Yekucala KubaseKhorinte 7:1-40
7 Mayelana netintfo lenangibhalela tona, kuhle kutsi indvodza ingamtsintsi* umuntfu lomsikati;
2 kodvwa ngenca yekwandza kwebugwadla,* nguleyo naleyo ndvodza ayibe newayo umfati,+ nemfati abe neyakhe indvodza.+
3 Indvodza ayinike umkayo loko lokumfanele, nemfati ente lokufanako endvodzeni yakhe.+
4 Umfati ute ligunya emtimbeni wakhe, kodvwa yindvodza yakhe leneligunya kuwo; ngendlela lefanako nendvodza ite ligunya emtimbeni wayo, kodvwa ngumkayo loneligunya kuwo.
5 Ningagodlelani, ngaphandle kwanangabe nivumelene sikhatsi lesitsite, kuze nitinike sikhatsi sekuthantaza bese niphindze niyahlangana, khona Sathane angatochubeka anilinga ngekwehluleka kwenu kutibamba.
6 Nanobe kunjalo, ngiyanivumela kutsi nikwente konkhe loku lengikushito, kodvwa anginishayeli umtsetfo.
7 Kepha ngifisa shengatsi ngabe bonkhe bantfu banjengami. Kodvwa-ke nguloyo naloyo muntfu unesipho+ lasiphiwe nguNkulunkulu, kungako labanye bashada, labanye bangashadi.
8 Kubantfu labangakashadi nakubafelokati ngitsi kuhle kutsi bahlale banjengami.+
9 Kodvwa nangabe bangakhoni kutibamba, abashade, ngobe kuncono kushada kunekushiswa yinkhanuko.+
10 Bantfu labashadile ngibanika leticondziso, kodvwa akusho mine kusho iNkhosi, kutsi umfati akukafaneli ehlukane nendvodza yakhe.+
11 Kodvwa nangabe ehlukana nayo, akahlale angakashadi nobe aphindze abuyisane nayo; nendvodza akukafaneli imshiye umkayo.+
12 Kulaba labanye, kusho mine hhayi iNkhosi,+ ngitsi: Nangabe umzalwane anemfati longakholwa, kodvwa lomfati avuma kuhlala naye, akangamshiyi;
13 futsi nangabe umfati anendvodza lengakholwa, kodvwa ivuma kuhlala naye, akangayishiyi.
14 Ngobe indvodza lengakholwa ingcwelisiwe ngenca yemfati wayo, nemfati longakholwa ungcwelisiwe ngenca yendvodza yakhe lekholwako; kube akusinjalo, ngabe bantfwana benu bangcolile, kodvwa nyalo bangcwele.
15 Kepha nangabe lona longakholwa akhetsa kuhamba,* akahambe; umzalwane nobe dzadze akakabopheki etimeni letinjalo, kodvwa Nkulunkulu unibitele kutsi nibe nekuthula.+
16 Ngobe kwati bani nje, mhlawumbe wena mfati ungayisindzisa indvodza yakho.+ Nawe ndvodza, mhlawumbe ungamsindzisa umkakho.
17 Kodvwa njengobe Jehova* abele umuntfu ngamunye, nguloyo naloyo akaphile njengobe Nkulunkulu ambitile.+ Ngako lomyalo ngiwunika onkhe emabandla.
18 Ukhona yini lowabitwa asokile?+ Akachubeke asokile. Ukhona yini lowabitwa angakasoki? Akangasoki.+
19 Kusoka akusho lutfo, kantsi nekungasoki nako akusho lutfo,+ kepha kulalela imitsetfo yaNkulunkulu+ ngiko lokubalulekile.
20 Umuntfu akachubeke akunobe ngusiphi simo labitwa akuso.+
21 Wabitwa usigcili yini? Loko akungakukhatsati;+ kodvwa nawungakhona kukhululeka, lisebentise lelo tfuba.
22 Ngobe nobe ngubani loseNkhosini futsi lowabitwa asigcili, ungumuntfu lokhululiwe futsi seweNkhosi;+ ngendlela lefanako, loyo lowabitwa akhululekile, usigcili saKhristu.
23 Natsengwa ngelinani lelikhulu,+ ngako yekelani kuba tigcili tebantfu.
24 Bazalwane, umuntfu akachubeke embikwaNkulunkulu akunobe ngusiphi simo labitwa akuso.
25 Mayelana nalabangazange bashade, ngite umyalo lovela eNkhosini, kodvwa nginitjela umbono wami,+ futsi ningangetsemba ngobe nami iNkhosi yangentela umusa.
26 Ngako, ngicabanga kutsi kuncono ngemuntfu kutsi achubeke anjengobe anjalo ngenca yebumatima lobukhona nyalo.
27 Uboshelwe kumfati yini? Nakunjalo, ungafuni kukhululeka.+ Ukhululekile yini kumfati? Nakunjalo, ungamfuni umfati.
28 Kodvwa ngisho nobe ushada, usuke ungoni. Nangabe umuntfu longazange ashade, sekashada, usuke angoni. Kepha labo labashadako batawuba nelusizi enyameni. Mine-ke ngetama kuniphephisa.
29 Ngetulu kwaloko bazalwane, ngiyasho ngitsi, sikhatsi lesisele sesinciphile.+ Kusukela nyalo, labo labanebafati ababe njengalabete,
30 nalabo labakhalako ababe njengalabangakhali, labo labajabulako ababe njengalabangajabuli, labo labatsengako ababe njengalabete lutfo,
31 nalabo labasebentisa lelive ababe njengalabangalisebentisi kakhulu, ngobe simo salelive siyashintja.
32 Ecinisweni angifuni kutsi nikhatsateke. Indvodza lengakashadi ikhatsateka ngetintfo teNkhosi, ngekutsi ingemukeleka njani eNkhosini.
33 Kepha indvodza leshadile ikhatsateka ngetintfo talelive,+ kutsi ingemukeleka njani kumkayo,
34 futsi yehlukene ekhatsi. Ngetulu kwaloko, lomsikati longakashadi nobe intfombi ntfo, ikhatsateka ngetintfo teNkhosi+ kutsi ibe ngcwele emtimbeni nasemoyeni wayo. Kodvwa umfati loshadile ukhatsateka ngetintfo talelive, kutsi angemukeleka njani endvodzeni yakhe.
35 Kepha loku ngikusho kuze kuzuze nine, hhayi kutsi ngiyanivimbela,* kodvwa ngifuna kunikhutsata kutsi nente loko lokufanele, futsi nitinikele njalo eNkhosini ngaphandle kwekuphatamiseka.
36 Nangabe lotsite acabanga kutsi uyehluleka kutibamba kutsi ahlale angakashadi, futsi sekendlulile esikhatsini sekuvutselwa yinkhanuko yebusha, naku lokufanele akwente: Akente loko lakufunako, futsi utawube angoni. Akashade.+
37 Kodvwa nangabe lotsite atimisele enhlitiyweni yakhe futsi angasiboni sidzingo, akhona nekutibamba, futsi sekente sincumo enhlitiyweni yakhe sekuhlala angakashadi, utawube wenta kahle.+
38 Ngako-ke, loyo loshadako wenta kahle, kodvwa loyo longashadi utawube wenta kahle kakhulu.+
39 Umfati ubophekile nangabe nje indvodza yakhe isaphila.+ Kepha naseyifile,* ukhululekile kutsi angashada nanobe ngubani lamfunako, ashade eNkhosini kuphela.+
40 Kodvwa ngekwembono wami, utawujabula kakhulu nangabe ahlala angashadi, futsi ngiyaciniseka kutsi nami nginemoya waNkulunkulu.
Imibhalo lengentansi
^ Lokusho, kungalali naye.
^ Ligama lesiGriki lelihunyushwe ngekutsi “bugwadla,” lifaka ekhatsi tonkhe tinhlobo tekulalana letingemukeleki kuNkulunkulu. NgesiGriki kutsi por·neiʹa. Fundza Tinchazelo Temagama.
^ Nobe “kwehlukana naye.”
^ Fundza Sandzisanchazo A5.
^ NgesiGriki kutsi, “nginibopha ngentsambo.”
^ NgesiGriki kutsi, “naseyilele ekufeni.”
