2 Tikhronike 20:1-37
20 Ngemuva kwaloko, bakaMowabi+ nebaka-Amoni+ kanye nalamanye ema-Amonimu* beta kutokulwa naJehoshafati.
2 Ngako kwefika umbiko kuJehoshafati lotsi: “Kunesicuku lesikhulu lesitokuhlasela lesisuka esifundzeni saselwandle,* ka-Edomu.+ Njengobe sikhuluma nje siseHasesoni-thamari, lokuyi-Eni-gedi.”+
3 Watsi Jehoshafati nakeva lombiko wefikelwa kwesaba futsi watimisela kufuna Jehova.+ Ngako wamemetela kutsi kuzilwe kudla kulo lonkhe lakaJuda.
4 Bantfu bakaJuda base bayahlangana kuze babute kuJehova;+ bebasuka kuwo onkhe emadolobha akaJuda batobuta kuJehova.
5 Ngemuva kwaloko, Jehoshafati wasukuma wema embikwebantfu bakaJuda nebaseJerusalema lebebasendlini yaJehova embikwelibala lelisha,
6 wase utsi:
“Awu Jehova Nkulunkulu wabokhokho betfu, awusuye yini Nkulunkulu emazulwini;+ akusuwe yini lobusa yonkhe imibuso yetive temhlaba?+ Esandleni sakho kunemandla futsi kute umuntfu longamelana nawe.+
7 Awu Nkulunkulu wetfu, awuzange yini wena ubacoshe bantfu bakulelive embikwebantfu bakho ema-Israyeli, futsi lelive awuzange yini ulinika intalelwane* ya-Abrahama umngani wakho kutsi libe lifa layo kuze kube phakadze?+
8 Lentalelwane yase iyahlala kulo futsi yakwakhela indlu lengcwele lebitwa ngelibito lakho,+ yatsi,
9 ‘Nasingehlelwa yinhlekelele, kungaba yinkemba, nobe sehlulelo lesimelene natsi, nobe sifo lesibulalako nobe indlala, sitawukuma embikwalendlu nasembikwakho (ngobe libito lakho likulendlu)+ bese siyakubita kute usisite ekuhluphekeni kwetfu futsi wena utasiva bese uyasisindzisa.’+
10 Nyalo-ke naba bantfu baka-Amoni, bakaMowabi nebasesifundzeni lesinetintsaba saseSeyiri,+ longazange uwavumele ema-Israyeli kutsi abahlasele nakaphuma eveni laseGibhithe. Ema-Israyeli awazange atihlanganise nabo futsi awazange abacotfule.+
11 Nyalo basibonga ngalokubi ngekutsi bete batosicosha kulelive lakho lowasinika lona laba lifa letfu.+
12 Awu Nkulunkulu wetfu, angeke yini wena ubajezise?+ Ngobe tsine site emandla ekumelana nalesicumbi lesikhulu lesitosihlasela futsi asati kutsi kufanele senteni+ kodvwa emehlo etfu abuke wena.”+
13 Ngaleso sikhatsi, bonkhe bantfu bakaJuda bebeme embikwaJehova bakanye netinswane tabo, bafati babo nebantfwababo.*
14 Kwatsi kusenjalo, emkhatsini walelibandla, umoya waJehova wehlela kuJahaziyeli indvodzana yaZakhariya, indvodzana yaBhenaya, indvodzana yaJeyiyeli, indvodzana yaMathaniya umLevi wemadvodzana a-Asafa.
15 Watsi: “Lalelani nonkhe nine maJuda nani lenihlala eJerusalema nawe Nkhosi Jehoshafati! Naku lokushiwo nguJehova kini, ‘Ningesabi futsi ningetfuki ngenca yalesicuku lesikhulu ngobe lemphi ayisiyo yenu kodvwa yaNkulunkulu.+
16 Kusasa nibokwehla niyokulwa nabo. Batawukuta ngendlela yaseSisi lesemkhatsini wetintsaba futsi nitabakhandza ekugcineni kwesihosha nasenitawufika nje ehlane laseJeruweli.
17 Angeke kudzingeke niyilwe lemphi. Nibotihlela, nime ngetindzawo tenu+ bese niyabona kutsi Jehova utanisindzisa njani.+ Awu nine maJuda lahlala eJerusalema, ningesabi futsi ningetfuki.+ Kusasa nibophuma niyomelana nabo futsi Jehova utawuba nani.’”+
18 Ngekushesha Jehoshafati wakhotsama, buso bakhe babuka phansi futsi onkhe emaJuda nebantfu baseJerusalema bakhotsama embikwaJehova kuze bakhonte Jehova.
19 Ngemuva kwaloko, emaLevi lebekayintalelwane yemndeni wemaKhohati+ kanye newemaKhora, asukuma kuze advumise Jehova Nkulunkulu wema-Israyeli ngelivi lelikhulu.+
20 Bavuka ekuseni kakhulu ngakusasa baya ehlane laseThekhowa.+ Batsi nabasaphuma, Jehoshafati wema watsi: “Ngilaleleni nine maJuda nani takhamuti taseJerusalema! Tsembelani kuJehova Nkulunkulu wenu kuze nikhone kuma nicine.* Kukholweni lokushiwo baphrofethi bakhe,+ nanenta njalo nitawuphumelela.”
21 Ngemuva kwekubonisana nebantfu, wakhetsa emadvodza kutsi ahlabelele+ Jehova aphindze amdvumise agcoke timphahla letingcwele njengobe aphuma ahamba embikwelibutfo lemasotja lahlomile, atsi: “Bongani Jehova ngoba lutsandvo lwakhe lolucotfo luhlala kuze kube phakadze.”+
22 Batsi nabacala kuhlabelela ngenjabulo tingoma tekudvumisa, Jehova wavimbetela emadvodza aka-Amoni, akaMowabi, nalabekavela esifundzeni lesinetintsaba saseSeyiri lebekahlasela emaJuda, futsi lamadvodza abulalana odvwana.+
23 Bantfu baka-Amoni nebakaMowabi bahlasela takhamuti tasesifundzeni lesinetintsaba saseSeyiri+ kuze batibhubhise baphindze baticotfule; nasebacedzile ngato base babulalana bodvwana.+
24 Ngesikhatsi emaJuda efika esicongwenisekulindza sasehlane,+ futsi abuka esicunjini, abona tidvumbu tawo tisakateke phansi;+ bekute ngisho namunye losindzile.
25 Ngako Jehoshafati nebantfu bakhe beta batotitsatsela tintfo talabantfu futsi batfola tintfo letinyenti, timphahla kanye nalokunye lokuhle labatitsatsela kona, kwaba kunyenti kangangekutsi lokunye baze bakushiya.+ Kwabatsatsa emalanga lamatsatfu kutfutsa letintfo talabantfu ngobe betitinyenti kakhulu.
26 Ngelilanga lesine bahlangana eSihosheni* saseBherakha, bafike badvumisa Jehova. Kungako leyondzawo bayibita ngekutsi Sihosha saseBherakha,*+ kuze kube ngulamuhla.
27 Ngemuva kwaloko, onkhe emadvodza akaJuda newaseJerusalema abuyela eJerusalema ajabulile aholwa nguJehoshafati, ngobe Jehova bekabasitile bancoba titsa tabo.+
28 Ngako bafika eJerusalema baphetse tinsimbi temculo letinetintsambo, emahabhu+ nemacilongo+ futsi baya endlini yaJehova.+
29 Nkulunkulu wabangela kutsi yonkhe imibuso yemave yesabe nayiva kutsi Jehova ulwe netitsa tema-Israyeli.+
30 Ngaleyo ndlela, umbuso waJehoshafati waba nekuthula futsi Nkulunkulu wakhe wamniketa kuphumula kuyo yonkhe indzawo.+
31 Jehoshafati wachubeka abusa kaJuda. Bekaneminyaka lengu-35 budzala nakaba yinkhosi, futsi wabusa eJerusalema iminyaka lengu-25. Libito lamake wakhe bekungu-Azubha indvodzakati yaShilhi.+
32 Jehoshafati wachubeka ahamba ngendlela yababe wakhe Asa+ futsi akazange aphambuke kuyo. Wenta lokuhle emehlweni aJehova.+
33 Nome kunjalo, tindzawo letiphakeme atizange tisuswe+ futsi bantfu bebasengakasenti sincumo enhlitiyweni yabo sekukhonta Nkulunkulu wabokhokho babo.+
34 Lomunye umlandvo waJehoshafati, kusukela ekucaleni kuze kuyofika ekugcineni, ubhalwe emavini aJehu+ indvodzana yaHanani,+ lafakwa eNcwadzini Yemakhosi aka-Israyeli.
35 Ngemuva kwaloko, iNkhosi Jehoshafati yakaJuda yakha budlelwane neNkhosi Ahaziya yaka-Israyeli, lebeyenta tintfo letimbi.+
36 Yabambisana nayo ekwakheni imikhumbi lebeyitakuya eThashishi,+ futsi lemikhumbi bayakhela Esiyoni-geberi.+
37 Kodvwa Eliyezeri indvodzana yaDodavahu waseMaresha waphrofetha mayelana naJehoshafati watsi: “Ngenca yekutsi wakhe budlelwane na-Ahaziya, Jehova utayibhidlita imisebenti yakho.”+ Ngako lemikhumbi yephuka+ futsi ayizange isakhona kuya eThashishi.
Imibhalo lengentansi
^ Kungaphindze kubekwe ngekutsi, “emaMehuni.”
^ Lapha kushiwo Lwandle Lolufile.
^ NgesiHebheru kutsi, “inhlanyelo.”
^ NgesiHebheru kutsi, “nemadvodzana abo.”
^ Nobe “kucinisela.”
^ Nobe “eTsafeni.”
^ Lokusho kutsi “Sibusiso.”
