2 Tikhronike 18:1-34
18 Nanobe Jehoshafati bekanemcebo lomnyenti futsi advume kakhulu,+ wenta sivumelwane sekushadiselana na-Ahabi.+
2 Ngako ngekuhamba kweminyaka waya ku-Ahabi eSamariya+ futsi Ahabi wentela Jehoshafati nebantfu lebekahamba nabo imihlatjelo leminyenti yetimvu neyetinkhomo. Wacela* Ahabi kutsi ayohlasela iRamothi-gileyadi.+
3 INkhosi Ahabi yaka-Israyeli yabese itsi eNkhosini Jehoshafati yakaJuda: “Utawuhamba nami yini eRamothi-gileyadi?” Jehoshafati waphendvula inkhosi yaka-Israyeli watsi: “Mine ngifana nawe. Bantfu bami bafana nebantfu bakho futsi ngitakusita kulemphi.”
4 Kodvwa Jehoshafati watsi enkhosini yaka-Israyeli: “Ngicela ucale ngekubuta Jehova.”+
5 Ngako lenkhosi yaka-Israyeli yahlanganisa baphrofethi, emadvodza langu-400, yase itsi kubo: “Siye yini kuyolwa neRamothi-gileyadi nome ngingayi?” Bona batsi: “Khuphuka, futsi Nkulunkulu weliciniso utayinikela esandleni senkhosi.”
6 Jehoshafati wase utsi: “Kute yini lapha umphrofethi waJehova?+ Asesibute nakuye.”+
7 Inkhosi yaka-Israyeli yase itsi kuJehoshafati: “Kukhona indvodza yinye+ lesele lengasibutela kuJehova; kodvwa ngiyayitondza ngoba ayikaze iphrofethe tintfo letinhle ngami, iphrofetha letimbi todvwa.+ Libito layo nguMikhaya indvodzana yaJimla.” Kodvwa Jehoshafati watsi: “Inkhosi akukafaneli ikhulume kanjena.”
8 Ngako inkhosi yaka-Israyeli yabita lenye yetindvuna tayo, yatsi: “Letsa Mikhaya indvodzana yaJimla ngekushesha.”+
9 Inkhosi yaka-Israyeli naJehoshafati inkhosi yakaJuda bebahleli etihlalweni tabo tebukhosi bagcoke tembatfo temakhosi, basebaleni lekubhulela esangweni laseSamariya futsi bonkhe baphrofethi bebaphrofetha embikwabo.
10 Sedekiya indvodzana yaKhenana wabese utentela timphondvo tensimbi, wase utsi: “Naku lokushiwo nguJehova, ‘Ngaletimphondvo utawuhlaba emaSiriya uze uwacotfule.’”
11 Bonkhe lalabanye baphrofethi nabo bebaphrofetha intfo lefanako batsi: “Khuphukela eRamothi-gileyadi futsi utawuncoba;+ Jehova utayinikela esandleni senkhosi.”
12 Ngako lesitfunywa lesahamba sayobita Mikhaya satsi kuye: “Emavi lashiwo baphrofethi ayafanana futsi ayayijabulisa inkhosi. Ngicela kutsi nawe lokushoko kufanane nalokushiwo ngulabaphrofethi+ futsi ukhulume ngendlela letawujabulisa inkhosi.”+
13 Kodvwa Mikhaya watsi: “Ngifunga Jehova Nkulunkulu lophilako ngitsi nome ngabe yini Nkulunkulu wami layishoko kimi ngitayikhuluma.”+
14 Mikhaya wabese uyefika enkhosini, yona yambuta yatsi: “YeMikhaya, siye yini kuyolwa neRamothi-gileyadi nome ngingayi?” Ngekushesha wayiphendvula watsi: “Khuphukelani khona, nitawuncoba; batawunikelwa esandleni senu.”
15 Inkhosi yabese itsi kuye: “Ngitakufungisa kuze kube kangakhi kutsi ungakhulumi nome ngabe yini kodvwa ukhulume liciniso kuphela egameni laJehova?”
16 Mikhaya wabese utsi: “Ngibona onkhe ema-Israyeli asakatekele etintsabeni njengetimvu letingenamelusi.+ Jehova utsite: ‘Labantfu bete inkhosi. Nguloyo naloyo akabuyele ekhaya lakhe ngekuthula.’”
17 Inkhosi yaka-Israyeli yase itsi kuJehoshafati: “Angikakutjeli yini ngatsi, ‘Angeke aphrofethe tintfo letinhle ngami kodvwa utawuphrofetha letimbi todvwa’?”+
18 Mikhaya wabese utsi: “Lalela livi laJehova: Ngibone Jehova ahleli esihlalweni sakhe sebukhosi+ futsi lonkhe libutfo lasemazulwini+ belime ngesekudla nangesencele sakhe.+
19 Jehova wabese utsi, ‘Ngubani lotawuyenga iNkhosi Ahabi yaka-Israyeli kutsi ihambe iyokulwa futsi ifele eRamothi-gileyadi?’ Lenye ingilosi beyisho lokunye, nalenye isho lokunye.
20 Kwabese kusondzela lenye ingilosi*+ yema embikwaJehova yatsi, ‘Mine ngitamyenga.’ Jehova wayibuta watsi, ‘Utakwenta kanjani loko?’
21 Yaphendvula yatsi, ‘Ngitawuhamba futsi ngitawuba ngumoya lokhohlisako lotawungena emilonyeni yabo bonkhe baphrofethi bakhe.’ Nkulunkulu watsi kuyo, ‘Utamkhohlisa, futsi utawuphumelela. Hamba uyokwenta loko.’
22 Nyalo, Jehova sewufake umoya lokhohlisako emilonyeni yabo bonkhe labaphrofethi bakho+ kodvwa Jehova umemetele inhlekelele letakwehlela.”
23 Sedekiya+ indvodzana yaKhenana wasondzela kuMikhaya+ wafike wambhamula ngemphama esihlatsini+ wase utsi: “Lomoya waJehova uhambe ngakuphi nawendlula kimi utokhuluma nawe?”+
24 Mikhaya wamphendvula watsi: “Utawubona ngalelilanga lotawungena ngalo ekamelweni lelingekhatsi uyobhaca kutsi wendlule ngakuphi!”
25 Inkhosi yaka-Israyeli yabese itsi: “Tsatsani Mikhaya nimmikise ku-Amoni indvuna yelidolobha nakuJowashi indvodzana yenkhosi.
26 Nibofike nibatjele nitsi, ‘Naku lokushiwo yinkhosi: “Valelani lendvodza ejele,+ niyinike sinkhwa lesincane nemanti lamancane kuze kube ngulapho ngibuya ngekuthula.”’”
27 Kodvwa Mikhaya watsi: “Nangabe ubuya ngekuthula, Jehova utawube akakakhulumi nami.”+ Wengeta watsi: “Ngicela nonkhe nikunake loko.”
28 Ngako inkhosi yaka-Israyeli naJehoshafati inkhosi yakaJuda bakhuphukela eRamothi-gileyadi.+
29 Inkhosi yaka-Israyeli yatsi kuJehoshafati: “Ngitakuya emphini ngigcoke ngendlela yekutsi bangaboni kutsi ngiyinkhosi kodvwa wena kufanele ugcoke tembatfo takho tebukhosi.” Ngako inkhosi yaka-Israyeli yagcoka ngendlela yekutsi ingabonakali kutsi ingubani futsi babese baya emphini.
30 Inkhosi yaseSiriya beyinike tindvuna tayo tetincola umyalo lotsi: “Ningalwi namuntfu, nome ngulomncane nome ngulomkhulu, ngaphandle kwenkhosi yaka-Israyeli.”
31 Ngekushesha nje letindvuna natibona Jehoshafati, takhuluma todvwa tatsi: “Lena ngiyo inkhosi yaka-Israyeli.” Ngako tagucuka tayokulwa naye. Jehoshafati wacala kukhalela lusito+ futsi Jehova wamsita waphindze wamkhulula.
32 Ngesikhatsi letindvuna tibona kutsi akasiyo inkhosi yaka-Israyeli, tamyekela ngekushesha.
33 Kodvwa lenye indvodza lebeyitidubulela nje ngebutjoki bayo,* yadubula inkhosi yaka-Israyeli lapho kuhlangana khona sembatfo sayo semphi sekutivikela. Ngako lenkhosi yatsi kuloyo lebekashayela incola yayo: “Jika ungisuse la kulemphi ngobe ngilimele kakhulu.”+
34 Lemphi yachubeka ishubile lonkhe lelolanga futsi inkhosi yaka-Israyeli kwadzingeka kutsi bayisekele njengobe beyikulencola ibuke emaSiriya kwaze kwaba sentsambama. Lenkhosi yagcine ifile ekushoneni kwelilanga.+
