2 Tikhronike 25:1-28
25 Amasiya bekaneminyaka lengu-25 budzala nakaba yinkhosi futsi wabusa iminyaka lengu-29 eJerusalema. Libito lamake wakhe bekunguJehoyadini waseJerusalema.+
2 Amasiya wachubeka enta lokuhle emehlweni aJehova kodvwa loko bekangakwenti ngenhlitiyo yonkhe.
3 Ngekushesha nje nase awusimamisile umbuso wakhe, wabulala tinceku takhe lebetibulele babe wakhe lobekayinkhosi.+
4 Kodvwa akazange awabulale emadvodzana ato, ngekuvumelana naloko lokubhalwe eMtsetfweni, encwadzini yaMosi lapho Jehova bekakhiphe umyalo lotsi: “Bobabe akukafaneli babulawe ngenca yalokwentiwe bantfwababo, nebantfwana akukafaneli babulawe ngenca yalokwentiwe bobabe babo. Umuntfu nemuntfu kufanele afele sono sakhe kuphela.”+
5 Amasiya wahlanganisa emaJuda futsi wawahlela ema ngemindeni yawo, ngetindvuna tetinkhulungwane nangetindvuna temakhulu taso sonkhe sive sakaJuda nesakaBhenjamini.+ Wawabhalisa kusukela kulaneminyaka lengu-20 budzala kuya etulu+ futsi watfola kutsi linani lawo bekungemasotja langu-300 000 laceceshelwe* kulwa lebekangaya emphini, labekangakhona kuhloma ngesikhali nelihawu lelikhulu.
6 Ngetulu kwaloko, ka-Israyeli wacasha emasotja langemachawe langu-100 000 ngemathalenta elisiliva langu-100.*
7 Kodvwa inceku yaNkulunkulu weliciniso yeta kuye yatsi: “Nkhosi, ungahambi nalelibutfo laka-Israyeli ngobe Jehova akekho ngakuma-Israyeli+ futsi akekho esiveni saka-Efrayimu.
8 Kodvwa tihambele wena, futsi ube nesibindzi emphini. Nawungenti kanjalo, Nkulunkulu weliciniso angabangela kutsi sitsa sakho sikuncobe ngobe Nkulunkulu unemandla ekusita+ newekubangela kuncotjwa.”
9 Amasiya waphendvula lenceku yaNkulunkulu weliciniso watsi: “Sengitakwenta njani-ke ngalamathalenta langu-100 lengiwanike emasotja aka-Israyeli?” Lenceku yaNkulunkulu weliciniso yamphendvula yatsi: “Jehova angakhona kukunika lokungetulu kwaloko.”+
10 Ngako Amasiya wawajikisa lamasotja labekete kuye esuka ka-Efrayimu, watsi akabuyele eveni lawo. Lamasotja awatfukutselela kakhulu emaJuda, ngako abuyela eveni lawo atfukutsele abilelana.
11 Amasiya waba nesibindzi, wahola libutfo lakhe laya eSihosheni Seluswayi+ futsi wabulala emadvodza aseSeyiri langu-10 000.+
12 Emasotja akaJuda atfumba emasotja langu-10 000. Ngako awatsatsa awayisa esicongweni selidvwala ase awafucela phansi futsi asaphateka onkhe aba ticucu.
13 Kodvwa emalunga alelibutfo, lelo Amasiya bekalijikisile kutsi lingayi naye emphini,+ belihlasela emadolobheni akaJuda kusukela eSamariya+ kuze kuyofika eBhethi-horoni;+ lelibutfo labulala bantfu labangu-3 000 laphindze latitsatsela tintfo letinyenti.
14 Ngalesikhatsi Amasiya sekabuyile kuyobulala baka-Edomu, waletsa bonkulunkulu bebantfu baseSeyiri, wabenta bonkulunkulu bakhe+ futsi wacala kubakhotsamela nekubentela imihlatjelo yekushiswa.
15 Ngako Jehova wamtfukutselela kakhulu Amasiya futsi watfumela kuye umphrofethi lowatsi: “Ubalandzelelani bonkulunkulu bebantfu labangabasindzisanga bantfu babo esandleni sakho?”+
16 Nakasakhuluma loko lomphrofethi, inkhosi yatsi: “Thula!+ Sikubekile yini kutsi ube ngumeluleki wenkhosi?+ Ngitawutsi abakubulale nawuchubeka ukhuluma.” Lomphrofethi wabese uyathula, kodvwa asengakathuli watsi: “Ngiyati kutsi Nkulunkulu uncume kukuletsela inhlekelele ngenca yaloku lokwentile futsi awukasilaleli seluleko sami.”+
17 Ngemuva kwekubonisana nebeluleki bayo, iNkhosi Amasiya yakaJuda yatfumela umlayeto kuJehowashi, indvodzana yaJehoyahazi loyindvodzana yaJehu, inkhosi yaka-Israyeli yatsi: “Buya lapha sitokulwa.”*+
18 INkhosi Jehowashi yaka-Israyeli yatfumela nangu umlayeto eNkhosini Amasiya yakaJuda: “Lukhula lwemanyeva loluseLebanoni lutfumelele umsedari waseLebanoni umlayeto lotsi, ‘Indvodzana yami yinikete indvodzakati yakho itoyenta umfati.’ Kodvwa silwane sesiganga saseLebanoni sendlulile sagcobagcoba lolukhula lwemanyeva.
19 Wena utsite, ‘Asenibuke! Ngisincobile sive saka-Edomu.’+ Ngako inhlitiyo yakho seyidvwalile, sewufuna kudvunyiswa. Nobe kunjalo, hlala endlini* yakho. Utibitelelani inhlekelele ngekutsi utibangele wena kuwa kwakho kanye nesive sakaJuda?”
20 Kodvwa Amasiya akazange alalele+ ngobe bekuvela kuNkulunkulu weliciniso kubanikela esandleni sesitsa+ ngesizatfu sekutsi bebalandzele bonkulunkulu baka-Edomu.+
21 Ngako iNkhosi Jehowashi yaka-Israyeli yakhuphuka, yona kanye neNkhosi Amasiya yakaJuda balwela eBhethi-shemeshi,+ lokuyindzawo yakaJuda.
22 Sive sakaJuda sehlulwa sive saka-Israyeli kulemphi, ngako nguloyo naloyo wabalekela ekhaya* lakhe.
23 INkhosi Jehowashi yaka-Israyeli yatfumba iNkhosi Amasiya yakaJuda, letalwa nguJehowashi indvodzana yaJehoyahazi,* yamtfumba eBhethi-shemeshi. Ngemuva kwaloko, Jehowashi waletsa iNkhosi Amasiya eJerusalema futsi wabhidlita lubondza lwaseJerusalema kusukela eSangweni laka-Efrayimu+ kuya eSangweni Lelisekoneni,+ sigaba lesingaba ngemamitha langu-178.
24 INkhosi Jehowashi yatsatsa lonkhe ligolide, lisiliva nato tonkhe tintfo letatfolakala endlini yaNkulunkulu weliciniso lebetinakekelwa ngu-Obedi-edomu, yatsatsa netintfo lapho bekuhlala khona umcebo endlini* yenkhosi,+ yaphindze yatfumba bantfu. Ngemuva kwaloko, yabuyela eSamariya.
25 Amasiya+ indvodzana yaJehowashi inkhosi yakaJuda waphila iminyaka lengu-15 ngemuva kwekufa kwaJehowashi+ indvodzana yaJehoyahazi inkhosi yaka-Israyeli.+
26 Lomunye umlandvo wa-Amasiya, kusukela ekucaleni kuze kuyofika ekugcineni, ubhaliwe eNcwadzini Yemakhosi akaJuda newaka-Israyeli.
27 Kusukela ngesikhatsi Amasiya lahlubuka ngaso kuJehova, bamakhela licebo lekumbulala+ eJerusalema futsi wabalekela eLakhishi kodvwa batfumela emadvodza kutsi aye eLakhishi afike ambulalela khona.
28 Ngako bametfwala ngemahhashi bambuyisela emuva futsi bamngcwaba lapho kwangcwatjwa khona bokhokho bakhe edolobheni lakaJuda.
Imibhalo lengentansi
^ NgesiHebheru kutsi, “labakhetselwe.”
^ Lithalenta belilingana nemakhilogremu langu-34.2. Fundza Sandzisanchazo B14.
^ Nobe “sitohlangana buso nebuso.”
^ Nobe “esigodlweni.”
^ NgesiHebheru kutsi, “ethendeni.”
^ Ubitwa nangekutsi ngu-Ahaziya.
^ Nobe “esigodlweni.”