2 Tikhronike 13:1-22
13 Ngemnyaka wesi-18 wekubusa kweNkhosi Jerobowamu, Abiya waba yinkhosi yakaJuda.+
2 Wabusa iminyaka lemitsatfu eJerusalema. Libito lamake wakhe bekunguMikhaya+ indvodzakati ya-Uriyeli waseGibeya.+ Bekunemphi emkhatsini wa-Abiya naJerobowamu.+
3 Ngako Abiya waya emphini nemasotja latingwazi, laceceshiwe* langu-400 000.+ Jerobowamu naye wahamba wayohlangana na-Abiya kulemphi, nemasotja akhe latingwazi laceceshiwe* langu-800 000.
4 Abiya wafike wema eNtsabeni iSemarayimu, lesesifundzeni saka-Efrayimu lesinetintsaba, wase utsi: “Ngilalele wena Jerobowamu nani nonkhe ma-Israyeli.
5 Anati yini kutsi Jehova Nkulunkulu wema-Israyeli wanika Davide umbuso waphakadze ka-Israyeli,+ wawunika yena kanye nemadvodzana akhe+ ngesivumelwane saphakadze?*+
6 Kodvwa Jerobowamu+ indvodzana yaNebati, lobekayinceku yaSolomoni indvodzana yaDavide, wavukela inkhosi yakhe.+
7 Bekukhona emadvodza langenamsebenti futsi langasiti ngalutfo labechubeka ahambisana naye amsekela. Abetikhandza ancono kakhulu kunaRehobhowamu indvodzana yaSolomoni ngesikhatsi Rehobhowamu asemncane futsi atikhobosa, abengakhoni kumelana nawo.
8 “Nine nicabanga kutsi ningamelana yini nembuso waJehova losesandleni semadvodzana aDavide ngobe nibanyenti kakhulu futsi ninematfole eligolide lentiwa nguJerobowamu kute abe bonkulunkulu benu?+
9 Nicoshe baphristi baJehova+ labayintalelwane ya-Aroni, nacosha nemaLevi naphindze natibekela baphristi benu, nalingisa bantfu bakulamanye emave.+ Nome ngubani loletsa inkunzana netimvu letindvuna letingu-7 angaba ngumphristi wetintfo letingasibo bonkulunkulu.
10 Tsine-ke Nkulunkulu wetfu nguJehova+ futsi asikamlahli; baphristi betfu labayintalelwane ya-Aroni basebentela Jehova futsi nemaLevi ayasita kulowo msebenti.
11 Bentela Jehova imihlatjelo yekushiswa njalo ekuseni nakusihlwa+ kanye nemphepho lenuka kamnandzi,+ babeka tinkhwa letititaki*+ etafuleni leligolide lelicwengisisiwe, futsi bakhanyisa tibane etintsini tato teligolide+ njalo kusihlwa,+ ngobe tsine senta umsebenti Jehova Nkulunkulu wetfu lasinika wona; kodvwa nine nimlahlile.
12 Bukani-la! Nkulunkulu weliciniso unatsi, uyasihola ngebaphristi bakhe labashaya emacilongo kute bamemetele imphi lesitayilwa nani. Awu madvodza aka-Israyeli, ningalwi naJehova Nkulunkulu wabokhokho benu ngobe angeke niphumelele.”+
13 Kodvwa Jerobowamu watfumela emasotja akhe kutsi ayobhaca bese abavimbetela ngemuva, kuze kutsi yena nelibutfo lakhe babe sembikwemaJuda, libe lelinye libachamukela ngemuva.
14 Atsi emasotja akaJuda nakafulatsela, abona kutsi sekufanele alwe nabo ngemuva nangembili. Ngako amemeta Jehova,+ nebaphristi bashaya kakhulu lamacilongo.
15 Emasotja akaJuda amemeta ahlaba umkhosi, futsi Nkulunkulu weliciniso wamncoba Jerobowamu nawo onkhe ema-Israyeli embikwa-Abiya kanye nemaJuda.
16 Ema-Israyeli awabalekela emaJuda futsi Nkulunkulu wanikela ema-Israyeli kumaJuda.
17 Abiya kanye nemasotja akhe babulala emasotja lamanyenti aka-Israyeli futsi kwafa langu-500 000 laceceshiwe.*
18 Batfotjiswa kanjalo-ke bantfu baka-Israyeli ngaleso sikhatsi, kodvwa bakaJuda baba nemandla ngobe betsembela* kuJehova Nkulunkulu wabokhokho babo.+
19 Abiya abesolo acosha Jerobowamu futsi wamemuka emadolobha lafaka ekhatsi iBetheli+ kanye nemadolobha langephansi kwayo,* iJeshana nemadolobha langephansi kwayo kanye ne-Efroni+ nemadolobha langephansi kwayo.
20 Jerobowamu akazange aphindze abe nemandla ngesikhatsi sekubusa kwa-Abiya; Jehova wabese uyamshaya, wase uyafa.+
21 Kodvwa Abiya wachubeka aba nemandla. Ngekuhamba kwesikhatsi watsatsa bafati labangu-14,+ futsi watala emadvodzana langu-22 nemadvodzakati langu-16.
22 Lomunye umlandvo wa-Abiya, tintfo latenta kanye nemavi akhe, kubhaliwe emibhalweni* yemphrofethi Ido.+
Imibhalo lengentansi
^ NgesiHebheru kutsi, “lakhetsiwe.”
^ NgesiHebheru kutsi, “lakhetsiwe.”
^ NgesiHebheru kutsi, “ngesivumelwane seluswayi.”
^ Lokusho, sinkhwa lesinikelwe kuNkulunkulu.
^ NgesiHebheru kutsi, “lakhetsiwe.”
^ NgesiHebheru kutsi, “banamatsela.”
^ Nobe “labomakhelwane.”
^ Nobe “encwadzini.”
