Johane Wekucala 3:1-24
3 Asenibuke kutsi lukhulu kangakanani lutsandvo Babe lasikhombise lona!+ Usibite ngekutsi sibantfwana bakhe,*+ futsi nguloko lesingiko. Kungako live lingasati+ ngobe alikamati yena.+
2 Bazalwane labatsandzekako, nyalo sibantfwana baNkulunkulu+ kodvwa kusengakabonakali loko lesitawuba ngiko.+ Siyati nekutsi nasekabonakaliswa sitawuba njengaye, ngobe sitambona njengobe anjalo.
3 Wonkhe umuntfu lonalelitsemba uyatihlanta+ njengobe nje yena ahlantekile.
4 Nobe ngubani lochubeka ona wephula umtsetfo, futsi sono sikwephula umtsetfo.
5 Niyati nekutsi yena wabonakaliswa kuze asuse tono tetfu,+ futsi kute sono kuye.
6 Wonkhe umuntfu lohlala asebunyeni naye akachubeki ona;+ kute umuntfu lowonako loke wambona nobe lomatiko.
7 Bantfwana, akube bete lonidukisako; loyo lowenta lokulungile usuke alungile, njengobe nje yena alungile.
8 Umuntfu lochubeka ona uvela kuDeveli, ngobe Develi bekasolo ona kusukela ekucaleni.*+ Kungako iNdvodzana yaNkulunkulu yabonakaliswa, kuze itobhidlita* imisebenti yaDeveli.+
9 Wonkhe umuntfu longumntfwana waNkulunkulu akachubeki ona,+ ngobe inhlanyelo* yaNkulunkulu ikuye, futsi ngeke achubeke ona ngobe ungumntfwana wakhe.+
10 Nayi indlela lesingabona ngayo bantfwana baNkulunkulu nebantfwana baDeveli: Nobe ngubani longakwenti lokulungile akaveli kuNkulunkulu, kunjalo nangaloyo longamtsandzi umnakabo.+
11 Ngobe ngulona umlayeto lenawuva kusukela ekucaleni, kutsi kufanele sitsandzane;+
12 singabi njengaKhayini, lobekavela kulomubi futsi lowabulala umnakabo.+ Wambulalelani? Ngobe imisebenti yakhe beyimibi,+ kantsi imisebenti yemnakabo yona beyimihle.+
13 Kunganimangalisi bazalwane kutsi live liyanitondza.+
14 Siyati kutsi sesendlulile ekufeni sangena ekuphileni+ ngobe siyabatsandza bazalwane betfu.+ Loyo lote lutsandvo utawuhlale afana nekutsi ufile.+
15 Wonkhe umuntfu lotondza umzalwane wakhe ungumbulali,+ futsi niyati kutsi kute umbulali longatfola kuphila lokuphakadze.+
16 Ngenca yaloko sesiyalwati lutsandvo, ngobe yena wanikela ngekuphila kwakhe ngenca yetfu;+ natsi sibophekile kutsi sinikele ngekuphila kwetfu ngenca yebazalwane betfu.+
17 Kodvwa nobe ngubani lonetintfo latidzingako kuze aphile kepha atsi nakabona umzalwane wakhe eswele angafuni kumvela, angasho kanjani kutsi uyamtsandza Nkulunkulu?+
18 Bantfwana, akukafaneli sitsandze ngelivi nobe ngemlomo kuphela,+ kodvwa kufanele sitsandze ngetento+ nangeliciniso.+
19 Ngaleyo ndlela sitawukwati kutsi sibeliciniso, futsi sitawuciniseka kutsi Nkulunkulu uyasitsandza
20 ngisho nobe tinhlitiyo tetfu tingasilahla, ngobe Nkulunkulu mkhulu kakhulu kunetinhlitiyo tetfu, futsi wati tonkhe tintfo.+
21 Bazalwane labatsandzekako, nangabe tinhlitiyo tetfu tingasilahli, sinenkhululeko yekukhuluma naNkulunkulu;+
22 nobe yini lesiyicelako sitayemukela kuye,+ ngobe sigcina imiyalo yakhe, futsi senta netintfo letimjabulisako.
23 Umyalo wakhe utsi: Kufanele sibe nekukholwa egameni leNdvodzana yakhe Jesu Khristu+ futsi sitsandzane,+ njengobe nje asiyala.
24 Ngetulu kwaloko, loyo logcina imiyalo yakhe uhlala asebunyeni naye, naye uba sebunyeni naloyo muntfu.+ Ngemoya lasinika wona, siyati kutsi uhlala asebunyeni natsi.+
Imibhalo lengentansi
^ NgesiGriki kutsi, “sibantfwana baNkulunkulu.”
^ Nobe “acala.”
^ Nobe “itobhubhisa.”
^ Lokusho, inhlanyelo lengamila nobe lengatsela titselo.
