Incwadzi Yekucala YeTikhronike 13:1-14
13 Davide wabonisana netindvuna tetinkhulungwane netindvuna temakhulu kanye nabo bonkhe labanye baholi.+
2 Davide wabese ukhuluma naso sonkhe sive saka-Israyeli watsi: “Nangabe nikubona kukahle futsi kwemukeleka kuJehova Nkulunkulu wetfu, asitfumeleni livi kuyobitwa lalabanye banaketfu kuto tonkhe tifundza taka-Israyeli, kubitwe nebaphristi kanye nemaLevi emadolobheni+ abo lanemadlelo kutsi bete batoba kanye natsi.
3 Asibuyiseni Libhokisi+ laNkulunkulu wetfu.” Ngobe bebangalinaki ngetikhatsi taSawula.+
4 Sonkhe lesive savuma kukwenta loko ngobe bekungumcondvo lokahle kuso.
5 Ngako Davide wahlanganisa onkhe ema-Israyeli, kusukela emfuleni* waseGibhithe kuze kuyofika eLebo-hamathi,*+ kute abuyise Libhokisi laNkulunkulu weliciniso, esuka nalo eKhiriyathi-jeyarimu.+
6 Davide kanye nawo onkhe ema-Israyeli bakhuphukela eBhala,+ eKhiriyathi-jeyarimu yakaJuda, kute balilandze khona leLibhokisi laNkulunkulu weliciniso, Jehova, lohlala esihlalweni sebukhosi ngetulu kwemakherubhi,*+ lapho libito lakhe libitwa khona.
7 Kodvwa balayisha leLibhokisi laNkulunkulu weliciniso encoleni lensha,+ balitsatsa endlini ya-Abinadabi, futsi lencola beyiholwa bo-Uza na-Ahiyo.+
8 Davide kanye nawo onkhe ema-Israyeli bebajabulile bagidza embikwaNkulunkulu weliciniso ngalomkhulu umdlandla, bahlabela tingoma, bashaya emahabhu, bashaya letinye tinsimbi temculo letinetintsambo, emathamborini,+ emasimbali+ kanye nemacilongo.+
9 Kodvwa batsi nabefika ebaleni lekubhulela laKhidoni, Uza welula sandla sakhe wabamba leLibhokisi ngobe tinkhomo tacishe taliwisa.
10 Nakwenteka loko, intfukutselo yaJehova yamvutsela Uza futsi wamshaya phansi ngobe bekelulele sandla sakhe kuleLibhokisi.+ Uza wafa khona lapho, embikwaNkulunkulu.+
11 Davide watfukutsela ngenca yekutsi intfukutselo yaJehova beyivutsele Uza; futsi leyo ndzawo ibitwa ngekutsi yiPheresi-uza* kuze kube ngulamuhla.
12 Ngako Davide wamesaba kakhulu Nkulunkulu weliciniso ngalelolanga, futsi watsi: “Ngingaliletsa njani leLibhokisi laNkulunkulu weliciniso lapho ngihlala khona?”+
13 Davide akazange aliletse leLibhokisi lapho bekahlala khona eDolobheni laDavide kodvwa watsi aliyiswe endlini ya-Obedi-edomu, umGathi.
14 Libhokisi laNkulunkulu weliciniso belisendlini ya-Obedi-edomu, lahlala khona tinyanga letintsatfu futsi Jehova bekasolo ayibusisa lendlu ya-Obedi-edomu kanye nako konkhe lanako.+
Imibhalo lengentansi
^ Nobe “kusukela eShiho.”
^ Nobe “ekungeneni kweHamathi.”
^ Kungaphindze kubekwe ngekutsi, “emkhatsini wemakherubhi.”
^ Lokusho kutsi “Kwephula Umtsetfo Kwa-Uza.”
