2 Tikhronike 14:1-15
14 Abiya wangcwatjwa lapho kwangcwatjwa khona bokhokho bakhe eDolobheni laDavide;+ futsi indvodzana yakhe Asa yaba yinkhosi ngemuva kwakhe. Ngesikhatsi sayo, live laba nekuthula iminyaka lengu-10.
2 Asa wenta lokuhle nalokulungile emehlweni aJehova Nkulunkulu wakhe.
3 Wasusa ema-al’thare abonkulunkulu baletinye tive+ netindzawo letiphakeme, wabhidlita ematje langcwele,+ futsi waphihlita netinsika letingcwele.*+
4 Ngetulu kwaloko, watjela emaJuda kutsi awafune Jehova Nkulunkulu wabokhokho bawo futsi agcine uMtsetfo nemyalo.
5 Ngako wasusa tindzawo letiphakeme netindzawo tekushisela imphepho kuwo onkhe emadolobha akaJuda,+ futsi nakusabusa yena lombuso wachubeka ngaphandle kwekuphatamiseka.
6 Wakha emadolobha labiyelwe kaJuda+ ngobe lelive belite tiphazamiso futsi bekute timphi ngaleyominyaka njengobe Jehova wamnika kuphumula.+
7 Watsi kumaJuda: “Asakheni lamadolobha futsi siwabiyele ngelubondza, ngemibhoshongo,+ ngemagede* nangetingodvo letimiswe taphambana. Lelive solo lisesandleni setfu ngobe simfunile Jehova Nkulunkulu wetfu samtfola. Simfunile futsi usinike kuphumula yonkhe indzawo.” Ngako baphumelela kulomsebenti wabo wekwakha.+
8 Asa bekanelibutfo lemasotja akaJuda langu-300 000 labehlome ngemahawu lamakhulu nangetikhali. Esiveni sakaBhenjamini bekunemasotja latingwazi langu-280 000 labekaphetse emahawu lamancane* futsi ahlome ngebutjoki.+
9 Ngekuhamba kwesikhatsi, Zera umTopiya weta watobahlasela akanye nelibutfo lemasotja langu-1 000 000 netincola temphi letingu-300.+ Nabefika eMaresha,+
10 Asa wakhuphuka wayokulwa naZera futsi balungela imphi eSihosheni saseSefatha eMaresha.
11 Asa wase uncenga Jehova Nkulunkulu wakhe+ watsi: “Awu Jehova, akusho lutfo kuwe kutsi banyenti labo lobasitako nome bete emandla.+ Sisite, awu Jehova Nkulunkulu wetfu ngobe setsembele* kuwe+ futsi site kutokulwa nalesicumbi ngelibito lakho.+ Awu Jehova, wena unguNkulunkulu wetfu. Ungavumi kuncotjwa ngumuntfu.”+
12 Ngako Jehova wawehlula emaTopiya embikwa-Asa nasembikwemaJuda, futsi lamaTopiya abaleka.+
13 Asa nelibutfo lakhe bawagijimisa baze bayofika eGerari,+ futsi lamaTopiya afa aze aphela onkhe, ngobe abecotfulwa nguJehova nelibutfo lakhe. Ngemuva kwaloko batitsatsela tintfo letinyenti.
14 Baphindze bahlasela onkhe emadolobha labekabomakhelwane beGerari ngobe Jehova bekabangele bantfu balawo madolobha kutsi besabe; futsi batitsatsela tintfo kuwo onkhe lamadolobha ngobe betitinyenti tintfo lebebangatitsatsela tona.
15 Bahlasela nemathende ebafuyi futsi batitsatsela imihlambi leminyenti yemfuyo nemakamela lamanyenti base babuyela eJerusalema.
Imibhalo lengentansi
^ Fundza Tinchazelo Temagama.
^ NgesiHebheru kutsi, “iminyango lemikhulu lenetivalo letimbili.”
^ Lamahawu bekavame kuphatfwa ngemasotja lasebentisa butjoki.
^ NgesiHebheru kutsi, “sinamatsele.”
