Incwadzi Yesibili YaSamuweli 2:1-32
2 Ngemuva kwaloko Davide wabuta Jehova+ watsi: “Ngikhuphukele yini kulelinye lemadolobha akaJuda?” Jehova wamphendvula watsi: “Khuphuka.” Davide wase utsi: “Ngiye kuliphi?” Yena watsi: “EHebroni.”+
2 Ngako Davide wakhuphukela lapho ahamba nebafati bakhe lababili, bo-Ahinowami+ umJezreyeli kanye na-Abigayili+ umfelokati waNabali umKhameli.
3 Davide waphindze wahamba nemadvodza labekanye nawo+ kanye nemindeni yawo, futsi bahlala emadolobheni lasedvute neHebroni.
4 Ngemuva kwaloko emadvodza akaJuda efika futsi agcoba Davide lapho, waba yinkhosi yendlu yakaJuda.+
Atsi kuDavide: “Emadvodza aseJabeshi-gileyadi ngiwo langcwabe Sawula.”
5 Ngako Davide watfumela titfunywa emadvodzeni aseJabeshi-gileyadi watsi kuwo: “Shengatsi Jehova anganibusisa ngobe nibonise lutsandvo enkhosini yenu Sawula, ngekutsi niyingcwabe.+
6 Shengatsi Jehova anganiphatsa ngelutsandvo nangekwetsembeka. Nami ngitanikhombisa umusa ngenca yaloku lenikwentile.+
7 Cinani madvodza, nibe nesibindzi ngobe inkhosi yenu Sawula seyifile futsi indlu yakaJuda seyigcobe mine kutsi ngibe yinkhosi kuyo.”
8 Kodvwa Abneri+ indvodzana yaNeri, loyindvuna yelibutfo laSawula watsatsa indvodzana yaSawula, Ishboshethi+ wayiyisa eMahanayimu+
9 futsi wayibeka kutsi ibe yinkhosi eGileyadi,+ kuma-Ashuri, eJezreyeli,+ ka-Efrayimu,+ kaBhenjamini nakulo lonkhe laka-Israyeli.
10 Ishboshethi, indvodzana yaSawula, bekaneminyaka lengu-40 nakaba yinkhosi ka-Israyeli futsi wabusa iminyaka lemibili. Nome kunjalo, indlu yakaJuda yasekela Davide.+
11 Davide wabusa indlu yakaJuda eHebroni, iminyaka lengu-7 netinyanga letisitfupha.+
12 Ngekuhamba kwesikhatsi, Abneri indvodzana yaNeri kanye netinceku ta-Ishboshethi, indvodzana yaSawula, baphuma eMahanayimu+ baya eGibeyoni.+
13 Jowabe+ indvodzana yaSeruya+ kanye netinceku taDavide, nabo baphuma bahlangana nabo-Abneri netinceku ta-Ishboshethi echibini lakaGibeyoni; lelinye licembu lahlala ngala kwalelichibi kantsi lelinye lahlala ngesheya kwalo.
14 Ekugcineni, Abneri watsi kuJowabe: “Lamajaha awasukume alwe lambikwetfu.” Jowabe watsi: “Vele akasukume.”
15 Ngako, basukuma babalwa base bewelela ngesheya, labangu-12 bebabakaBhenjamini nendvodzana yaSawula Ishboshethi kanye nalabangu-12 labatinceku taDavide.
16 Babambana ngetihlutfu, nguloyo naloyo wagalela ngenkemba yakhe kuloyo lebekacondzene naye futsi bafa bonkhe. Ngako leyo ndzawo leseGibeyoni yase ibitwa ngekutsi yiHelkathi-hasurimu.
17 Imphi leyalandzela emva kwaloko ngalona lelolanga, yayesabeka kakhulu futsi Abneri kanye nemadvodza aka-Israyeli bagcine behlulwe tinceku taDavide.
18 Emadvodzana aSeruya+ lamatsatfu boJowabe,+ Abishayi,+ na-Asaheli+ nawo abekhona futsi Asaheli abenematubane njengemphala nayigijima esigangeni.
19 Asaheli wacosha Abneri futsi bekangajikeli ngesekudla nome ngesencele njengobe amcosha.
20 Ngesikhatsi Abneri abuka emuva, watsi: “Nguwe loyo Asaheli?” Yena watsi: “Yebo ngimi.”
21 Abneri wase utsi kuye: “Jikela ngesekudla nome ngesencele ubambe linye lalamajaha, utitsatsele noma ngabe yini lelikugcokile.” Kodvwa Asaheli bekangafuni kuyekela kumcosha.
22 Ngako Abneri waphindze watsi ku-Asaheli: “Yekela kungigijimisa. Kungani kufanele ngikubulale? Sitawubukana njani nemnakenu Jowabe?”
23 Kodvwa wachubeka nekumcosha. Ngako Abneri wamgwaza esiswini ngemphini wesikhali+ saphumela emhlane futsi wawa phansi, wafela khona lapho. Wonkhe umuntfu lobeketa kulendzawo Asaheli lafela kuyo, bekefike eme.
24 Jowabe kanye na-Abishayi babese bagijimisa Abneri. Kwatsi nakushona lilanga befika egcumeni lase-Ama, lelibukene neGiya nawuya ngasehlane lakaGibeyoni.
25 Bantfu bakaBhenjamini babutsana ndzawonye emuva kwa-Abneri futsi bema esicongweni seligcuma lelitsite.
26 Ngako Abneri wamemeta Jowabe watsi: “Inkemba itawubulala ingacedzi yini? Awati yini kutsi umphumela wayo kutawuba lusizi? Kutawuze kube ngunini solo ungabatjeli labantfu kutsi sale bajika bayekele kucoshana nabomnakabo?”
27 Jowabe wabese utsi: “Ngifunga Nkulunkulu weliciniso lophilako, kutsi kube awukakhulumi, bekutawuze kube sekuseni labantfu solo bacoshana nalabomnakabo.”
28 Jowabe wabese ushaya luphondvo, futsi emadvodza labekanye nawo ase ayayekela kucosha ema-Israyeli. Yaphela kanjalo-ke lemphi.
29 Abneri nemadvodza labehamba nawo babese bayashuca badzabula i-Arabha+ busuku bonkhe bewela iJordane, bashuca yonkhe leyo ndzawo lengemawa,* bagcine befike eMahanayimu.+
30 Ngemuva kwekutsi Jowabe ayekele kucosha Abneri, wabitela ndzawonye bonkhe bantfu; etincekwini taDavide bekushoda bantfu labangu-19 kanye na-Asaheli.
31 Kodvwa tinceku taDavide betibulele bantfu besive sakaBhenjamini kanye netinceku ta-Abneri futsi bekufe emadvodza langu-360.
32 Batsatsa Asaheli+ bayomngcwaba ethuneni lababe wakhe, leliseBhethlehema.+ Ngemuva kwaloko Jowabe kanye nemadvodza labekanye nawo bashuca busuku bonkhe baze bayewufika eHebroni+ ekuseni.
Imibhalo lengentansi
^ Kungaphindze kubekwe ngekutsi, “yonkhe iBhithroni.”
