2 Tikhronike 23:1-21
23 Ngemnyaka wesi-7, Jehoyada watsatsa sinyatselo lebesikhombisa kutsi unesibindzi futsi wenta sivumelwane netindvuna temakhulu,+ lokungu-Azariya indvodzana yaJerohamu, Ishmayeli indvodzana yaJehohanani, Azariya indvodzana ya-Obedi, Maseya indvodzana ya-Adaya kanye na-Elishafati indvodzana yaZikhri.
2 Ngemuva kwaloko, badzabula lonkhe lakaJuda bahlanganisa ndzawonye emaLevi+ lavela kuwo onkhe emadolobha akaJuda netinhloko temindeni taka-Israyeli. Nabefika eJerusalema,
3 bonkhe bantfu benta sivumelwane+ nenkhosi endlini yaNkulunkulu weliciniso. Jehoyada wase utsi kubo:
“Indvodzana yenkhosi itawubusa njengobe Jehova etsembisa mayelana nemadvodzana aDavide.+
4 Naku lokufanele nikwente: Hlukanisani baphristi nemaLevi labasebenta+ ngeliSabatha babe ngemacembu lamatsatfu. Licembu lekucala litawugadza eminyango;+
5 licembu lesibili litawuba sendlini* yenkhosi+ kantsi licembu lesitsatfu lona litawuba seSangweni Lesisekelo futsi bonkhe bantfu batawuba semabaleni endlu yaJehova.+
6 Ningavumeli muntfu kutsi angene endlini yaJehova ngaphandle kwalabo lababaphristi nemaLevi lasebentako.+ Bona bangangena ngobe balicembu lelingcwele futsi bonkhe bantfu batawugcina sifungo labasenta kuJehova.
7 EmaLevi kufanele asingatse inkhosi nhlangotsi tonkhe, nguloyo naloyo aphatse tikhali takhe ngesandla. Nome ngubani longena kulendlu kufanele abulawe. Kufanele nibe nenkhosi nome ngabe ngukuphi lapho iya khona.”
8 EmaLevi kanye nawo onkhe emaJuda enta njengoba nje Jehoyada umphristi bekabayalile. Ngako nguloyo naloyo watsatsa licembu lakhe lebelisebenta ngeliSabatha kanye nalabo lebebangasebenti ngeliSabatha,+ ngobe Jehoyada umphristi bekangakawakhululi lamacembu+ emisebentini yawo.
9 Jehoyada umphristi wabese unika letindvuna temakhulu+ tikhali, emahawu lamancane* kanye nemahawu layindingilizi lebekukweNkhosi Davide,+ lebekahlala endlini yaNkulunkulu weliciniso.+
10 Wase uhlela bonkhe labantfu, ngamunye wabo bekaphetse sikhali sakhe esandleni, labanye wabamisa eluhlangotsini lolungesekudla lwalendlu, labanye wabamisa eluhlangotsini lwayo lolungesencele, ngase-al’thare nangasendlini futsi bonkhe batungelete lenkhosi.
11 Ngemuva kwaloko, bayikhipha lendvodzana yenkhosi+ bayifaka umchele neBufakazi*+ futsi bayibeka kutsi ibe yinkhosi. Jehoyada nemadvodzana akhe bayigcoba babese batsi: “Lunwele loludze nkhosi!”+
12 Watsi Athaliya nakeva umsindvo webantfu bagijima futsi babongelela inkhosi, ngekushesha waya kubo endlini yaJehova.+
13 Watsi nakefika wabona lenkhosi ime lapho eceleni kwensika yayo ngasekungeneni. Tindvuna+ nebashayi bemacilongo bebanenkhosi, kanye nabo bonkhe bantfu baleyo ndzawo futsi bebajabulile+ bashaya emacilongo futsi bahlabeleli lebebaphetse tinsimbi temculo bebahola kulomcimbi. Watsi Athaliya nakakubona loko, wadzabula timphahla takhe, wase uyamemeta utsi: “Ngemavukelambuso! Ngemavukelambuso!”
14 Kodvwa Jehoyada umphristi wakhiphela ngephandle tindvuna temakhulu, leto lebetihola lelibutfo, watsi kuto: “Mkhipheni emkhatsini walamasotja, futsi nakukhona lotamlandzela mbulaleni ngenkemba!” Ngobe lomphristi bekatsite: “Ningambulaleli endlini yaJehova.”
15 Ngako bambamba, bahamba naye futsi kwatsi nasekafike eSangweni Lelihhashi lebelisendlini* yenkhosi bambulalela lapho ngekushesha.
16 Jehoyada wabese wenta sivumelwane nabo bonkhe bantfu kanye nenkhosi sekutsi batawuchubeka babantfu baJehova.+
17 Ngemuva kwaloko, bonkhe bantfu beta endlini* yaBhali befike bayibhidlita,+ baphihlita ema-al’thare akhe netithico takhe+ futsi babulala Mathani umphristi waBhali+ embikwalama-al’thare.
18 Jehoyada wabese uniketa baphristi nemaLevi umsebenti wekuphatsa indlu yaJehova, Davide lebekababele ngemacembu kutsi basebente endlini yaJehova kuze bente imihlatjelo yekushishwa yaJehova+ balandzela lobekubhalwe eMtsetfweni waMosi+ ngekujabula lokukhulu nangengoma njengobe Davide bekashito.
19 Waphindze wabeka bogadzi+ ngasemagedeni endlu yaJehova kuze kungangeni muntfu longcole nganome ngabe nguyiphi indlela.
20 Wabese utsatsa tindvuna temakhulu,+ titatanyiswa, baholi bebantfu, nabo bonkhe bantfu bakuleyondzawo futsi basingatsa inkhosi behla nayo besuka endlini yaJehova. Babese bachamukela ngasegedeni lelingenhla baya endlini* yenkhosi futsi bahlalisa lenkhosi esihlalweni sebukhosi+ sembuso.+
21 Ngako bonkhe bantfu baleyondzawo bajabula futsi lelidolobha laba nekuthula ngobe besebabulele Athaliya ngenkemba.
Imibhalo lengentansi
^ Nobe “esigodlweni.”
^ Lamahawu bekavame kuphatfwa ngemasotja lasebentisa butjoki.
^ Kungenteka lena bekuyincwadzi legocotwako lecuketse uMtsetfo waNkulunkulu.
^ Nobe “esigodlweni.”
^ Nobe “ethempelini.”
^ Nobe “esigodlweni.”