Incwadzi Yekucala YaSamuweli 21:1-15
21 Ngekuhamba kwesikhatsi Davide waya eNobi+ ku-Ahimeleki umphristi. Ahimeleki wesaba kakhulu nakabona Davide, futsi watsi kuye: “Kungani uwedvwa futsi kute nemuntfu lohamba naye?”+
2 Davide waphendvula Ahimeleki umphristi watsi: “Inkhosi ingitfume kutsi ngente lokutsite kodvwa itsite kimi: ‘Akangabi khona umuntfu lowatiko ngalomsebenti lengikutfume wona nangalemiyalo lengikunikete yona.’ Ngivumelene nemajaha lengihamba nawo kutsi sitawuhlangana endzaweni letsite.
3 Nangabe tikhona tinkhwa letisihlanu lapha, ngicela ungiphe tona, nobe sekungaba yini-ke lekhona.”
4 Lomphristi waphendvula Davide watsi: “Kute sinkhwa lesivamile lapha, kodvwa kunesinkhwa lesingcwele,+ leningasitfola kuphela nje nangabe lamajaha lohamba nawo angakayi ecansini.”+
5 Davide waphendvula lomphristi watsi: “Asikayi ecansini njengobe singakwenti loko nasiyokwenta umsebenti lotsite.+ Ngako nangabe lamajaha lengihamba nawo atigcina angcwele nasenta imisebenti levamile, kakhulu kangakanani-ke lamuhla!”
6 Lomphristi wamnika sinkhwa lesingcwele+ ngobe bekute lesinye ngaphandle kwesinkhwa lesinikelwe kuNkulunkulu, lebesisusiwe embikwaJehova kuze kubekwe sinkhwa lesisha ngalelolanga.
7 Lenye inceku yaSawula beyilapho ngalelolanga, beyivalelwe embikwaJehova ethendeni lekukhontela. Libito layo bekunguDowegi+ um-Edomu,+ futsi beyiyindvuna yebelusi baSawula.
8 Davide watsi ku-Ahimeleki: “Unaso yini sikhali nobe inkemba lana? Angiketi nenkemba nobe tikhali tami ngobe umsebenti wenkhosi bewuphutfuma.”
9 Lomphristi wamphendvula watsi: “Kunenkemba yaGoliyathi,+ lomFilisti lowambulala eSihosheni* sase-Ela,+ ingemuva kwesidziya futsi igocotelwe ngendvwangu.+ Yitsatse nangabe uyifuna ngobe ngiyo yodvwa lekhona lana.” Davide watsi: “Kute lefanana nayo. Nginikete yona.”
10 Ngalelolanga Davide wesuka lapho wachubeka nekubalekela+ Sawula, futsi waze wefika eNkhosini Akhishi yaseGathi.+
11 Tinceku ta-Akhishi tatsi kuye: “Lona akusuye yini Davide, lenkhosi yakulela live? Akusuye yini lona labebahlabela ngaye ngesikhatsi bajayiva batsi:
‘Sawula ubulele bantfu labatinkhulungwane,Davide yena wabulala labangemashumi etinkhulungwane’?”+
12 Davide wawafaka enhlitiyweni lamavi, futsi wayesaba+ kakhulu iNkhosi Akhishi yaseGathi.
13 Ngako wenta shengatsi ulahlekelwe yingcondvo,+ watiphatsisa kweluhlanya nakasembikwalabantfu.* Abedvweba iminyango yeligede, avutise netince futsi tehle ngesilevu sakhe.
14 Ekugcineni Akhishi watsi kuletinceku takhe: “Niyayibona mosi lendvodza kutsi iyahlanya! Pho niyiletseleni lakimi?
15 Ngeswele emadvodza lahlanyako yini mine kutsi seningaze ningiletsele lena lapha? Ifunani landlini yami?”
