Incwadzi Yekucala YaSamuweli 6:1-21
-
EmaFilisti abuyisela Libhokisi ka-Israyeli (1-21)
6 Libhokisi+ laJehova lahlala eveni lemaFilisti tinyanga letingu-7.
2 EmaFilisti abita baphristi kanye nalabaphengulako,+ ababuta atsi: “Kufanele senteni ngaleLibhokisi laJehova? Sicela nisitjele kutsi silibuyisele njani emuva endzaweni yalo.”
3 Bona bawaphendvula batsi: “Nangabe nilibuyisela emuva lelibhokisi lesivumelwane saJehova Nkulunkulu wema-Israyeli, akukafaneli nilijikise ningakaphatsi umnikelo. Kufanele nakanjani nilibuyisele emuva lihambisana nemnikelo welicala.+ Nguleyo kuphela indlela leningelashwa ngayo, futsi nitawukwati kutsi yini leyenta sandla saNkulunkulu singesuki kini.”
4 Ngako abuta: “Ngumuphi umnikelo welicala lokufanele siwumikise kuye?” Bawaphendvula batsi: “Kufanele nitfumele ematfumba* eligolide lasihlanu nemagundvwane eligolide lasihlanu, ahambisane nelinani lebaholi bemaFilisti+ ngobe lesishayo sihlasele wonkhe muntfu emkhatsini wenu kanye nebaholi benu.
5 Nibokwakha imifanekiso yematfumba kanye nemifanekiso yemagundvwane+ labangela inhlekelele eveni lenu futsi kufanele nihloniphe Nkulunkulu wema-Israyeli. Mhlawumbe anganciphisa lesijeziso lasibhekise kini kanye nakunkulunkulu wenu naseveni lenu.+
6 Kungani nenta tinhlitiyo tenu tibe lukhuni njengobe kwenta baseGibhithe naFaro?+ Ngesikhatsi abajezisa kamatima,+ kwadzingeka kutsi bakhulule ema-Israyeli futsi abese ayahamba.+
7 Nyalo lungisani inkalishi lensha kanye netinkhomo letimbili letinematfole futsi letingakaze tiboshelwe ejokeni. Ngemuva kwaloko nibobophela letinkhomo tidvonse lenkalishi, kodvwa nibotsatsa lamatfole ato niwabuyisele ekhaya angahambi nato.
8 Nibotsatsa leLibhokisi laJehova nilibeke kulenkalishi, futsi letitfombe teligolide lenititfumela kuye kutsi tibe ngumnikelo welicala nibotifaka ebhokisini nilibeke eceleni kwaleLibhokisi laNkulunkulu.+ Ngemuva kwaloko litfumeleni lihambe
9 bese niyalibuka. Nangabe likhuphuka ngemgwaco loya eBhethi-shemeshi,+ lokuyindzawo yalo, kutawusho kutsi Nkulunkulu wema-Israyeli nguye losibangele letintfo letimbi. Kodvwa nangabe lingakhuphuki sitawati kutsi bekungasiye lobekasijezisa; kumane nje kwatentakalela.”
10 Lamadvodza enta njengobe atjeliwe. Atsatsa tinkhomo letimbili lebetinematfole atibophela kulenkalishi, ase avalela lamatfole ekhaya.
11 Ngemuva kwaloko abeka leLibhokisi laJehova kulenkalishi, aphindze abeka nalelibhokisi lebelinalamagundvwane eligolide nemifanekiso yematfumba abo.
12 Letinkhomo tahamba tacondza emgwacweni loya eBhethi-shemeshi.+ Tahamba kuloyomgwaco lomkhulu, tibhonsa njengobe tichubeka nendlela, futsi atizange tijikele ngesekudla nobe ngesencele. Sonkhe leso sikhatsi baholi bemaFilisti bebatilandzela baze bayofika emnceleni weBhethi-shemeshi.
13 Bantfu baseBhethi-shemeshi bebavuna kolo esihosheni.* Batsi nabaphakamisa emehlo futsi babona leLibhokisi, bajabula kakhulu.
14 Lenkalishi yefika endzaweni yaJoshuwa waseBhethi-shemeshi, yema lapho eceleni kwelitje lelikhulu. Labantfu babese bakabha letingodvo talenkalishi futsi banikela ngaletinkhomo+ taba ngumnikelo wekushiswa kuJehova.
15 EmaLevi+ alehlisa leLibhokisi laJehova kanye naleli beliseceleni kwalo lebelifake imifanekiso yeligolide futsi akubeka etikwalelitje lelikhulu. Ngalelolanga, emadvodza aseBhethi-shemeshi+ enta iminikelo yekushiswa kanye nemihlatjelo kuJehova.
16 Ngesikhatsi baholi labasihlanu bemaFilisti babona loko, babuyela e-Ekroni ngalelolanga.
17 Ngulawa-ke ematfumba eligolide latfunyelwa ngemaFilisti kutsi abe ngumnikelo welicala kuJehova:+ linye lase-Ashdodi,+ linye laseGaza, linye lase-Ashkeloni, linye laseGathi+ nalinye lase-Ekroni.+
18 Linani lemagundvwane eligolide belihambisana nelinani lawo onkhe emadolobha emaFilisti lebekabuswa ngulabaholi labasihlanu, lokufaka ekhatsi emadolobha labiyelwe kanye nemadolobhana langakabiyelwa.
Lelitje lelikhulu lokwabekwa kulo leLibhokisi laJehova libufakazi kuze kube ngulamuhla endzaweni yaJoshuwa waseBhethi-shemeshi.
19 Nkulunkulu wabulala emadvodza aseBhethi-shemeshi ngobe bekabuke Libhokisi laJehova. Wabulala bantfu labangu-50 070,* futsi bantfu bacala kulila ngobe Jehova bekacotfule linyenti labo.+
20 Ngako emadvodza aseBhethi-shemeshi abuta atsi: “Ngubani lotakuma embikwaJehova, longuNkulunkulu longcwele?+ Awu, kube mane abengasuka kitsi aye kulabanye.”+
21 Abese atfumela titfunywa kubantfu lebebahlala eKhiriyathi-jeyarimu+ atsi: “EmaFilisti alibuyisile Libhokisi laJehova. Yehlelani ngalapha nitolitsatsa nikhuphuke nalo.”+
Imibhalo lengentansi
^ Lamatfumba abeba lakuphuma khona emangcoliso.
^ Nobe “etsafeni.”
^ NgesiHebheru kutsi, “emadvodza langu-70, emadvodza langu-50 000.”
