Incwadzi Yekucala YeTikhronike 29:1-30
29 INkhosi Davide yabese itsi kuso sonkhe lesive: “Indvodzana yami Solomoni, leyo Nkulunkulu layikhetsile,+ iseyincane futsi isete lwati lwetintfo+ kantsi lomsebenti mkhulu, ngobe akusilo nje lithempeli* lemuntfu kodvwa lithempeli laJehova Nkulunkulu.+
2 Ngente konkhe lokusemandleni ami kuze ngilungiselele kwakhiwa kwalendlu yaNkulunkulu wami. Ngilungiselele ligolide letintfo letitakwentiwa ngeligolide, lisiliva letintfo letitakwentiwa ngelisiliva, litfusi letintfo letitakwentiwa ngelitfusi, insimbi yetintfo letitakwentiwa ngensimbi,+ tingodvo+ tetintfo letitakwentiwa ngesigodvo, ematje e-oniksi, ematje lalungiswe kahle, ematje ekuhlobisa, nawo onkhe ematje laligugu kanye nematje e-alabhaste, konkhe ngikulungiselele kwaba kunyenti.
3 Ngetulu kwaloko, ngenca yenjabulo lenginayo ngalendlu yaNkulunkulu wami,+ nginikela ngemcebo wami+ lofaka ekhatsi ligolide nelisiliva, ngikunikela endlini yaNkulunkulu wami, kwengeta kuko konkhe loku lengikulungiselele lendlu lengcwele,
4 lokufaka ekhatsi emathalenta* langu-3 000 eligolide lase-Ofiri+ kanye nemathalenta langu-7 000 elisiliva lelicwengekile lekuhuca lubondza lwetindlu,
5 ligolide letintfo letitakwentiwa ngeligolide, nelisiliva letintfo letitakwentiwa ngelisiliva, kanye netintfo tawo wonkhe umsebenti lotakwentiwa bantfu labanelikhono. Ngubani-ke manje lofisa kunikela kuJehova ngekutitsandzela lamuhla?”+
6 Ngako tinhloko temindeni, baholi betive taka-Israyeli, tindvuna tetinkhulungwane netemakhulu+ kanye netindvuna lebetibuke tindzaba tenkhosi,+ banikela ngekutitsandzela.
7 Banikelela umsebenti wendlu yaNkulunkulu weliciniso ngeligolide lelingemathalenta langu-5 000, tinhlavu temali teligolide* letingu-10 000, lisiliva lelingemathalenta langu-10 000, litfusi lelingemathalenta langu-18 000 kanye nensimbi lengemathalenta langu-100 000.
8 Wonkhe umuntfu lobekanematje laligugu wawaletsa labekuhlala khona umcebo endlini yaJehova, lobewunakekelwa nguJehiyeli+ umGeshoni.+
9 Bantfu bajabula nabenta leminikelo ngobe bebentela Jehova iminikelo ngenhlitiyo levumako,+ ngisho nenkhosi Davide yajabula kakhulu.
10 Davide wabese udvumisa Jehova embikwaso sonkhe lesive, watsi: “Awu Jehova Nkulunkulu wababe wetfu Israyeli, shengatsi ungadvunyiswa kuze kube phakadze.
11 Awu Jehova, bukhulu,+ nemandla,+ nebuhle nenkhatimulo, nebukhosi*+ ngekwakho ngobe konkhe lokusemazulwini nasemhlabeni kwakho.+ Umbuso ngewakho, awu Jehova.+ Wena uphakeme futsi wengamele konkhe.
12 Umcebo kanye neludvumo kuvela kuwe,+ futsi wena ubusa konkhe.+ Unemandla+ lamakhulu+ futsi sandla sakho siyaphakamisana+ siphindze sinikete emandla kubo bonkhe bantfu.+
13 Nyalo, awu Nkulunkulu wetfu, siyakubonga futsi siyalidvumisa libito lakho lelihle.
14 “Bengiyini nje mine kanye nebantfu bami kutsi besingakhona kwenta leminikelo lesuka enhlitiyweni ngalendlela? Ngobe konkhe kuvela kuwe futsi sikunikete loko lokuvela esandleni sakho matfupha.
15 Ngobe tsine sitihambi nebafokati embikwakho, njengobe bebanjalo bokhokho betfu.+ Emalanga etfu lapha emhlabeni afana nesitfunti,+ kute litsemba.
16 Awu Jehova Nkulunkulu wetfu, wonkhe lomcebo lesiwulungiselele kute wakhelwe indlu letawubitwa ngelibito lakho lelingcwele, uvela kuwe futsi ngewakho.
17 Awu Nkulunkulu wami, ngati kahle kutsi wena uhlola inhlitiyo+ futsi uyajabula ngebucotfo bemuntfu.+ Ngekwetsembeka* kwenhlitiyo yami, nginikele tonkhe letintfo ngenhlitiyo levumako futsi ngijabula kakhulu ngekubona labantfu bakho labalapha bakwentela iminikelo ngenhlitiyo levumako.
18 Awu Jehova Nkulunkulu wa-Abrahama, wa-Isaka, newa-Israyeli, lokubokhokho betfu, shengatsi ungenta labantfu bakho bahlale banjena, nemicabango yabo ingashintji kuze kube phakadze futsi shengatsi tinhlitiyo tabo bangaticondzisa kuwe.+
19 Indvodzana yami Solomoni yinikete inhlitiyo lephelele*+ kute igcine imitsetfo yakho,+ tikhumbuto takho kanye netimiso takho, bese yenta tonkhe letintfo iphindze yakhe lelithempeli* lengilentele lamalungiselelo.”+
20 Davide wabese utsi kuso sonkhe lesive: “Nyalo, dvumisani Jehova Nkulunkulu wenu.” Sonkhe lesive sabese sidvumisa Jehova Nkulunkulu wabokhokho baso, saphindze saguca, sakhotsamela Jehova nenkhosi.
21 Sachubeka nekunikela kuJehova nekwentela Jehova imihlatjelo yekushiswa+ ngakusasa, sanikela ngetinkunzana letingu-1 000, timvu letindvuna letingu-1 000, emazinyane etimvu lamadvuna langu-1 000 kanye neminikelo yalokunatfwako+ lehambisana nako; sanikelela onkhe ema-Israyeli imihlatjelo leminyenti kakhulu.+
22 Sachubeka nekudla nekunatsa embikwaJehova ngalelolanga, futsi besijabule kakhulu.+ Sabese sigcoba Solomoni indvodzana yaDavide kwesibili kutsi abe yinkhosi futsi samgcoba embikwaJehova kutsi abe ngumholi,+ Sadoki samenta umphristi.+
23 Solomoni wahlala esihlalweni sebukhosi saJehova+ waba yinkhosi esikhundleni sababe wakhe Davide futsi bekaphumelela. Onkhe ema-Israyeli bekamhlonipha.
24 Tonkhe tindvuna,+ emasotja latingwazi+ kanye nawo onkhe emadvodzana eNkhosi Davide,+ batitfoba enkhosini Solomoni.
25 Jehova wenta Solomoni waba mkhulu kakhulu emehlweni awo onkhe ema-Israyeli futsi wenta bukhosi bakhe baba bukhulu kangangekutsi kute inkhosi ka-Israyeli lebeyike yaba njengaye.+
26 Davide indvodzana yaJese wabusa kanjalo-ke kulo lonkhe laka-Israyeli,
27 futsi budze* besikhatsi sekubusa kwakhe ka-Israyeli kwaba yiminyaka lengu-40. EHebroni wabusa iminyaka lengu-7,+ kantsi eJerusalema wabusa lengu-33.+
28 Wafa asaphile iminyaka leminyenti,+ asanetiswe yimphilo lendze,* ngumcebo kanye neludvumo; futsi indvodzana yakhe Solomoni yaba yinkhosi ngemuva kwakhe.+
29 Umlandvo weNkhosi Davide, kusukela ekucaleni kuze kube sekugcineni, ubhaliwe emavini aSamuweli umboni wemibono, aNathani+ umphrofethi, newaGadi+ umboni wemibono.
30 Lomlandvo ufaka ekhatsi bonkhe bukhosi bakhe, emandla akhe, tintfo letenteka kuye nakuma-Israyeli kanye nemibuso lebomakhelwane.
Imibhalo lengentansi
^ Nobe “indzawo yekuphephela; sigodlo.”
^ Lithalenta belilingana nemakhilogremu langu-34.2. Fundza Sandzisanchazo B14.
^ Leti bekutinhlavu temali tasePheresiya lokutsiwa yidarikhi. Fundza Sandzisanchazo B14.
^ Nobe “nesitfunti.”
^ Nobe “Ngebumsulwa.”
^ Nobe “letinikele ngalokuphelele.”
^ Nobe “indzawo yekuphephela; sigodlo.”
^ NgesiHebheru kutsi, “emalanga.”
^ NgesiHebheru kutsi, “emalanga.”
