2 Tikhronike 1:1-17
1 Solomoni indvodzana yaDavide wakhula wasimama ebukhosini bakhe, Jehova Nkulunkulu wakhe bekanaye futsi wamenta waba mkhulu kakhulu.+
2 Solomoni watfumela kutsi kuyobitwa onkhe ema-Israyeli, tindvuna tetinkhulungwane netemakhulu, behluleli, tonkhe tindvuna taka-Israyeli kanye netinhloko temindeni.
3 Solomoni kanye naso sonkhe sive babese baya endzaweni lephakeme leseGibeyoni+ ngobe lithende lekuhlangana laNkulunkulu weliciniso belilapho, lelo lebelakhiwe nguMosi inceku yaJehova ehlane.
4 Davide bekenyuse Libhokisi laNkulunkulu weliciniso walisusa eKhiriyathi-jeyarimu+ walimikisa endzaweni lebekayilungiselele lona; besekalimisele lithende eJerusalema.+
5 Li-al’thare lelitfusi+ lebelakhiwe nguBesaleli+ indvodzana ya-Uri lobekayindvodzana yaHure, beselibekwe embikwelithende lekukhontela laJehova; futsi Solomoni nalesive bebathantaza embikwalo.*
6 Solomoni wabese wenta iminikelo khona lapho embikwaJehova futsi wanikela ngeminikelo yekushiswa lengu-1 000 e-al’thare lelitfusi+ lelithende lekuhlangana.
7 Ngabo lobo busuku, Nkulunkulu wabonakala kuSolomoni futsi watsi kuye: “Cela nome ngabe yini longatsandza ngikunike yona.”+
8 Solomoni waphendvula Nkulunkulu watsi: “Umtsandze kakhulu babe wami Davide,+ futsi mine ungibeke ngaba yinkhosi esikhundleni sakhe.+
9 Awu Jehova Nkulunkulu, nyalo shengatsi setsembiso lowasenta kuDavide babe wami singagcwaliseka+ ngobe ungibeke ngaba yinkhosi yebantfu labanyenti kakhulu ngangelutfuli lwemhlabatsi.+
10 Ngiphe kuhlakanipha nelwati+ lwekuhola labantfu ngobe ngubani nje longakhona kwehlulela labantfu bakho labanyenti kangaka?”+
11 Nkulunkulu wabese utsi kuSolomoni: “Ngesizatfu sekutsi lesi sifiso senhlitiyo yakho futsi awukaceli umcebo, bunjinga, ludvumo nobe kufa* kwalabo labakutondzako, futsi awukaceli imphilo lendze, kodvwa ucele kuhlakanipha nelwati lwekwehlulela bantfu bami lengikubeke kutsi ube yinkhosi yabo,+
12 utawunikwa kuhlakanipha nelwati; kodvwa ngitawuphindze ngikunike umcebo, nebunjinga kanye neludvumo, lokute kulamakhosi lake abusa ngaphambi kwakho lake aba nako, futsi kute layawubusa ngemuva kwakho latawuba nako.”+
13 Ngako Solomoni wabuya kulendzawo lephakeme lebeyiseGibeyoni,+ embikwelithende lekuhlangana waya eJerusalema; futsi wabusa ema-Israyeli.
14 Solomoni wachubeka nekucongelela tincola temphi nemahhashi;* waba netincola temphi letingu-1 400 nemahhashi* langu-12 000+ futsi wakugcina emadolobheni etincola temphi,+ lokunye wakubeka dvutane naye eJerusalema.+
15 Inkhosi yenta kutsi lisiliva neligolide libe linyenti ngangematje eJerusalema,+ netingodvo temsedari taba tinyenti ngangetihlahla temsikhamori letiseShefela.+
16 Emahhashi aSolomoni bekatsengwa eGibhithe,+ futsi licembu lebatsengisi benkhosi belitsenga umhlambi walamahhashi* ngentsengo lefanako.+
17 Incola yemphi ngayinye lebeyitsengwe eGibhithe beyibita tinhlavu telisiliva letingu-600 futsi lihhashi lilinye belibita letingu-150; labatsengisi bebabese batsengisela onkhe emakhosi emaHethi nemakhosi aseSiriya.
Imibhalo lengentansi
^ Nobe “bebabuta kuNkulunkulu lapho.”
^ Nobe “umphefumulo.”
^ Nobe “bagibeli bemahhashi.”
^ Nobe “bagibeli bemahhashi.”
^ Kungaphindze kubekwe ngekutsi, “eGibhithe naseKuwe; batsengisi benkhosi bebawatsenga eKuwe,” kungenteka kushiwo iSilisiya.
