Incwadzi Yekucala YaSamuweli 28:1-25
-
Sawula uvakashela sangoma e-Eni-dori (1-25)
28 Ngalawo malanga emaFilisti ahlanganisa emabutfo awo kuze ayokulwa nema-Israyeli.+ Ngako Akhishi watsi kuDavide: “Uyati mosi kutsi wena nalamadvodza lokanye nawo nitakuya nami emphini.”+
2 Nakeva loko, Davide watsi ku-Akhishi: “Ukwati kahle loko inceku yakho letawukwenta.” Akhishi watsi kuDavide: “Ngiko nje ngitakubeka kutsi uhlale ungugadzi wami.”*+
3 Samuweli abesafile, futsi onkhe ema-Israyeli abemlilele ngenca yekufa kwakhe, ase amngcwaba eRama, lobekulidolobha lakubo.+ Sawula abeticoshile kulelive tangoma kanye nebantfu lebebaphengula.+
4 EmaFilisti abutsana ndzawonye ase ayahamba ayomisa emathende eShunemu.+ NaSawula wahlanganisa ndzawonye onkhe ema-Israyeli, futsi bamisa emathende eGilbowa.+
5 Ngesikhatsi Sawula abona inkambu yemaFilisti, wesaba futsi inhlitiyo yakhe yashayela etulu.+
6 Ngisho nobe Sawula abebuta kuJehova,+ kodvwa Jehova akazange amphendvule, kungaba ngemaphupho nobe nge-Urimu+ nobe ngebaphrofethi.
7 Ekugcineni Sawula watsi etincekwini takhe: “Ngifuneleni umfati losangoma,+ futsi ngitawuhamba ngiyobuta kuye.” Tinceku takhe tamphendvula tatsi: “Ukhona umfati losangoma e-Eni-dori.”+
8 Ngako Sawula watifihla, wagcoka letinye timphahla wase uya kulomfati ebusuku ahamba netinceku takhe letimbili. Watsi kuye: “Ngicela uphengule usebentisa imimoya+ futsi ungibitele loyo lengitamusho.”
9 Kodvwa lomfati watsi kuye: “Ukwati kahle loko Sawula lakwenta, nendlela laticosha ngayo tangoma nalabaphengulako kulelive.+ Kungani-ke ungibekela lugibe kuze ngibulawe?”+
10 Sawula wase ufunga kuye ngaJehova watsi: “Ngifunga Jehova Nkulunkulu lophilako kutsi ngeke ube nelicala kulendzaba!”
11 Ngako lomfati watsi: “Ngikubitele bani?” Sawula wamphendvula watsi: “Ngibitele Samuweli.”
12 Ngesikhatsi lomfati abona “Samuweli,”*+ wamemeta kakhulu futsi watsi kuSawula: “Ungiyengeleni? UnguSawula mosi wena!”
13 Inkhosi yamphendvula yatsi: “Ungesabi. Ubonani?” Lomfati watsi kuSawula: “Ngibona umuntfu lokungatsi ngunkulunkulu, uyenyuka uphuma emhlabatsini.”
14 Nakeva loko Sawula wambuta watsi: “Ubukeka njani?” lomfati watsi: “Ngibona kwenyuka likhehla futsi ligcoke lijazi lelite imikhono.”+ Sawula wase uyabona kutsi “kwakunguSamuweli,” futsi waguca phansi wakhotsama.
15 Ngemuva kwaloko “Samuweli” watsi kuSawula: “Ungiphazamiselani ngekutsi utsi angivuswe?” Sawula wamphendvula watsi: “Ngisenkingeni lenkhulu. EmaFilisti alwa nami kantsi naNkulunkulu sewungishiyile futsi akasangiphendvuli, kungaba ngebaphrofethi nobe ngemaphupho.+ Kungako ngite lapha kuwe kuze ungitjele kutsi kufanele ngenteni.”+
16 “Samuweli” wase utsi: “Kungani ubuta kimi nyalo njengobe Jehova sekakushiyile+ futsi waba sitsa sakho?
17 Jehova utawenta loko langitfuma kutsi ngikusho: Jehova utawususa umbuso etandleni takho awunike Davide, longumuntfu wakini.+
18 Jehova wenta loku kuwe lamuhla ngobe awuzange ulilalele livi laJehova, futsi awuwabulalanga ema-Amaleki+ lamenta watfukutsela kakhulu.
19 Jehova utawunikela ema-Israyeli kanye nawe kumaFilisti,+ futsi kusasa wena+ nemadvodzana akho+ nitawuba nami lapha. Jehova utawuphindze anikele libutfo lema-Israyeli esandleni semaFilisti.”+
20 Ngaso leso sikhatsi Sawula wawa phansi futsi wesaba kakhulu ngenca yemavi “aSamuweli.” Waphelelwa ngemandla ngobe abengakadli lutfo lilanga lonkhe nebusuku bonkhe.
21 Ngesikhatsi lomfati eta kuSawula, abona nekutsi ukhatsateke kakhulu, watsi kuye: “Inceku yakho ikulalele konkhe lokushito, yabeka kuphila kwayo engotini,+ futsi yenta loko loyitjele kona.
22 Nyalo ngicela ulalele loko lokushiwo yinceku yakho. Ngicela kukuniketa lucetu lwesinkhwa kute udle, khona utewuba nemandla ekuchubeka nendlela.”
23 Kodvwa Sawula wala watsi: “Angeke ngize ngidle.” Nobe kunjalo tinceku takhe kanye nalomfati bachubeka bamncenga. Ekugcineni wabalalela futsi wavuka wahlala embhedzeni.
24 Lomfati abenelitfole lelikhuluphele ngako waphutfuma walihlaba,* wase utsatsa fulaha wawubhuca futsi wabhaka sinkhwa lesingenamvubelo.
25 Waphakela Sawula kanye netinceku takhe, futsi badla. Ngemuva kwaloko bahamba kulobo busuku.+
Imibhalo lengentansi
^ NgesiHebheru kutsi, “ugadze inhloko yami malanga onkhe.”
^ Nobe “lokutsite lobekubonakala shengatsi nguSamuweli.”
^ Nobe “walenta umhlatjelo.”
