Yekucala KubaseKhorinte 10:1-33
10 Ngako ngifuna nati bazalwane, kutsi bokhokho betfu bebahamba ngephansi kwelifu,+ nekutsi bonkhe bewela lwandle,+
2 futsi bonkhe babhajatiselwa kuMosi ngelifu nangelwandle.
3 Bonkhe badla kudla lokufanako lokuvela kuNkulunkulu,+
4 futsi bonkhe banatsa sinatfo lesifanako lesivela kuNkulunkulu.+ Ngobe bebavame kunatsa kulelidvwala laNkulunkulu lebelibalandzela, futsi lelo dvwala belimelela Khristu.*+
5 Nanobe kunjalo, Nkulunkulu akazange abemukele labanyenti babo, ngako babulawa ehlane.+
6 Letintfo taba sibonelo kitsi kuze singatifisi tintfo letimbi, njengobe bona batifisa.+
7 Asingakhonti tithico njengalabanye babo; njengobe kubhaliwe kwatsiwa: “Bantfu bahlala phansi badla baphindze banatsa. Nabacedza basukuma futsi batijabulisa.”+
8 Asingagwadli* njengobe labanye babo bagwadla,* umphumela waba kutsi kufe bantfu labangu-23 000 ngelilanga linye.+
9 Asingamlingi Jehova* njengobe labanye babo bamlinga,+ umphumela waba kutsi babulawe tinyoka.+
10 Asingakhononi njengobe labanye babo bakhonona,+ umphumela waba kutsi babhujiswe ngumbhubhisi.+
11 Letintfo letenteka kubo tisibonelo, futsi tabhalelwa kutsi tibe secwayiso kitsi+ tsine lesesifikelwe kuphela kwalelive.
12 Ngako loyo locabanga kutsi umile akacaphele angawi.+
13 Kute silingo lesinehlele lesingakake sabehlela nalabanye bantfu.+ Kodvwa Nkulunkulu wetsembekile futsi ngeke avume kutsi nilingwe ngetulu kwaloko leningakhona kukwetfwala,+ kepha nanilingwa utawenta nendlela yekuphuma kuze nikhone kubeketela.+
14 Ngako-ke bazalwane bami labatsandzekako, kubalekeleni kukhonta tithico.+
15 Ngikhuluma nani njengebantfu labanekucondza; tihloleleni nine loku lengikushoko.
16 Lendzebe yesibusiso lesibonga ngayo Nkulunkulu ayisho yini kutsi sihlanganyela engatini yaKhristu?+ Lesinkhwa lesisihlephulako asisho yini kutsi sihlanganyela emtimbeni waKhristu?+
17 Njengobe kunesinkhwa sinye, tsine nanobe sibanyenti singumtimba munye,+ ngobe sonkhe sidla sinkhwa sinye.
18 Bukani labo labangema-Israyeli:* Labadla imihlatjelo abatfoli yini incenye letsite yalokuse-al’thare?+
19 Yini lengiyishoko? Ngisho kutsi loko lokunikelelwe sithico kulutfo yini, nobe ngulesithico lesilutfo?
20 Cha; kodvwa ngitsi tintfo betive labatinikelako batinikelela emadimoni, hhayi Nkulunkulu;+ ngako angifuni kutsi nine nitihlanganise nemadimoni.+
21 Ngeke ninatse endzebeni yaJehova* niphindze ninatse endzebeni yemadimoni; ngeke nidle “etafuleni laJehova”*+ niphindze nidle etafuleni lemadimoni.
22 ‘Sifuna kwenta Jehova* abe nesikhwele yini’?+ Tsine sinemandla yini kunaye?
23 Tonkhe tintfo tivumelekile, kodvwa akusito tonkhe letilusito. Tonkhe tintfo tivumelekile, kodvwa akusito tonkhe letakhako.+
24 Nguloyo naloyo akangatifuneli lokusita yena, kodvwa akachubeke afuna lokusita lomunye umuntfu.+
25 Nibodla nobe yini letsengiswa emakethe yenyama, ningabuti lutfo ngenca yabonembeza benu,
26 ngobe “umhlaba nako konkhe lokukuwo kwaJehova.”*+
27 Nangabe umuntfu longakholwa animema futsi nifuna kuya, nibodla nobe yini laninika yona, ningabuti lutfo ngenca yabonembeza benu.
28 Kodvwa nangabe lotsite atsi kini: “Lenyama beyinikelelwe tithico,” ningaboyidla, ngenca yaloyo lonitjelile nangenca yanembeza.+
29 Angisho nembeza wenu, kodvwa ngisho nembeza walona lomunye umuntfu. Ngobe kungani inkhululeko yami kufanele yehlulelwe nganembeza walomunye umuntfu?+
30 Nangabe ngidla ngekubonga, kungani kufanele ngikhulunywe kabi ngaloko lengikubongako?+
31 Ngako-ke, ngisho nobe nidla, nobe ninatsa, nalapho nenta nobe yini lenye, tonkhe tintfo tenteleni kukhatimulisa Nkulunkulu.+
32 Yekelani kuba sikhubekiso kumaJuda, kumaGriki, nasebandleni laNkulunkulu,+
33 njengobe nje nami ngetama kujabulisa bonkhe bantfu kuto tonkhe tintfo, futsi ngingatifuneli lokusita mine+ kodvwa lokusita nalabanyenti, khona batewusindziswa.+
Imibhalo lengentansi
^ Nobe “belinguKhristu.”
^ Ligama lesiGriki lelihunyushwe ngekutsi “bugwadla,” lifaka ekhatsi tonkhe tinhlobo tekulalana letingemukeleki kuNkulunkulu. NgesiGriki kutsi por·neiʹa. Fundza Tinchazelo Temagama.
^ Ligama lesiGriki lelihunyushwe ngekutsi “bugwadla,” lifaka ekhatsi tonkhe tinhlobo tekulalana letingemukeleki kuNkulunkulu. NgesiGriki kutsi por·neiʹa. Fundza Tinchazelo Temagama.
^ Fundza Sandzisanchazo A5.
^ NgesiGriki kutsi, “labangu-Israyeli wenyama.”
^ Fundza Sandzisanchazo A5.
^ Fundza Sandzisanchazo A5.
^ Fundza Sandzisanchazo A5.
^ Fundza Sandzisanchazo A5.
