2 Tikhronike 11:1-23
11 Ngesikhatsi Rehobhowamu efika eJerusalema, ngekushesha wahlanganisa ndzawonye indlu yakaJuda neyakaBhenjamini,+ lokungemasotja langu-180 000 lebekaceceshelwe* imphi kute alwe nema-Israyeli, kuze kubuyiselwe umbuso kuRehobhowamu.+
2 Kwabese kufika livi laJehova kuShemaya+ inceku yaNkulunkulu weliciniso latsi:
3 “Tjela Rehobhowamu indvodzana yaSolomoni inkhosi yakaJuda, nawo onkhe ema-Israyeli lakaJuda nakaBhenjamini, utsi:
4 ‘Naku lokushiwo nguJehova: “Ningakhuphuki niyokulwa nabomnakenu. Nguloyo naloyo akabuyele ekhaya lakhe ngobe ngimi lobangele loku.”’”+ Ngako balilalela lelivi laJehova, babuyela emuva, futsi abalwanga naJerobowamu.
5 Rehobhowamu wahlala eJerusalema futsi kaJuda wakha emadolobha labiyelwe.
6 Ngaleyo ndlela, wakha kabusha* iBhetlehema,+ i-Etamu, iThekhowa,+
7 iBhethi-suri, iSokho,+ i-Adulamu,+
8 iGathi,+ iMaresha, iZifu,+
9 i-Adorayimu, iLakhishi,+ i-Azekha,+
10 iSora, i-Ayaloni+ neHebroni,+ emadolobha labiyelwe akaJuda nakaBhenjamini.
11 Ngetulu kwaloko, wacinisa letindzawo letibiyelwe, wabeka tindvuna telibutfo kuto, watfumela kudla, emafutsa neliwayini,
12 futsi watfumela kuwo onkhe lamadolobha lahlukahlukene emahawu lamakhulu netikhali; wawacinisa kakhulu lamadolobha. Live lakaJuda nelakaBhenjamini lachubeka lingephansi kwakhe.
13 Baphristi nemaLevi lebebakulo lonkhe laka-Israyeli baba ngaseluhlangotsini lwakhe, baphuma kuto tonkhe tifundza tabo.
14 EmaLevi ashiya emadlelo awo naloko lebekanako,+ futsi aya kaJuda naseJerusalema ngobe Jerobowamu nemadvodzana akhe besebawayekelisile kuba baphristi baJehova.+
15 Jerobowamu wabese utikhetsela bakhe baphristi betindzawo letiphakeme+ nebemadimoni lanjengetimbuti*+ kanye nebematfole lebekawentile.+
16 Bonkhe labavela kuto tonkhe tive taka-Israyeli, labo lebebafuna Jehova Nkulunkulu wema-Israyeli ngetinhlitiyo tabo, balandzela emaLevi baya eJerusalema kuze bentele Jehova Nkulunkulu wabokhokho babo umhlatjelo.+
17 Ngeminyaka lemitsatfu bacinisa bukhosi bakaJuda futsi basekela Rehobhowamu indvodzana yaSolomoni, ngobe bahamba ngendlela yaDavide neyaSolomoni iminyaka lemitsatfu.
18 Rehobowamu watsatsa Mahalathi, indvodzakati yaJerimothi, indvodzana yaDavide, make wakhe bekungu-Abihayili, indvodzakati ya-Eliyabe,+ indvodzana yaJese.
19 Ngekuhamba kwesikhatsi, wamtalela lamadvodzana: Jewushe, Shemariya naZahamu.
20 Ngemuva kwakhe, watsatsa Makha umtukulu wa-Absalomu.+ Ngekuhamba kwesikhatsi Makha watala Abiya,+ Athayi, Ziza naShelomithi.
21 Rehobhowamu abemtsandza kakhulu Makha umtukulu wa-Absalomu kubendlula bonkhe bafati bakhe nemaphovela akhe.+ Rehobhowamu watsatsa bafati labangu-18 nemaphovela langu-60 futsi watala emadvodzana langu-28 nemadvodzakati langu-60.
22 Ngako Rehobhowamu wabeka Abiya indvodzana yaMakha waba yinhloko nemholi wabomnakabo, ngobe bekahlose kumenta inkhosi.
23 Nome kunjalo, wasebentisa kuhlakanipha futsi watfumela lamanye emadvodzana akhe kuto tonkhe tifundza takaJuda nakaBhenjamini, wawatfumela nakuwo onkhe emadolobha labiyelwe,+ wawanika tintfo letinyenti, wawatsatsela nebafati labanyenti.
Imibhalo lengentansi
^ NgesiHebheru kutsi, “lakhetsiwe.”
^ Nobe “wacinisa.”
^ NgesiHebheru kutsi, “timbuti.”
