Yekucala KubaseThesalonika 1:1-10
1 Mine Pawula ngikanye naSilvanosi*+ naThimothi,+ ngibhalela libandla laseThesalonika lelisebunyeni naNkulunkulu longuBabe, neNkhosi Jesu Khristu:
Shengatsi ningemukela umusa lomkhulu kanye nekuthula lokuvela kuNkulunkulu.
2 Ngaso sonkhe sikhatsi siyambonga Nkulunkulu nasinibeka emithantazweni yetfu,+
3 ngobe sihlale siwukhumbula umsebenti leniwenta ngekwetsembeka, nekutikhandla kwenu ngelutsandvo, kanye nekucinisela kwenu ngenca yelitsemba leninalo+ eNkhosini yetfu Jesu Khristu embikwaNkulunkulu wetfu longuBabe.
4 Bazalwane labatsandvwa nguNkulunkulu, siyati kutsi nguye lowanikhetsa,
5 ngobe tindzaba letimnandzi lesitishumayelako atifikanga kini ngemavi kuphela, kodvwa taphindze tefika ngemandla, ngemoya longcwele nangekuciniseka lokukhulu, njengobe nje nati kutsi besitiphatsa njani ngesikhatsi sisemkhatsini wenu kuze kusitakale nine.
6 Ngako nalingisa tsine+ neNkhosi,+ ngobe livi nalemukela ngenjabulo leletfwa ngumoya longcwele nanobe benihlupheka kakhulu,+
7 futsi naba sibonelo kuwo onkhe emakholwa laseMasedoniya nase-Akhaya.
8 Ecinisweni, anigcinanga nje ngekukhuluma livi laJehova* eMasedoniya nase-Akhaya, kodvwa kukholwa kwenu kuNkulunkulu sekusakatekele kuto tonkhe tindzawo,+ kangangekutsi tsine sekute lokudzingeka sikusho.
9 Ngobe bona bahlale basibikela ngendlela lesanitfola ngayo ekucaleni, nekutsi natishiya njani tithico+ kuze nibe tigcili taNkulunkulu lophilako neweliciniso,
10 nase nilindzela iNdvodzana yakhe levela ezulwini,+ leyo layivusa ekufeni, lokunguJesu losikhululako elulakeni lolutako.+
