Incwadzi Yesibili YaPhetro 3:1-18
3 Bazalwane labatsandzekako, lena yincwadzi yesibili lenginibhalela yona, futsi njengakuleyekucala ngivuselela likhono lenu lekucabanga kahle ngekutsi nginikhumbute,+
2 kuze nikhumbule emavi lebekashiwo* baphrofethi labangcwele, kanye nemyalo weNkhosi neMsindzisi leniwutjelwa baphostoli benu.
3 Kwekucala, nibowati kutsi emalangeni ekugcina kutawufika baphukuti nekuphukuta kwabo, bente ngekuvumelana netifiso tabo,+
4 futsi batawutsi: “Kuphi lokuba khona kwakhe lokwetsenjiswa?+ Ngobe kusukela ngesikhatsi bokhokho betfu labafa* ngaso, tonkhe tintfo tisachubeka njengobe betinjalo ekucaleni kwendalo.”+
5 Abalinaki ngemabomu liciniso lekutsi endvulo bekakhona emazulu, nekutsi ngelivi laNkulunkulu umhlaba waphuma uvela emantini, waphindze waba semkhatsini wemanti;+
6 ngaleyo ndlela live langaleso sikhatsi labhujiswa nalimbonywa ngemanti.+
7 Ngalona lelo livi, emazulu nemhlaba lokukhona nyalo kugcinelwe umlilo, futsi kutawugcinwa kuze kufike lilanga lekwehlulelwa nelekubhujiswa kwebantfu labangamesabi Nkulunkulu.+
8 Bazalwane labatsandzekako, ningakhohlwa kutsi kuJehova* lilanga linye lifana neminyaka leyinkhulungwane, neminyaka leyinkhulungwane ifana nelilanga linye.+
9 Jehova* akephuti macondzana nesetsembiso sakhe+ njengobe labanye bacabanga kanjalo, kodvwa uyanibeketelela ngobe akafisi kutsi kubhubhe ngisho namunye, kepha ufisa kutsi bonkhe bantfu baphendvuke.+
10 Nanobe kunjalo, lilanga laJehova*+ litawufika njengelisela,+ futsi ngalo emazulu atawendlula+ ngemsindvo lomkhulu,* kodvwa tintfo letisezulwini nasemhlabeni titawuncibilika njengobe titawube tishisa kakhulu, nemhlaba kanye nemisebenti lekuwo kutawembulwa.+
11 Njengobe tonkhe letintfo titawuncibilika ngalendlela, cabangani kutsi kufanele nibe luhlobo luni lwebantfu! Kufanele kutiphatsa kwenu kube ngcwele futsi nikhombise kutsi nitinikele kuNkulunkulu,
12 nilindze futsi nihlale nikukhumbula* kuba khona kwelilanga laJehova,*+ lokutawutsi ngalo, emazulu abhujiswe+ ngemalangabi, netintfo letisezulwini nasemhlabeni tincibilikiswe kushisa lokukhulu.
13 Kodvwa ngesetsembiso sakhe, silindzele emazulu lamasha nemhlaba lomusha,+ futsi kuko kutawuba nekulunga.+
14 Ngako-ke bazalwane labatsandzekako, njengobe nilindzele letintfo, yentani konkhe lokusemandleni enu kuze ekugcineni anitfole ningenasici, ningasoleki futsi ninekuthula.+
15 Ngetulu kwaloko, kubeketela kweNkhosi yetfu kutsatseni njengensindziso, njengobe nje naPawula umzalwane wetfu lotsandzekako anibhalela ngekuhlakanipha lanikwa kona,+
16 wakhuluma ngaletintfo njengobe enta kuto tonkhe tincwadzi takhe. Letinye taletintfo kumatima kuticondza, futsi bantfu labangati* nalababutsakatsaka bayatisontsa njengobe nje benta kuleminye imiBhalo, lokuholela ekubhujisweni kwabo.
17 Njengobe seninalolwati bazalwane labatsandzekako, caphelani kutsi ningadukiswa kanye nabo ngemfundziso lengemanga yebantfu labephula umtsetfo, bese nehluleka kuhlala nicinile.*+
18 Kodvwa chubekani nitfola umusa lomkhulu waNkulunkulu futsi nichubeke nifundza ngeNkhosi neMsindzisi wetfu Jesu Khristu. Kuye akube yinkhatimulo nyalo naphakadze. Amen.
Imibhalo lengentansi
^ Nobe “laphrofethwa.”
^ NgesiGriki kutsi, “labalala ekufeni.”
^ Fundza Sandzisanchazo A5.
^ Fundza Sandzisanchazo A5.
^ Nobe “losheshako.”
^ Fundza Sandzisanchazo A5.
^ Nobe “nikulangatelela.” NgesiGriki kutsi, “nikusheshisa.”
^ Fundza Sandzisanchazo A5.
^ Nobe “labangakafundziswa.”
^ Nobe “nisimile.”
