Yekucala KubaseKhorinte 3:1-23
3 Ngako-ke bazalwane, ngehluleka kukhuluma nani njengebantfu labacondziswa ngumoya waNkulunkulu,+ kodvwa ngakhuluma nani njengebantfu labacondziswa yinyama, njengobe nitinswane+ kuKhristu.
2 Nganipha lubisi hhayi kudla lokucinile, ngobe benisengakacini kahle. Ecinisweni nanyalo nisengakacini kahle,+
3 ngobe nisacondziswa yinyama.+ Njengobe ninemona futsi nicabana, anicondziswa yini yinyama+ futsi anenti yini njengalabanye bantfu?
4 Ngobe nangabe lomunye atsi: “Mine ngiwaPawula,” kodvwa lomunye atsi: “Mine ngiwa-Apholosi,”+ nisuke ningalingisi yini labanye bantfu?
5 Ungubani-ke Apholosi, futsi ungubani Pawula? Batinceku+ letenta umsebenti lesawunikwa yiNkhosi futsi lenaba ngemakholwa ngenca yato.
6 Mine ngahlanyela,+ Apholosi wanisela,+ kodvwa Nkulunkulu wachubeka akhulisa;
7 kuze kungadvunyiswa loyo lohlanyelako naloyo loniselako, kodvwa kudvunyiswe Nkulunkulu, lokunguye lokhulisako.+
8 Loyo lohlanyelako naloyo loniselako bamunye,* kodvwa nguloyo naloyo utawutfola umvuzo kuye ngemsebenti lawentile.+
9 Ngobe sitisebenti letikanye naNkulunkulu. Nine niyinsimu yaNkulunkulu lelinywako, lokusakhiwo sakhe.+
10 Ngekuvumelana nemusa lomkhulu Nkulunkulu langentele wona, mine ngibeke sisekelo+ njengemakhi longuchwephesha,* kodvwa kunalotsite lowakha etikwaso. Ngako nguloyo naloyo akachubeke anaka indlela lakha ngayo etikwaso.
11 Ngobe kute umuntfu longabeka lesinye sisekelo ngaphandle kwalesi lesesibekiwe, lesinguJesu Khristu.+
12 Nangabe lotsite akha etikwalesisekelo ngeligolide, ngelisiliva, ngematje ladule kakhulu, ngetingodvo, ngetjani, nobe ngetinhlanga,
13 nakufika lilanga lekuvivinywa, umsebenti wemuntfu ngamunye utawuphumela ebaleni,* ngobe utawembulwa ngemlilo;+ futsi lomlilo utawufakazela kutsi kunjani loko umuntfu ngamunye lakwakhile.
14 Nangabe loko umuntfu lakwakhe etikwalesisekelo kungashi, loyo muntfu utawutfola umvuzo;
15 nangabe loko umuntfu lakwakhile kusha, loyo muntfu utawulahlekelwa kakhulu, kodvwa yena utawusindza; futsi kutawuba shengatsi uphunyule emlilweni.
16 Anati yini kutsi nine nilithempeli laNkulunkulu,+ nekutsi umoya wakhe uhlala kini?+
17 Nangabe umuntfu abhidlita lithempeli laNkulunkulu, Nkulunkulu utambhubhisa; ngobe lithempeli laNkulunkulu lingcwele, futsi nine ningilo.+
18 Akube bete lotiyengako. Nangabe lotsite emkhatsini wenu acabanga kutsi uhlakaniphile kulelive,* akabe silima, kuze abe ngulohlakaniphile.
19 Ngobe kuhlakanipha kwalelive kubulima kuNkulunkulu; njengobe kubhaliwe kwatsiwa: “Utawenta labahlakaniphile balinyatwe bucili babo,”+
20 kwabhalwa nekutsi: “Jehova* uyati kutsi imicabango yebantfu labahlakaniphile ilite.”+
21 Ngako-ke akube bete lotigabatisa ngebantfu; ngobe tonkhe tintfo ngetenu,
22 kungaba nguPawula, ngu-Apholosi, nguKhefase,*+ live, kuphila, kufa, tintfo letikhona nyalo nobe tintfo letiseta, tonkhe tintfo ngetenu;
23 nine-ke nibaKhristu;+ Khristu yena waNkulunkulu.
Imibhalo lengentansi
^ Nobe “banemgomo munye.”
^ Nobe “njengemcondzisi lohlakaniphile wemsebenti.”
^ NgesiGriki kutsi, “utawubonakala.”
^ Nobe “kulesikhatsi.” Fundza Tinchazelo Temagama.
^ Fundza Sandzisanchazo A5.
^ Ubitwa nangekutsi nguPhetro.
