Incwadzi Yekucala YeTikhronike 14:1-17
14 INkhosi Hiramu+ yaseThire yatfumela titfunywa kuDavide netingodvo temsedari, nebabati besigodvo nebacoti bematje* kute bamakhele indlu.*+
2 Davide bekati kutsi nguJehova lombeke wasimama kuze abe yinkhosi ka-Israyeli,+ ngobe bukhosi bakhe bebuphakanyiswe kakhulu ngenca yebantfu baNkulunkulu ema-Israyeli.+
3 Davide watsatsa labanye bafati+ eJerusalema futsi watala lamanye emadvodzana nemadvodzakati.+
4 Nankha emagama ebantfwana latalelwa bona nakaseJerusalema:+ Shamuwa, Shobabi, Nathani,+ Solomoni,+
5 Jibhari, Elishuwa, Elpeleti,
6 Noga, Nefegi, Jafiya,
7 Elishama, Bheliyada na-Elifeleti.
8 Ngesikhatsi emaFilisti eva kutsi Davide sewugcotjiwe kutsi abe yinkhosi yawo onkhe ema-Israyeli,+ onkhe emaFilisti akhuphuka ayomfuna.+ Watsi Davide nakakuva loko, waphuma wayokulwa nawo.
9 EmaFilisti abese ayeta futsi achubeka nekuhlasela Sihosha* semaRefa.+
10 Davide wabuta Nkulunkulu watsi: “Ngikhuphuke yini kuyolwa nemaFilisti? Utawanikela yini esandleni sami? Jehova watsi kuye: “Khuphuka, nakanjani ngitawanikela esandleni sakho.”+
11 Ngako Davide wakhuphukela eBhali-pherasimu+ wawancobela lapho emaFilisti. Davide wase utsi: “Nkulunkulu weliciniso utincobile titsa tami ngesandla sami njengelubondza loluwiswe ngemanti.” Kungako babita leyo ndzawo ngekutsi yiBhali-pherasimu.*
12 EmaFilisti alahla tithico tawo lapho futsi Davide wakhipha umyalo wekutsi labonkulunkulu bashiswe ngemlilo.+
13 Ngekuhamba kwesikhatsi, emaFilisti aphindze akhuphuka ayohlasela kulesihosha.*+
14 Davide waphindze wabuta Nkulunkulu, kodvwa Nkulunkulu weliciniso watsi kuye: “Ungakhuphuki ubalandzele. Esikhundleni saloko, gega ngasemuva kwabo futsi uchamukele kubo embikwemahlatsi ebhakha.*+
15 Ubotsi nawuva umsindvo etulu kulamahlatsi ebhakha lofana nemsindvo wekushuca kwebantfu, uvele uhlasele, ngobe Nkulunkulu weliciniso utawube akuhambele embili kute abulale libutfo lemaFilisti.”+
16 Ngako Davide wenta njengobe Nkulunkulu weliciniso abemyalile,+ futsi babulala lelibutfo lemaFilisti kusukela eGeba kuyofika eGezeri.+
17 Ludvumo lwaDavide lwasakateka kuwo onkhe emave futsi Jehova wenta kutsi tonkhe tive timesabe Davide.+
Imibhalo lengentansi
^ Nobe “bakhi belubondza.”
^ Nobe “sigodlo.”
^ Nobe “liTsafa.”
^ Lokusho kutsi “Ingcweti Yekuncoba.”
^ Nobe “kulelitsafa.”
^ Leligama lelitsi ‘bhakha’ lisukela egameni lesiHebheru lelisho ‘kukhala.’ Akwatiwa kahle kutsi lesihlahla sinjani.
