Lomphrofethi losakhulile wamphendvula watsi: “Nami ngingumphrofethi njengawe, futsi ingilosi ingitjele livi laJehova yatsi, ‘Akajike nawe, aye endlini yakho kuze atfole sinkhwa anatse nemanti.’” (Bekamyenga.)
19 Ngako lomuntfu waNkulunkulu weliciniso wajika naye, wafike wadla sinkhwa wanatsa nemanti emtini walomphrofethi losakhulile.
20 Ngesikhatsi basahleti etafuleni livi laJehova lefika kulomphrofethi losakhulile,
21 yena watsi kulomuntfu waNkulunkulu weliciniso lobekabuya kaJuda: “Naku lokushiwo nguJehova: ‘Ngesizatfu sekutsi awukasilaleli sicondziso saJehova futsi awukayigcini imitsetfo Jehova Nkulunkulu lakunikete yona,
22 kodvwa ubuyele emuva watodla sinkhwa wanatsa nemanti endzaweni lotjelwe ngayo kwatsiwa, “Ungasidli sinkhwa nobe unatse emanti,” sidvumbu sakho angeke singcwatjwe nabokhokho bakho.’”+
23 Watsi lomuntfu waNkulunkulu weliciniso nasekacedzile kudla nekunatsa, lomphrofethi losakhulile walungisela lomphrofethi lamjikisile imbongolo.
24 Lomphrofethi wabese ungenela indlela, kodvwa nakasesendleleni libhubesi lamvimba lambulala.+ Sidvumbu sakhe sawela phansi kulendlela futsi lembongolo yema eceleni kwaso; nalelibhubesi belime eceleni kwalesidvumbu.
25 Bekunemadvodza lebekendlula labona lesidvumbu lebesiwele phansi kulendlela nelibhubesi lebelime eceleni kwaso. Ahamba ayokhuluma ngalendzaba edolobheni lapho lomphrofethi losakhulile bekahlala khona.
26 Ngesikhatsi lomphrofethi losakhulile eva ngaloku, ngekushesha watsi: “Ngulomuntfu waNkulunkulu weliciniso lowedzelele umyalo waJehova;+ ngako Jehova umnikele kulelibhubesi kuze limhlasele futsi limbulale, ngekuvumelana nelivi laJehova lalikhulume kuye.”+
27 Wabese utsi emadvodzaneni akhe: “Ngibekeleni sihlalo embongolweni.” Ngako basibeka.
28 Wabese uyahamba futsi watfola lesidvumbu siwele endleleni, kunembongolo nelibhubesi eceleni kwaso. Lelibhubesi belingakasidli lesidvumbu futsi lingakayihlaseli nalembongolo.
29 Lomphrofethi watsatsa lesidvumbu salomuntfu waNkulunkulu wasigibelisa kulembongolo futsi waya naso edolobheni lakubo kuze alile futsi asingcwabe lapho.
30 Ngako lomphrofethi losakhulile wangcwaba lesidvumbu salomuntfu waNkulunkulu ethuneni lakhe futsi bebasolo bamkhalela kakhulu batsi: “Kwaze kwaba kubi loko mnaketfu!”
31 Ngemuva kwekumngcwaba, watjela emadvodzana akhe watsi: “Nangifa nibongingcwaba lakungcwatjwe khona lomuntfu waNkulunkulu. Nibobeka ematsambo ami eceleni kwematsambo akhe.+
32 Siphrofetho lasisho ngelivi laJehova mayelana neli-al’thare leliseBetheli kanye netindlu tekukhontela etindzaweni letiphakeme+ emadolobheni aseSamariya, sitawugcwaliseka noma kanjani.”+
33 Ngisho nobe sekwentekile loku, Jerobowamu akazange ayishiye indlela yakhe lembi, kodvwa wachubeka nekubeka baphristi betindzawo letiphakeme abakhetsa kubantfu labavamile.+ Bekabeka noma ngabe ngubani lofuna kuba ngumphristi, atsi: “Akabe ngumphristi wetindzawo letiphakeme.”+
34 Umphumela walesono lesentiwa yindlu yaJerobowamu+ kwaba kubhujiswa nekucotfulwa kwayo emhlabeni.+
Imibhalo lengentansi
^ Nobe “sibonakaliso.”
^ Nobe “sibonakaliso.”
^ Nobe “umlotsa lonemanoni,” lokusho kutsi umlotsa logcwele emafutsa emihlatjelo.
^ Nobe “sangasasebenti.”
^ Nobe “sibonakaliso.”
