Incwadzi Yekucala YeTikhronike 10:1-14
-
Kufa kwaSawula nekwemadvodzana akhe (1-14)
10 Ngaleso sikhatsi, emaFilisti bekalwa nema-Israyeli. Emabutfo ema-Israyeli awabalekela emaFilisti, futsi emasotja lamanyenti aka-Israyeli afela eNtsabeni iGilbowa.+
2 EmaFilisti abemhleli etitsendzeni Sawula nemadvodzana akhe, futsi abulala boJonathani, Abinadabi naMalkhi-shuwa,+ emadvodzana aSawula.
3 Lemphi yamshubela Sawula futsi emasotja ladubula ngebutjoki amkhandza amlimata.+
4 Sawula wabese utsi kulelisotja lelimphatsela tikhali: “Hoshula inkemba yakho ungicedzele, kuze lamadvodza langakasoki angeti kutongibulala ngesibhuku.”+ Kodvwa lelisotja lebelimphatsela tikhali belingakatimiseli kukwenta loko ngobe belesaba kakhulu. Ngako, Sawula watsatsa lenkemba watijika etikwayo.+
5 Latsi lelisotja lebelimphatsela tikhali nalibona kutsi Sawula sewufile, nalo latijika etikwenkemba yalo, lafa.
6 Wafa kanjalo-ke Sawula nemadvodzana akhe lamatsatfu, kanye nabo bonkhe bendlu yakhe, bafa kanyekanye.+
7 Batsi bonkhe bantfu baka-Israyeli labasesihosheni* nababona kutsi wonkhe umuntfu sewubalekile nekutsi Sawula nemadvodzana akhe sebafile, bacala kushiya emadolobha abo babaleka; emaFilisti abese ayeta atohlala kuwo.
8 Ngakusasa, ngesikhatsi emaFilisti eta atotsatsa tintfo talabantfu lababulewe, akhandza Sawula nemadvodzana akhe bafile eNtsabeni iGilbowa.+
9 Ngako amkhumula, amjuba inhloko atsatsa netembatfo takhe temphi tekutivikela* ase atfumela livi eveni lonkhe lemaFilisti kute letindzaba tisakatwe etindlini tabonkulunkulu+ bawo nakubantfu.
10 Ngemuva kwaloko, abeka letembatfo taSawula temphi endlini* yabonkulunkulu bawo ase afasela inhloko yakhe endlini yaDagoni.+
11 Ngesikhatsi bonkhe bantfu baseJabeshi+ leseGileyadi beva ngako konkhe loko emaFilisti labekwentile kuSawula,+
12 onkhe emasotja latingwazi ahamba ayolandza sidvumbu saSawula kanye netidvumbu temadvodzana akhe. Aya nato eJabeshi futsi angcwaba ematsambo abo ngephansi kwesihlahla lesikhulu eJabeshi+ ase azila kudla emalanga langu-7.
13 Wafa kanjalo-ke Sawula, ngenca yekungetsembeki kwakhe kuJehova ngobe abengakalilaleli livi laJehova+ futsi waya esangomeni+
14 esikhundleni sekubuta kuJehova. Ngako Nkulunkulu wambulala wase uniketa Davide indvodzana yaJese bukhosi.+