Incwadzi Yekucala YeTikhronike 21:1-30
21 Sathane* wabese umelana nema-Israyeli futsi wabangela Davide kutsi awabale.+
2 Ngako Davide watsi kuJowabe+ nasetindvuneni tebantfu: “Hambani niyobala ema-Israyeli kusukela eBherisheba kuya kaDani;+ bese nibuyisa umbiko kimi ngitowati kutsi mangakhi.”
3 Kodvwa Jowabe watsi: “Shengatsi Jehova angandzisa bantfu bakhe tikhatsi letiphindvwe kangu-100! Nkhosi yami, bonkhe labantfu abasito yini tinceku tenkhosi yami? Inkhosi yami ifunelani kwenta loku? Kungani ifuna kubangela ema-Israyeli kutsi ative anelicala?”
4 Kodvwa livi lenkhosi ngilo lelevakala kunelaJowabe. Ngako Jowabe waphuma walihamba lonkhe laka-Israyeli, ngemuva kwaloko wabuyela eJerusalema.+
5 Jowabe wabese uniketa Davide linani lalabantfu lababhalisiwe. Lonkhe laka-Israyeli belinemadvodza langu-1 100 000 lahlome ngetinkemba, lakaJuda lona belinalangu-470 000 lahlome ngetinkemba.+
6 Kodvwa emaLevi nebakaBhenjamini abazange babhaliswe kanye nalalabanye+ ngobe livi lenkhosi belenyanyeka kuJowabe.+
7 Loku kwaba kubi kakhulu kuNkulunkulu weliciniso, ngako wawajezisa ema-Israyeli.
8 Davide wabese utsi kuNkulunkulu weliciniso: “Ngone+ kakhulu ngekutsi ngente loku. Ngicela nyalo ucolele inceku yakho ngeliphutsa lelentile,+ ngoba ngente bulima lobukhulu.”+
9 Jehova wabese ukhuluma naGadi,+ umboni wemibono waDavide, watsi:
10 “Hamba uye kuDavide ufike utsi: ‘Naku lokushiwo nguJehova: “Ngikuniketa tintfo letintsatfu longakhetsa kuto. Khetsa kunye kuze ngikuletsele kona.”’”
11 Ngako Gadi waya kuDavide wafike watsi: “Naku lokushiwo nguJehova: ‘Khetsa
12 kutsi ufuna kube neminyaka lemitsatfu yesomiso,+ nobe tinyanga letintsatfu tekutsi nicotfulwe titsa tenu ngesikhatsi lesifanako inkemba yetitsa tenu ibe inicotfula,+ nobe ukhetse emalanga lamatsatfu enkemba yaJehova, lokusifo lesibulalako eveni,+—ingilosi yaJehova iletse imbhubhiso+ kuyo yonkhe indzawo yaka-Israyeli.’ Yicabangisise imphendvulo lekufanele ngiyibuyisele kuLoyo longitfumile.”
13 Ngako Davide watsi kuGadi: “Lendzaba ingicindzetela kakhulu. Ngicela kutsi ngimane ngiwele esandleni saJehova ngobe umusa wakhe mkhulu kakhulu;+ kodvwa ungangivumeli kutsi ngiwele esandleni semuntfu.”+
14 Ngemuva kwaloko, Jehova watfumela sifo lesibulalako+ ka-Israyeli kangangekutsi kwafa bantfu labangu-70 000 baka-Israyeli.+
15 Ngetulu kwaloko, Nkulunkulu weliciniso watfumela ingilosi kutsi iyobhubhisa iJerusalema; kodvwa yatsi naseyitoyibhubhisa, Jehova wakubona loko futsi watisola* ngenca yalenhlekelele,+ wase utsi kulengilosi lebeyitawuletsa lembhubhiso: “Sekwenele!+ Nyalo sale wehlisa sandla sakho.” Lengilosi yaJehova beyime edvutane nasebaleni lekubhulela la-Onani*+ umJebhusi.+
16 Watsi Davide nakaphakamisa emehlo, wabona ingilosi yaJehova ime emkhatsini wemhlaba nemazulu ihoshule inkemba+ yayo iyelulele ngaseJerusalema. Davide kanye nemadvodza lamadzala batimbonya ngetindvwangu temasaka,+ futsi ngekushesha bawa phansi ngebuso batsintsa umhlabatsi.+
17 Davide watsi kuNkulunkulu weliciniso: “Akusimi yini lotsite akubalwe labantfu? Ngimi lowonile futsi ngimi lowente lokubi;+ kodvwa letimvu tona tenteni? Awu Jehova Nkulunkulu wami, ngicela sandla sakho simelane nami nendlu yababe; kodvwa ungasiletsi lesishayo kubantfu bakho.”+
18 Ingilosi yaJehova yase itjela Gadi+ kutsi atjele Davide akhuphuke ayokwakha li-al’thare laJehova ebaleni lekubhulela la-Onani umJebhusi.+
19 Ngako Davide wakhuphuka nakeva loko lobekushiwo nguGadi, lebekakukhulume asetjentiswa nguJehova.
20 Ngesikhatsi lesifanako, Onani wagucuka wabona lengilosi, futsi emadvodzana akhe lamane labekanaye atifihla. Ngaleso sikhatsi Onani bekabhula kolo.
21 Watsi Davide nakakhuphukela ku-Onani, Onani wambona wase usuka ngekushesha kulelibala lekubhulela waya kuDavide wafike waguca embikwakhe buso bakhe batsintsa phansi.
22 Davide watsi ku-Onani: “Ngitsengisele* lendzawo yelibala lekubhulela, kuze ngakhe kuyo li-al’thare laJehova. Ngitsengisele ngelinani leliphelele kuze lesishayo lesehlele labantfu sincamuke.”+
23 Kodvwa Onani watsi kuDavide: “Yitsatse ibe yakho futsi inkhosi yami ayente lekubona kukuhle kuyo.* Ngikunika netinkhomo temnikelo wekushiswa nesihliphi sekubhula+ kute ubase ngetinkhuni taso, kanye nakolo kutsi ube ngumnikelo walokutinhlavu. Ngikuniketa konkhe.”
24 Kodvwa iNkhosi Davide yatsi ku-Onani: “Cha, kufanele ngiyitsenge ngelinani leliphelele ngobe angeke ngitsatse tintfo takho bese ngitinika Jehova nobe ngente imihlatjelo yekushiswa lengingakayitsengi.”+
25 Ngako Davide waniketa Onani emashekeli* eligolide langu-600 alelibala.
26 Davide wabese wakhela Jehova li-al’thare+ lapho futsi wenta imihlatjelo yekushiswa neyekuthula wase ubita Jehova lowamphendvula ngemlilo+ lovela emazulwini wehlela etikweli-al’thare lemnikelo wekushiswa.
27 Jehova wabese uyala lengilosi+ kutsi ibuyisele inkemba yayo esikhwameni sayo.
28 Ngaleso sikhatsi, Davide nakabona kutsi Jehova sewumphendvulile ebaleni lekubhulela la-Onani umJebhusi, wachubeka enta umhlatjelo lapho.
29 Nobe kunjalo, lithende lekukhontela laJehova lelakhiwa nguMosi ehlane kanye neli-al’thare lemnikelo wekushiswa, ngaleso sikhatsi bekusendzaweni lephakeme leseGibeyoni.+
30 Kodvwa Davide bekasolo angakakhoni kuya kulo kuze abute Nkulunkulu ngobe bekesaba ngenca yenkemba yengilosi yaJehova.
Imibhalo lengentansi
^ Kungaphindze kubekwe ngekutsi, “Umphikisi.”
^ Kutsiwa ngu-Arawuna ku-2 Sa 24:16.
^ Nobe “weva buhlungu.”
^ NgesiHebheru kutsi, “Nginike.”
^ NgesiHebheru kutsi, “lokuhle emehlweni ayo.”
^ Lishekeli belilingana nemagremu langu-11.4. Fundza Sandzisanchazo B14.
