2 Tikhronike 24:1-27
24 Jehowashi bekaneminyaka lengu-7 budzala nakaba yinkhosi,+ futsi wabusa iminyaka lengu-40 eJerusalema. Libito lamake wakhe bekunguZibiya waseBherisheba.+
2 Jehowashi wachubeka enta lokuhle emehlweni aJehova onkhe emalanga ekuphila kwaJehoyada umphristi.+
3 Jehoyada wakhetsela Jehowashi bafati lababili futsi bamtalela emadvodzana nemadvodzakati.
4 Ngemuva kwaloko, Jehowashi waba nesifiso enhlitiyweni yakhe sekulungisa indlu yaJehova.+
5 Ngako wahlanganisa baphristi nemaLevi wase utsi kubo: “Hambani niyokweleka imali emadolobheni akaJuda nakulo lonkhe laka-Israyeli kute kulungiswe indlu yaNkulunkulu wenu+ umnyaka nemnyaka; kufanele nikwente ngekushesha loko.” Kodvwa emaLevi awazange akwente ngekushesha.+
6 Ngako inkhosi yabita Jehoyada umphristi lomkhulu yatsi kuye:+ “Awukawatjeli ngani emaLevi kutsi akweleke umtselo longcwele kaJuda naseJerusalema njengobe kwasho Mosi+ inceku yaJehova, umtselo longcwele webantfu baka-Israyeli kuze ube welithende lebelinelibhokisi leBufakazi?+
7 Ngobe emadvodzana a-Athaliya,+ lesa sikhohlakali semfati, agcekeze indlu yaNkulunkulu weliciniso+ futsi asebentise tonkhe tintfo letingcwele tendlu yaJehova ekukhonteni boBhali.”
8 Inkhosi yabese iniketa umyalo wekutsi kwakhiwe libhokisi lemnikelo+ bese libekwa ngephandle kwelisango lendlu yaJehova.+
9 Ngemuva kwaloko, kwamenyetelwa kulo lonkhe lakaJuda naseJerusalema kutsi akuletfwe umtselo longcwele kuJehova,+ loyo Mosi inceku yaNkulunkulu weliciniso bekatsite ema-Israyeli akawukhiphe ehlane.
10 Tonkhe tindvuna kanye nabo bonkhe bantfu bajabula+ futsi bachubeka baletsa iminikelo, bayifaka kulelibhokisi laze lagcwala.*
11 Nome nini emaLevi nakaletsa lelibhokisi kute litfululelwe embikwenkhosi, futsi nababona kutsi kunemali lenyenti kulo, mabhalane wenkhosi nendvuna yemphristi lomkhulu bebeta batotfulula lelibhokisi+ bese balibuyisela lapho lihlala khona. Nguloko lebebakwenta lilanga nelilanga futsi kwatfolakala imali lenyenti.
12 Inkhosi kanye naJehoyada bebabese batsatsa lemali bayiniketa labo labengamele umsebenti lobewentiwa endlini yaJehova, bona bebabese bacasha bantfu labajuba ematje baphindze bawalungise kahle kanye nalabenta imisebenti yetandla kuze balungise indlu yaJehova.+ Bebaphindze bacashe bantfu labasebenta ngensimbi nalabasebenta ngelitfusi kuze balungise indlu yaJehova.
13 Labo labebengamele lomsebenti babese bayawucala. Njengobe lomsebenti wekulungisa lendlu uchubeka, bewubukwe ngibo futsi bayibuyisela esimeni sayo lendlu yaNkulunkulu weliciniso baphindze bayicinisa.
14 Batsi nje nabasandza kucedza, imali lebeyisele bayiletsa enkhosini nakuJehoyada futsi bayisebentisela kwakha titja tendlu yaJehova, titja temsebenti netitja tekwenta iminikelo kanye netindzebe, netitja telisiliva neteligolide.+ Bebanikela imihlatjelo yekushiswa+ endlini yaJehova njalo, onkhe emalanga ekuphila kwaJehoyada.
15 Jehoyada wafa sekagugile futsi sekenetisekile ngekuphila; bekaneminyaka lengu-130 budzala nakafa.
16 Ngako bamngcwaba eDolobheni laDavide lapho kwangcwatjwa khona emakhosi+ ngenca yebuhle labekabentile ka-Israyeli,+ abentela Nkulunkulu weliciniso kanye nendlu yaNkulunkulu.
17 Ngemuva kwekufa kwaJehoyada, tindvuna takaJuda teta tafike taguca embikwenkhosi futsi inkhosi yatilalela kuloko lebetikusho.
18 Bantfu bayishiya indlu yaJehova Nkulunkulu wabokhokho babo futsi bacala kukhonta tinsika letingcwele* kanye netithico, kangangekutsi intfukutselo yaNkulunkulu yehlela sive semaJuda neJerusalema ngenca yelicala labo.
19 Jehova wachubeka atfumela baphrofethi kutsi bababuyisele kuye futsi bebasolo babecwayisa kodvwa bona abazange balalele.+
20 Umoya waNkulunkulu wehlela kuZakhariya indvodzana yaJehoyada+ umphristi, futsi wema embikwalabantfu watsi: “Naku lokushiwo nguNkulunkulu weliciniso, ‘Aniyilaleli ngani imiyalo yaJehova? Angeke nize niphumelele! Ngesizatfu sekutsi nilahle Jehova, naye utanilahla.’”+
21 Kodvwa bakha lisu lekumbulala+ futsi bamgcoba ngematje emabaleni endlu yaJehova, balandzela umyalo wenkhosi.+
22 Ngaleyondlela iNkhosi Jehowashi yalukhohlwa lutsandvo lolucotfo babe wayo* Jehoyada lebakalukhombise yona futsi yabulala indvodzana yayo leyatsi naseyifa yatsi: “Shengatsi Jehova angakubona loku futsi akwente ulandzise ngako.”+
23 Kwatsi nakucala umnyaka, libutfo lemphi laseSiriya lahlasela Jehowashi futsi lahlasela kaJuda naseJerusalema.+ Lase libulala tonkhe tindvuna+ talabantfu, futsi tonkhe tintfo lelatitsatsela tona latimikisa enkhosini yaseDamaseko.
24 Nanobe libutfo lelihlaselako lemaSiriya belinemadvodza lambalwa, Jehova wanikela libutfo lelikhulu lakaJuda esandleni salo+ ngesizatfu sekutsi emaJuda bekamlahlile Jehova Nkulunkulu wabokhokho bawo; ngako emaSiriya akhipha sehlulelo kuJehowashi.
25 Atsi emaSiriya nakayekela kulwa naye (ngobe amshiya alimele kakhulu), tinceku takhe takha lisu lekumbulala ngobe bekacitse ingati yemadvodzana aJehoyada+ umphristi. Tambulalela embhedzeni wakhe.+ Ngako wafa futsi bamngcwaba eDolobheni laDavide,+ kodvwa abazange bamngcwabe endzaweni yekungcwaba emakhosi.+
26 Laba ngibo labakha licebo lekumbulala:+ Zabadi indvodzana yaShimeyathi umfati longum-Amoni naJehozabadi indvodzana yaShimrithi umfati wakaMowabi.
27 Mayelana nemadvodzana akhe netehlulelo letinyenti letamenyetelwa ngaye+ kanye nekulungiswa kwendlu yaNkulunkulu weliciniso,+ tonkhe letintfo tibhalwe emibhalweni* yeNcwadzi yemaKhosi. Indvodzana yakhe Amasiya yaba yinkhosi ngemuva kwakhe.
Imibhalo lengentansi
^ Kungaphindze kubekwe ngekutsi, “baze banikela bonkhe.”
^ Fundza Tinchazelo Temagama.
^ Lokusho, babe waZakhariya.
^ Nobe “imibhalo lechazako.”
