Incwadzi Yekucala YeTikhronike 12:1-40
-
Labasekela bukhosi baDavide (1-40)
12 Lawa bekungemadvodza leta kuDavide eSikilagi+ ngesikhatsi Davide angakhoni kuhamba ngekukhululeka ngenca yaSawula+ indvodzana yaKhishi, futsi lamadvodza bekayincenye yemasotja latingwazi lebekasekela Davide emphini.+
2 Lamadvodza abehlome ngebutjoki futsi akhona kusebentisa sandla sangesekudla nesangesencele+ kute adubulele ematje+ nobe adubule ngebutjoki. Bekavela emndenini wakuboSawula, awesive sakaBhenjamini.+
3 Inhloko yawo bekungu-Ahiyezeri akanye naJowashi, bobabili bebangemadvodzana aShema umGibeya;+ Jeziyeli naPheleti emadvodzana a-Azmavethi,+ Bherakha, Jehu um-Anathothi,
4 Ishmaya wakaGibeyoni+ bekalisotja lelilichawe lebelikanye nalawa langu-30+ futsi bekawaphetse; kanye naJeremiya, Jahaziyeli, Johanani, Jozabadi umGedera,
5 Eluzayi, Jerimothi, Beyaliya, Shemariya, Shefathiya umHarifi,
6 Elkhana, Jishiya, Azareli, Jowezeri naJashobeyamu umKhora;+
7 naJowela naZebadiya emadvodzana aJerohamu waseGedori.
8 Labanye besive sakaGadi baya eluhlangotsini lwaDavide endzaweni yekubhaca lesehlane;+ bebangemasotja latingwazi nalaceceshelwe imphi, bebalungele imphi, baphetse emahawu lamakhulu netikhali letindze, buso babo bebufana nebemabhubesi futsi bebanematubane njengetinyamatane tasetintsabeni.
9 Ingwazi lebeyihamba embili bekungu-Eseri, yesibili kungu-Obadiya, yesitsatfu kungu-Eliyabe,
10 yesine kunguMishmana, yesihlanu kunguJeremiya,
11 yesitfupha kungu-Athayi, yesi-7 kungu-Eliyeli,
12 yesi-8 kunguJohanani, yesi-9 kungu-Elzabadi,
13 yesi-10 kunguJeremiya, yesi-11 kunguMakbanayi.
14 Laba bebabesive sakaGadi,+ batinhloko telibutfo. Lomncane kunabo bonkhe abengancoba labangu-100, lomkhulu ancobe labangu-1 000.+
15 Lawa ngemadvodza lewela iJordane ngenyanga yekucala ngesikhatsi igcwele igola tintsetse futsi acosha bonkhe bantfu lebebahlala etindzaweni letibekile, ngasemphumalanga nangasenshonalanga.
16 Lamanye emadvodza esive sakaBhenjamini nesakaJuda eta kuDavide, endzaweni yakhe yekubhaca.+
17 Davide wabese uyaphuma uya kuwo wafike watsi: “Nangabe nite ngekuthula kuze ningisite, inhlitiyo yami itawuba munye nani. Kodvwa nangabe nite kutongitsengisa etitseni tami kantsi tandla tami atikenti lutfo lolubi, shengatsi Nkulunkulu wabokhokho betfu angakubona loko futsi ehlulele.”+
18 Umoya wabese uyefika* ku-Amasayi,+ indvuna yemasotja langu-30, Amasayi wase utsi:
“Awu Davide, sibakho futsi sinawe, wena ndvodzana yaJese.+
Kuthula, kuthula akube nawe futsi kuthula akube naloyo lokusitako,Ngobe Nkulunkulu wakho uyakusita.”+
Ngako Davide wabemukela futsi wababeka kutsi babe tindvuna temasotja.
19 Lamanye emasotja lebekavela esiveni sakaManase nawo ashiya libutfo laSawula atihlanganisa naDavide ngesikhatsi yena ahamba nemaFilisti nakayokulwa naSawula; kodvwa Davide akazange awasite emaFilisti ngobe ngemuva kwekubonisana, babusi bemaFilisti+ bamhambisa batsi: “Utawubuyela enkhosini yakhe Sawula futsi tsine sitawubulawa.”+
20 Ngesikhatsi Davide aya eSikilagi,+ laba labalandzelako batihlanganisa naye, bavela esiveni sakaManase: Adna, Jozabadi, Jediyayeli, Mikhayeli, Jozabadi, Elihu naSilethayi, bebatinhloko temasotja latinkhulungwane akaManase.+
21 Basita Davide nakalwa nelibutfo lelihlaselako ngobe bonkhe bebatingwazi, bangemadvodza lanesibindzi+ futsi baba tindvuna ebutfweni lemphi.
22 Lilanga nelilanga, bantfu bebachubeka beta kuDavide+ kuze bamsite kwaze kwaba ngulapho lelibutfo liba likhulu ngangelibutfo laNkulunkulu.+
23 Leli linani letindvuna talabo lebebahlomele imphi labefika kuDavide eHebroni+ kuze batsatse bukhosi baSawula babunike Davide, njengobe Jehova bekakhulumile.+
24 Emadvodza akaJuda lebekaphetse emahawu lamakhulu netikhali letindze bekangu-6 800, ahlomele imphi.
25 Emadvodza elibutfo esive sakaSimeyoni langemachawe lanemandla nalanesibindzi bekangu-7 100.
26 Esiveni sakaLevi bekangu-4 600.
27 Jehoyada+ bekangumholi wemadvodzana a-Aroni+ futsi abekanye nemasotja langu-3 700,
28 naSadoki+ lijaha lelilichawe nalelinesibindzi, kanye netindvuna letingu-22 letivela emndenini wakubo.
29 Esiveni sakaBhenjamini, banakaboSawula,+ bekunemasotja langu-3 000, linani lelikhulu lawo belike labuka tindzaba tekugadvwa kwendlu yaSawula.
30 Esiveni saka-Efrayimu bekunemadvodza latingwazi, nalanesibindzi langu-20 800 lebekadvumile emindenini yakubo.
31 Ehhafini yesive sakaManase bekunalangu-18 000 lebekabitwe ngemagama kuze ayobeka Davide abe yinkhosi.
32 Esiveni saka-Isakhari, labo lebebatati kahle tikhatsi naloko lebekufanele kwentiwe ngema-Israyeli, bekutindvuna tawo letingu-200 futsi bonkhe bomnakabo bebangephansi kwato.
33 Esiveni sakaZebuloni bekunalangu-50 000 lebekangaba yincenye yelibutfo, abelungele imphi aphetse tikhali temphi, onkhe atihlanganisa naDavide ngekwetsembeka lokukhulu.*
34 Esiveni sakaNaftali bekunetindvuna temasotja letingu-1 000 futsi betikanye nalangu-37 000 labekaphatsa emahawu lamakhulu netikhali letindze.
35 Esiveni sakaDani lawo lebekalungele imphi bekangu-28 600.
36 Esiveni saka-Asheri labo lebebangakhona kuba sebutfweni kuze bakulungele kulwa imphi, bebangu-40 000.
37 Ngesheya kweJordane,+ esiveni sakaRubeni, sakaGadi kanye nasehhafini yesive sakaManase bekunemasotja langu-120 000 lebekaphetse tonkhe tinhlobo tetikhali temphi.
38 Onkhe lawa bekungemadvodza emphi, labekashaya lilayini njengemasotja lalungele kulwa; onkhe eta eHebroni ngenhlitiyo lephelele kutokwenta Davide inkhosi yawo onkhe ema-Israyeli futsi onkhe lamanye ema-Israyeli bekamunye afuna* kubeka Davide kutsi abe yinkhosi.+
39 Bahlala lapho naDavide emalanga lamatsatfu, badla futsi banatsa ngobe bomnakabo bebabalungiselele.
40 Nalabo lebebasedvute nabo nalabo lebebakhashane, kuze kuyofika ka-Isakhari, kaZebuloni nakaNaftali bebaletsa kudla ngetimbongolo, ngemakamela, ngeminyuzi nangetinkhomo, babaletsela fulaha, emacebelengwane emakhiwa lomisiwe newemagilebisi lomisiwe, liwayini, emafutsa, tinkhomo netimvu letinyenti kakhulu, ngobe bekujatjulwe kakhulu ka-Israyeli.
Imibhalo lengentansi
^ NgesiHebheru kutsi, “wawembatsa.”
^ Nobe “bonkhe labo labatihlanganisa naDavide, inhlitiyo yabo beyingakehlukani ekhatsi.”
^ NgesiHebheru kutsi, “abenenhlitiyo yinye.”
