2 Tikhronike 12:1-16
12 Ngekushesha nje ngemuva kwekutsi bukhosi baRehobhowamu sebumiswe bacina+ futsi naye sekanemandla, yena kanye nawo onkhe ema-Israyeli bawushiya uMtsetfo waJehova.+
2 Ngemnyaka wesihlanu wekubusa kweNkhosi Rehobhowamu, iNkhosi Shishaki+ yaseGibhithe yakhuphuka yatohlasela iJerusalema ngobe bebangaketsembeki kuJehova.
3 Shishaki bekanetincola temphi letingu-1 200 nebagibeli bemahhashi labangu-60 000 futsi weta nemasotja lamanyenti kakhulu nakasuka eGibhithe, lafaka ekhatsi aseLibhiya, aseSukhi newaseTopiya.+
4 Wancoba emadolobha labiyelwe akaJuda futsi wagcina afike naseJerusalema.
5 Umphrofethi Shemaya+ weta kuRehobhowamu nasetindvuneni takaJuda lebetihlangene eJerusalema ngenca yaShishaki, wafike watsi: “Naku lokushiwo nguJehova, ‘Ningishiyile, ngako nami sengininikele+ esandleni saShishaki.’”
6 Nativa loko, letindvuna taka-Israyeli kanye nenkhosi, batisola+ base batsi: “Jehova ulungile.”
7 Watsi Jehova nakabona kutsi bayatisola, livi laJehova lefika kuShemaya latsi: “Bayatisola, ngako angeke ngisababhubhisa+ futsi sekusele kancane kutsi ngibakhulule. Intfukutselo yami angeke ngiyitfululele eJerusalema ngisebentisa Shishaki.
8 Kodvwa batawuba tinceku takhe, khona batowati umehluko emkhatsini wekukhonta mine nekukhonta emakhosi* alamanye emave.”
9 Ngako iNkhosi Shishaki yaseGibhithe yakhuphuka yayohlasela iJerusalema. Yatsatsa umcebo endlini yaJehova+ nasendlini* yenkhosi. Yatsatsa konkhe, lokufaka ekhatsi emahawu eligolide lebekakhiwe nguSolomoni.+
10 INkhosi Rehobhowamu yakha emahawu ngelitfusi kuze avale sikhala salawa latsatfwa nguShishaki, yawanika tindvuna tabogadzi* lebetigadza emasangweni endlu yenkhosi.
11 Nome nini lapho inkhosi ita endlini yaJehova, labogadzi bebangena bawaphetse futsi ngemuva kwaloko bawabuyisele emuva endlini yabogadzi.
12 Ngesizatfu sekutsi lenkhosi yatisola, intfukutselo yaJehova yesuka kuyo+ futsi akazange ababhubhise.+ Ngetulu kwaloko, betikhona tintfo letinhle lebetentiwa bantfu bakaJuda.+
13 INkhosi Rehobhowamu yacinisa sikhundla sayo eJerusalema futsi yachubeka nekubusa; Rehobhowamu bekaneminyaka lengu-41 ngesikhatsi aba yinkhosi futsi wabusa iminyaka lengu-17 eJerusalema, lokulidolobha lebelikhetfwe nguJehova kuto tonkhe tive taka-Israyeli, kuze abeke libito lakhe kulo. Libito lamake walenkhosi bekunguNama um-Amoni.+
14 Kodvwa lenkhosi yenta lokubi ngobe beyingakasenti sincumo enhlitiyweni yayo sekufuna Jehova.+
15 Umlandvo waRehobhowamu, kusukela ekucaleni kuyofika ekugcineni, ubhaliwe emavini aShemaya+ umphrofethi nasemavini a-Ido+ umboni wemibono, labhalwe emibhalweni yeluhla lwekutalana. Bekuhlale kunetimphi emkhatsini waRehobhowamu naJerobowamu.+
16 Rehobhowamu wabese uyafa, wangcwatjwa lapho kwangcwatjwa khona bokhokho bakhe eDolobheni laDavide;+ futsi indvodzana yakhe Abiya+ yaba yinkhosi ngemuva kwakhe.
Imibhalo lengentansi
^ NgesiHebheru kutsi, “imibuso.”
^ Nobe “sigodlo.”
^ NgesiHebheru kutsi, “tingijimi.”
