Johane Wekucala 5:1-21
5 Nobe ngubani lokholwako kutsi Jesu unguKhristu, usuke angumntfwana waNkulunkulu,+ futsi labo labamtsandzako loyo lonika kuphila bayamtsandza naloyo longumntfwana wakhe.
2 Sisuke sibatsandza bantfwana baNkulunkulu+ nangabe simtsandza yena, sigcina nemiyalo yakhe.
3 Ngobe nguloku lokushiwo kutsandza Nkulunkulu, kutsi sigcine imiyalo yakhe;+ futsi imiyalo yakhe ayisiwo umtfwalo,+
4 ngobe nobe ngubani* longumntfwana waNkulunkulu uyalincoba live.+ Ngekukholwa kwetfu silincobile live.+
5 Ngubani longancoba live?+ Akusuye yini loyo lokholwako kutsi Jesu uyiNdvodzana yaNkulunkulu?+
6 Jesu Khristu nguye loweta ngemanti nangengati, hhayi ngemanti kuphela,+ kodvwa ngemanti nangengati.+ Umoya ngiwo lofakazako,+ ngobe uliciniso.
7 Kunabofakazi labatsatfu:
8 umoya,+ emanti+ kanye nengati,+ futsi loku lokutsatfu kuyavumelana.
9 Nangabe sibemukela bufakazi bebantfu, bufakazi baNkulunkulu bona bukhulu kakhulu. Ngobe ngulobu bufakazi Nkulunkulu labuniketako, kutsi ufakazile mayelana neNdvodzana yakhe.
10 Umuntfu lokholwa yiNdvodzana yaNkulunkulu unebufakazi kuye ngekwakhe. Loyo longamkholwa Nkulunkulu umente locamba emanga,+ ngobe akazange abukholwe bufakazi Nkulunkulu labuniketile mayelana neNdvodzana yakhe.
11 Lobufakazi bukutsi Nkulunkulu usinike kuphila lokuphakadze,+ futsi lokuphila kuseNdvodzaneni yakhe.+
12 Loyo losebunyeni neNdvodzana unekuphila lokuphakadze; loyo longasimunye neNdvodzana yaNkulunkulu ute kuphila lokuphakadze.+
13 Nginibhalela letintfo kuze nine lenikholwa egameni leNdvodzana yaNkulunkulu+ nati kutsi ninekuphila lokuphakadze.+
14 Siyaciniseka* kutsi nobe yini lesiyicelako kuNkulunkulu levumelana nentsandvo yakhe, yena uyasiva.+
15 Nangabe sati kutsi uyasiva kunobe yini lesiyicelako, siyati kutsi sitatitfola letintfo lesiticelako ngobe siticele kuye.+
16 Nangabe lotsite abona umzalwane wakhe enta sono lesingaholeli ekufeni, kufanele athantaze, futsi Nkulunkulu utamnika kuphila loyo muntfu,+ lokusho labo labente sono lesingaholeli ekufeni. Kodvwa sikhona sono lesiholela ekufeni.+ Ngako angisho kutsi akuthantazwe mayelana naleso sono.
17 Konkhe kungalungi kusono,+ kepha kunesono lesingaholeli ekufeni.
18 Siyati kutsi wonkhe umuntfu longumntfwana waNkulunkulu akachubeki ona, kodvwa iNdvodzana yaNkulunkulu iyamgadza, futsi lomubi uyehluleka kumbamba.*+
19 Siyati nekutsi sivela kuNkulunkulu, kodvwa lonkhe live lisemandleni alomubi.+
20 Siyati kutsi iNdvodzana yaNkulunkulu yeta,+ yasinika kucondza* kuze sibe nelwati ngaNkulunkulu weliciniso. Simunye naNkulunkulu weliciniso+ ngenca yeNdvodzana yakhe Jesu Khristu. Lona nguNkulunkulu weliciniso futsi ungumtfombo wekuphila lokuphakadze.+
21 Bantfwana, tibalekeleni tithico.+
Imibhalo lengentansi
^ NgesiGriki kutsi, “nobe yini.”
^ Nobe “Sinenkhululeko yekukhuluma.”
^ Nobe “angeke amtsintse.”
^ NgesiGriki kutsi, “likhono lekucabanga; kuhlakanipha.”
