Incwadzi Yekucala YemaKhosi 20:1-43
20 INkhosi Bheni-hadadi+ yaseSiriya+ yabita lonkhe libutfo layo lemasotja kanye nalamanye emakhosi langu-32 nemahhashi netincola tawo; yakhuphukela eSamariya+ yayivimbetela+ futsi yalwa nayo.
2 Yabese itfumela titfunywa eNkhosini Ahabi+ yaka-Israyeli lebeyikulelidolobha, yatsi kuyo: “Naku lokushiwo nguBheni-hadadi,
3 ‘Lisiliva lakho neligolide lakho, kwami. Bafati bakho labahle nemadvodzana akho, nabo bami.’”
4 Inkhosi yaka-Israyeli yaphendvula yatsi: “Kunjengobe usho nkhosi yami, mine ngiwakho kanye nako konkhe lenginako.”+
5 Ngekuhamba kwesikhatsi letitfunywa tabuya futsi tatsi: “Naku lokushiwo nguBheni-hadadi, ‘Ngikutfumelele nangu umlayeto: “Lisiliva lakho, ligolide lakho, bafati bakho kanye nemadvodzana akho, utanginika kona konkhe.”
6 Kodvwa kusasa ngalesikhatsi ngitawutfumela tinceku tami kuwe, titawuphenyisisa indlu yakho netindlu tetinceku takho futsi titawutsatsa tonkhe tintfo takho letibukekako tihambe nato.’”
7 Nayiva loko inkhosi yaka-Israyeli yabita bonkhe labadzala bakuleyo ndzawo yatsi: “Ngicela ninake naku, futsi nibone kutsi lendvodza itimisele kusiletsela inhlekelele, ngoba ifuna bonkhe bafati bami ngenkhani, nemadvodzana ami, nelisiliva lami neligolide lami, futsi mine ngivumile.”
8 Bonkhe lalabadzala kanye nabo bonkhe labantfu batsi enkhosini: “Ungayilaleli futsi ungavumi kwenta lelekushoko.”
9 Ngako yatsi kuletitfunywa taBheni-hadadi: “Nibofike nitsi enkhosini yami, ‘Konkhe lotsite inceku yakho ayikwente ekucaleni itakwenta, kodvwa loku lokushoko nyalo angeke ngikhone kukwenta.’” Letitfunywa tabese tiyahamba tiyomikisa lelivi enkhosini yato.
10 Bheni-hadadi wabese utfumelela inkhosi Ahabi umlayeto lotsi: “Shengatsi bonkulunkulu bami bangangijezisa nangabe kungaba netintfuli letenele eSamariya kutsi tingagcwala sandla kuze ngitinike ngamunye walabantfu labangilandzelako!”
11 Lenkhosi yaka-Israyeli yaphendvula yatsi: “Mtjele utsi, ‘Nangabe imphi isengakacali, ungatikhukhumeti shengatsi sewuvele uncobile.’”+
12 Ngekushesha nje nakeva lemphendvulo, lapho yena nalamakhosi basanatsa emathendeni* abo, watsi etincekwini takhe: “Tilungiseleleni kute niyohlasela!” Ngako batilungiselela kute bahlasele lelidolobha.
13 Kodvwa umphrofethi waya eNkhosini Ahabi+ yaka-Israyeli watsi: “Naku lokushiwo nguJehova, ‘Sewusibonile yini sonkhe lesicumbi lesikhulu sebantfu? Ngitasinikela esandleni sakho lamuhla futsi utawubese uyati kutsi nginguJehova.’”+
14 Ahabi wabuta watsi: “Ngitasihlasela ngesandla sabani?” Lomphrofethi watsi: “Naku lokushiwo nguJehova, ‘Ngesandla setinceku tetikhulu tetifundza.’”* Ngako Ahabi wabuta watsi: “Ngubani lotawucala lemphi?” Lomphrofethi watsi: “Nguwe!”
15 Ahabi wase ubala tonkhe tinceku tetikhulu tetifundza, watfola kutsi tingu-232; ngemuva kwaloko, wabala onkhe emadvodza aka-Israyeli watfola kutsi angu-7 000.
16 Baphuma emini ngesikhatsi Bheni-hadadi sekanatse waze wadzakwa emathendeni,* akanye nalamakhosi langu-32 labekamsita.
17 Kwatsi ngalesikhatsi letinceku tetikhulu tetifundza tiphumela ngephandle kucala, Bheni-hadadi watfumela titfunywa. Tambikela tatsi: “Kunemadvodza laphumile eSamariya.”
18 Nakeva loko watsi: “Nangabe ete ngekuthula, wabambeni ningawabulali; ngisho nobe etele kutokulwa, wabambeni ningawabulali.”
19 Ngesikhatsi letinceku tiphumela ngephandle kwalelidolobha, tilandzelwa libutfo lemasotja,
20 nguleyo naleyo yabulala sitsa sayo. Ngemuva kwaloko emaSiriya abaleka+ futsi ema-Israyeli awacosha kodvwa iNkhosi Bheni-hadadi yaseSiriya yabaleka ikanye nalabanye bebagibeli bemahhashi.
21 Kodvwa inkhosi yaka-Israyeli yaphuma yayokulwa futsi yachubeka ibulala labantfu lebebagibele emahhashi kanye nalabo lebebagibele tinkalishi temahhashi, yalincoba* lelibutfo lelikhulu laseSiriya.
22 Ngekuhamba kwesikhatsi, lomphrofethi+ weta enkhosini yaka-Israyeli wafike watsi kuyo: “Hamba uyocinisa libutfo lakho futsi ucabange kutsi yini lotayenta,+ ngobe nakucala umnyaka lolandzelako* inkhosi yaseSiriya itawuta itokuhlasela.”+
23 Tinceku tenkhosi yaseSiriya tatsi kuyo: “Nkulunkulu wabo unguNkulunkulu wetintsaba, kungako basehlulile. Kodvwa nasingalwa nabo endzaweni lebekile sitabehlula.
24 Yenta nanaku: Yehlisa onkhe emakhosi+ etikhundleni tawo bese ubeka tindvuna.
25 Ngemuva kwaloko, ubobutsisa* libutfo lemasotja lelilingana nelibutfo lelakulahlekela futsi linani lemahhashi neletincola lilingane nalelo lelakulahlekela. Kufanele silwe nabo endzaweni lebekile futsi nakanjani sitabancoba.” Ngako wasilalela leseluleko futsi wenta njalo.
26 Nakucala loyo mnyaka,* Bheni-hadadi wabutsela ndzawonye emaSiriya futsi wakhuphukela e-Afeki+ kuze ayokulwa nema-Israyeli.
27 Bantfu baka-Israyeli nabo babutsana futsi bebanekudla lokwenele, baphuma bayohlangana nemaSiriya. Ngesikhatsi libutfo laka-Israyeli limise emathende embikwelibutfo laseSiriya, belibonakala lifana nemihlambi lemibili lemincane yetimbuti, kantsi libutfo laseSiriya beligcwele yonkhe indzawo.+
28 Lenceku yaNkulunkulu weliciniso yase iya enkhosini yaka-Israyeli yafike yatsi: “Naku lokushiwo nguJehova, ‘Njengobe baseSiriya batsite: “Jehova unguNkulunkulu wetintsaba, akasuye Nkulunkulu wendzawo lebekile,” ngitawunikela sonkhe lesicumbi lesikhulu esandleni sakho,+ futsi wena utawati kutsi nginguJehova.’”+
29 Lamabutfo lamabili abesolo emise emathende, lelinye libutfo limacondzana naleli lelinye emalanga langu-7. Imphi yacala ngalelilanga lesi-7. Ngelilanga linye, libutfo laka-Israyeli labulala emasotja aseSiriya langu-100 000 labehamba ngetinyawo.
30 Lalamanye emasotja aseSiriya abalekela edolobheni lase-Afeki,+ kodvwa lubondza lwakhona lwawela etikwemasotja langu-27 000 lebekasele. Bheni-hadadi naye wabalekela kulelidolobha wafike wabhaca kulelinye likamelo lelingekhatsi.
31 Ngako tinceku taBheni-hadadi tatsi kuye: “Sivile kutsi emakhosi endlu yaka-Israyeli anemusa.* Sicela usivumele kutsi sigcoke tembatfo temasaka etingculwini tetfu futsi sifake tintsambo etinhloko bese siyaphuma siya enkhosini yaka-Israyeli. Mhlawumbe ingahle ingakubulali.”+
32 Ngako bagcoka tindvwangu temasaka, batibophela elukhalo, babophela tintsambo enhloko, baya enkhosini yaka-Israyeli befike batsi: “Bheni-hadadi inceku yakho utsi, ‘Ngicela ungangibulali.’” Yona yabaphendvula yatsi: “Kantsi usaphila? Ungumnaketfu.”
33 Lamadvodza atsatsa loko njengeluphawu loluhle futsi ngekushesha ayibamba ngelivi layo ase atsi: “Bheni-hadadi ungumnakenu.” Inkhosi yawaphendvula yatsi: “Hambani niyomlandza.” Bheni-hadadi wase uyahamba uya enkhosini futsi yamgibelisa encoleni.
34 Bheni-hadadi wabese utsi ku-Ahabi: “Emadolobha latsatfwa ngubabe wami kubabe wakho ngitawabuyisela kuwe futsi nawufuna ungativulela timakethe eDamaseko, njengobe nje babe enta eSamariya.”
Ahabi wamphendvula watsi: “Ngalesivumelwane, ngitakukhulula uhambe.”
Ngaleyo ndlela wenta sivumelwane naye futsi wamkhulula.
35 Ngelivi laJehova, lomunye wemadvodzana ebaphrofethi*+ watsi kumngani wakhe: “Ngicela ungishaye.” Kodvwa yena akavumanga kumshaya.
36 Lendvodzana yemphrofethi yatsi kulomngani wayo: “Ngobe wehlulekile kulalela livi laJehova, utawutsi nawusuka lapha ubulawe libhubesi.” Watsi nakesuka, kwachamuka libhubesi lambulala.
37 Lendvodzana yemphrofethi yatfola lenye indvodza, yatsi kuyo: “Ngicela ungishaye.” Lendvodza yamshaya yamlimata.
38 Lomphrofethi wabese uyahamba uyomela inkhosi ngasemgwacweni watifihla ngelibhandishi lebekalibophe emehlweni.
39 Yatsi inkhosi nayengca, lomphrofethi wayikhalela watsi: “Inceku yakho iye emphini lapho bekuliwa khona kamatima, kwase kuchamuka indvodza yaletsa lenye indvodza kimi yatsi, ‘Ngicela ugadze lendvodza. Nangabe ilahleka ngitakubulala esikhundleni sayo,+ noma-ke utawubhadala lithalenta* lelisiliva.’
40 Ngesikhatsi inceku yakho isematasa lapha nalapha, lendvodza ihambe ngekuphatima kweliso.” Inkhosi yaka-Israyeli yatsi kuye: “Sigwebo sakho sitawuba njengobe ushito; sewuvele usincumile.”
41 Ngekushesha wabese ususa lelibhandishi emehlweni akhe futsi lenkhosi yaka-Israyeli yabona kutsi naye ungumphrofethi.+
42 Watsi kuyo: “Naku lokushiwo nguJehova: ‘Ngesizatfu sekutsi uvumele lendvodza lengitsite yibulale yahamba,+ wena utawufa esikhundleni sayo,+ nebantfu bakho batawufa esikhundleni sebantfu bayo.’”+
43 Ngemuva kwaloko, inkhosi yaka-Israyeli yabuyela ekhaya eSamariya+ ibuhlungu futsi itfukutsele.
Imibhalo lengentansi
^ Nobe “emadlangaleni.”
^ Nobe “tifundza letiphetfwe nguletikhulu.”
^ Nobe “emadlangaleni.”
^ Nobe “yabulala.”
^ Lokusho, intfwasahlobo lelandzelako.
^ NgesiHebheru kutsi, “bala.”
^ Lokusho, entfwasahlobo.
^ Nobe “ngemakhosi lanelutsandvo lolucotfo.”
^ “Emadvodzana ebaphrofethi” kungenteka asho sikolwa lebekufundza kuso baphrofethi nobe inhlangano yebaphrofethi.
^ Lithalenta belilingana nemakhilogremu langu-34.2. Fundza Sandzisanchazo B14.
