Incwadzi Yekucala YaSamuweli 8:1-22
8 Ngesikhatsi Samuweli asagugile, wabeka emadvodzana akhe kutsi abe behluleli ka-Israyeli.
2 Libito lendvodzana yakhe yekucala bekunguJoweli, kantsi libito lendvodzana yakhe yesibili bekungu-Abiya;+ bebabehluleli eBherisheba.
3 Kodvwa lamadvodzana akhe bekangahambi etindleleni takhe; bekatifunela lokuzuzisa wona,+ avuma kudizelwa+ futsi angehluleli ngekulunga.+
4 Ngekuhamba kwesikhatsi, onkhe emadvodza lamadzala aka-Israyeli ahlangana ndzawonye ase aya kuSamuweli eRama.
5 Atsi kuye: “Wena sewugugile, kodvwa emadvodzana akho awahambi etinyatselweni takho. Nyalo sale usibekela inkhosi letasehlulela njengato tonkhe leletinye tive.”+
6 Kodvwa Samuweli weva buhlungu* lamadvodza nawatsi: “Sinikete inkhosi letasehlulela.” Ngako wabese uyathantaza kuJehova,
7 futsi Jehova watsi kuye: “Kulalele konkhe loku lokushiwo ngulabantfu, ngobe abali wena kepha bala mine kutsi ngibe yinkhosi yabo.+
8 Benta njengobe bebasolo benta kusukela ngelilanga lengabakhipha ngalo eGibhithe kuze kube ngulamuhla. Bayachubeka nekungishiya+ bakhonte labanye bonkulunkulu+ futsi nguloko labakwentako nakuwe.
9 Balalele. Kodvwa kufanele ubayalisise, ubatjele ngaloko lenkhosi letababusa letawuba nelilungelo lekukufuna kubo.”
10 Ngako onkhe lamavi aJehova Samuweli wawatjela labantfu lebebamcela kutsi ababekele inkhosi.
11 Watsi: “Nguloku lenkhosi letanibusa letawuba nelilungelo lekukufuna:+ Itawutsatsa emadvodzana enu+ iwagibelise etincoleni tayo,+ iwente emasotja lagibela emahhashi,+ lamanye alamadvodzana kutawudzingeka agijime embikwetincola tayo.
12 Itawutibekela tindvuna tetinkhulungwane+ netindvuna temashumi lasihlanu.+ Letinye titayilimela,+ tiyivunele,+ tiyentele tikhali temphi kanye nemathulusi etincola tayo.+
13 Itawuniketa emadvodzakati enu umsebenti wekwakha emafutsa ekugcobisa,* wekupheka newekubhaka.+
14 Itawutsatsa emasimu enu lamahle kunawo onkhe, nemasimu enu emagilebisi, netihlahla tenu temncumo+ futsi ikunike tinceku tayo.
15 Itawutsatsa incenye yinye kuletingu-10 emkhicitweni wemasimu enu alokutinhlavu newemagilebisi ikunike tiphatsimandla tayo netinceku tayo.
16 Itawuphindze itsatse tinceku netincekukati tenu, tinkhomo tenu letincono kakhulu, kanye netimbongolo tenu kuze tisetjentiswe ngiyo.+
17 Itawutsatsa incenye yinye kuletingu-10 emhlambini wenu wetimvu netimbuti+ futsi nitawuba tinceku tayo.
18 Liyeta lilanga lapho nitawukhala khona ngenca yalenkhosi lenitikhetsele yona,+ kodvwa Jehova angeke aniphendvule ngalelolanga.”
19 Nanobe kunjalo, labantfu bala kulalela loko Samuweli labebatjela kona, batsi: “Cha, sitimisele kuba nenkhosi letasibusa.
20 Sitawubese sifana nato tonkhe letinye tive, inkhosi yetfu itasehlulela, isihole futsi ilwe netimphi tetfu.”
21 Ngemuva kwekutsi Samuweli aweve onkhe emavi alabantfu, wabese uwatjela Jehova.
22 Jehova watsi kuSamuweli: “Balalele futsi ubabekele inkhosi letawubabusa.”+ Samuweli wabese utsi kulamadvodza aka-Israyeli: “Ngamunye wenu akabuyele edolobheni lakubo.”
