2 Tikhronike 15:1-19
-
Lushintjo lolwentiwa ngu-Asa (1-19))
15 Umoya waNkulunkulu wehlela ku-Azariya indvodzana ya-Odedi.
2 Ngako Azariya wahamba wayohlangana na-Asa wafike watsi kuye: “Awu Asa nani nonkhe maJuda nebakaBhenjamini, ngilaleleni! Jehova utawuba nani nangabe nje nichubeka ninaye;+ nangabe nimfuna, nitamtfola+ kodvwa nangabe nimlahla naye utanilahla.+
3 Sekuphele sikhatsi lesidze* ema-Israyeli ete Nkulunkulu weliciniso, ete umphristi lowafundzisako futsi ete umtsetfo.+
4 Kodvwa atsi nasekacindzetelekile abuyela kuJehova Nkulunkulu wema-Israyeli, amfuna futsi watfolakala kuwo.+
5 Ngaleto tikhatsi bekute umuntfu lobekangahamba ngekuphepha* ngobe bekunesiyaluyalu kuto tonkhe tifundza taka-Israyeli.
6 Sive besincotjwa ngulesinye sive futsi lidolobha belincotjwa ngulelinye, ngobe Nkulunkulu wawenta angabi nekuthula, asebentisa yonkhe inhlobo yekucindzeteleka.+
7 Kodvwa nine, manini sibindzi futsi ningaphelelwa ngemandla+ ngobe nitawutfola umvuzo ngemisebenti yenu.”
8 Ngekushesha nje Asa nakeva lamavi kanye nalesiphrofetho semphrofethi Odedi, waba nesibindzi futsi wasusa tithico letenyanyekako kulo lonkhe live lakaJuda+ nelakaBhenjamini nasemadolobheni labekawatfumbile asesifundzeni lesinetintsaba saka-Efrayimu. Wabese wakha kabusha li-al’thare laJehova lebelisembikwevulandi yendlu yaJehova.+
9 Asa wabese uhlanganisa emaJuda nebakaBhenjamini kanye nalabavela kuletinye tive taka-Israyeli, lokufaka ekhatsi ka-Efrayimu, kaManase nakaSimeyoni+ ngoba laba labavela kuletinye tive bebabanyenti futsi bebashiye tive takubo batosekela Asa nababona kutsi Jehova Nkulunkulu wakhe unaye.
10 Ngako bahlangana eJerusalema ngenyanga yesitsatfu, ngemnyaka wesi-15 wekubusa kwa-Asa.
11 Ngalelolanga, banikela kuJehova ngetinkhomo letingu-700 netimvu letingu-7 000 etintfweni labatitsatsela tona nabasemphini.
12 Ngetulu kwaloko, benta sivumelwane sekutsi batawufuna Jehova Nkulunkulu wabokhokho babo ngayo yonkhe inhlitiyo yabo, nangawo wonkhe umphefumulo* wabo.+
13 Nome ngubani lobekangeke amfune Jehova Nkulunkulu wema-Israyeli, bekufanele abulawe ngisho nome amncane nome amdzala,* ayindvodza nome angumfati.+
14 Ngako bafunga kuJehova ngekuhalalisa, bamemeta baphindze bashaya emacilongo netimphondvo.
15 Onkhe emaJuda ajabula ngalesifungo ngobe abefunge ngayo yonkhe inhlitiyo yawo, atimisela nekufuna Nkulunkulu futsi yena watfolakala kuwo.+ Jehova wachubeka awanika kuphumula kuyo yonkhe indzawo.+
16 INkhosi Asa yasusa gogo wayo Makha+ esikhundleni sekuba yindlovukazi, ngobe Makha bekente sithico lesenyanyekako sekukhonta insika lengcwele.*+ Asa wajuba lesithico lesenyanyekako futsi wasiphihlita wase usishisela eSihosheni saseKhidroni.+
17 Kodvwa tindzawo letiphakeme atizange tisuswe+ ka-Israyeli.+ Nobe kunjalo, inhlitiyo ya-Asa beyitinikele ngalokuphelele kuNkulunkulu konkhe kuphila kwakhe.*+
18 Waletsa endlini yaNkulunkulu weliciniso tintfo lebetingcweliswe nguye nababe wakhe letifaka ekhatsi lisiliva, ligolide kanye naletinye tintfo.+
19 Kute imphi leyaba khona kwaze kwaba ngumnyaka wesi-35 wekubusa kwa-Asa.+
Imibhalo lengentansi
^ NgesiHebheru kutsi, “emalanga lamanyenti.”
^ NgesiHebheru kutsi, “bekute kuthula kuloyo lobekaphuma nobe kuloyo lobekangena.”
^ Fundza Tinchazelo Temagama.
^ Nobe “umuntfukatana nome umuntfu lomkhulu.”
^ Fundza Tinchazelo Temagama.
^ NgesiHebheru kutsi, “emalanga akhe.”
