2 Tikhronike 22:1-12
22 Bantfu baseJerusalema base babeka Ahaziya indvodzana yaJehoramu lencane kutsi abe yinkhosi esikhundleni sababe wakhe ngobe lelibutfo lelihlaselako lelafika nema-Arabu belibulele bonkhe bomnakabo labadzala.+ Ngako Ahaziya indvodzana yaJehoramu wacala kubusa kaJuda.+
2 Ahaziya bekaneminyaka lengu-22 budzala nakaba yinkhosi futsi wabusa umnyaka munye eJerusalema. Libito lamake wakhe bekungu-Athaliya,+ umtukulu* wa-Omri.+
3 Ahaziya naye wahamba ngendlela yendlu ya-Ahabi,+ ngobe make wakhe wamkhutsata kutsi ente lokubi.
4 Wachubeka enta lokubi emehlweni aJehova njengobe bekwenta indlu ya-Ahabi, ngobe beyimeluleka ngemuva kwekufa kwababe wakhe, lokwaholela ekufeni kwakhe.
5 Walalela seluleko sabo futsi waya emphini naJehoramu indvodzana yeNkhosi Ahabi yaka-Israyeli, nakayokulwa neNkhosi Hazayeli+ yaseSiriya eRamothi-gileyadi,+ lapho Jehoramu afike walinyatwa khona ngemasotja lasebentisa butjoki.
6 Wabuyela eJezreyeli+ kute elulame kulamanceba lawatfola eRama ngesikhatsi alwa neNkhosi Hazayeli yaseSiriya.+
Ahaziya* indvodzana yaJehoramu+ inkhosi yakaJuda wehlela eJezreyeli kute ayobona Jehoramu+ indvodzana ya-Ahabi ngobe bekalimele.*+
7 Kodvwa Nkulunkulu wenta kutsi Ahaziya afe ngesikhatsi avakashele Jehoramu; nakefika wahamba naJehoramu bayohlangana naJehu+ umtukulu* waNimshi lebekagcotjwe nguJehova kutsi acotfule indlu ya-Ahabi.+
8 Ngesikhatsi Jehu acala kukhipha sehlulelo endlini ya-Ahabi, watfola tikhulu takaJuda nemadvodzana abomnakabo-Ahaziya, tisebenti ta-Ahaziya, ngako wababulala bonkhe.+
9 Wabese ufuna Ahaziya; bambamba eSamariya lapho bekabhace khona, futsi bamletsa kuJehu. Bambulala base bayamngcwaba,+ ngobe bebatsi: “Ungumtukulu waJehoshafati lowafuna Jehova ngenhlitiyo yakhe yonkhe.”+ Kute endlini ya-Ahaziya lowaba nemandla ekubusa kulombuso.
10 Ngesikhatsi Athaliya+ make wa-Ahaziya, abona kutsi indvodzana yakhe ifile, wasukuma wabulala yonkhe intalelwane yasebukhosini* yendlu yakaJuda.+
11 Nobe kunjalo, Jehoshabathi indvodzakati yalenkhosi, weba Jehowashi+ indvodzana ya-Ahaziya, wamsusa emadvodzaneni enkhosi lebekufanele abulawe futsi wambeka ekamelweni lelingekhatsi, yena nemnakekeli wakhe. Jehoshabathi indvodzakati yeNkhosi Jehoramu+ (bekangumfati waJehoyada+ umphristi futsi angudzadzewabo-Ahaziya) wakhona kumfihla kuze Athaliya angamboni ngobe bekatambulala.+
12 Jehowashi wahlala nabo iminyaka lesitfupha, afihlwe endlini yaNkulunkulu weliciniso ngesikhatsi Athaliya abusa kulelive.
Imibhalo lengentansi
^ NgesiHebheru kutsi, “indvodzakati.”
^ Kuleminye imibhalo yesandla yesiHebheru ubitwa “nga-Azariya.”
^ Nobe “bekagula.”
^ NgesiHebheru kutsi, “indvodzana.”
^ NgesiHebheru kutsi, “yonkhe inhlanyelo yembuso.”
