2 Tikhronike 27:1-9
-
Jothamu, inkhosi yakaJuda (1-9)
27 Jothamu+ bekaneminyaka lengu-25 budzala nakaba yinkhosi futsi wabusa iminyaka lengu-16 eJerusalema. Libito lamake wakhe bekunguJerusha indvodzakati yaSadoki.+
2 Jothamu wachubeka enta lokuhle emehlweni aJehova njengobe bekwente babe wakhe Uziya,+ kodvwa yena akazange angene etindzaweni lebekangakavumeleki kutsi angene kuto ethempelini laJehova.+ Nome kunjalo, bantfu bebasolo benta tintfo letimbi.
3 Wakha ligede lelingenhla lendlu yaJehova,+ futsi wenta umsebenti lomkhulu wekwakha elubondzeni lwase-Ofeli.+
4 Wakha nemadolobha+ esifundzeni lesinetintsaba sakaJuda,+ waphindze wakha takhiwo leticinile+ nemibhoshongo+ emahlatsini.
5 Walwa nenkhosi yesive sema-Amoni+ wagcine awehlulile, ngako ema-Amoni amniketa emathalenta* langu-100 elisiliva ngaloyo mnyaka, netikali* letingu-10 000 takolo kanye netikali letingu-10 000 tebhali. Ema-Amoni aphindze amniketa loku ngemnyaka wesibili newesitsatfu.+
6 Ngako Jothamu wachubeka adlondlobala ngobe bekatimisele kuhamba ngetindlela taJehova Nkulunkulu wakhe.
7 Lomunye umlandvo waJothamu, tonkhe timphi latilwa kanye nalokunye lakwenta, kubhaliwe eNcwadzini Yemakhosi aka-Israyeli newakaJuda.+
8 Bekaneminyaka lengu-25 budzala nakaba yinkhosi futsi wabusa iminyaka lengu-16 aseJerusalema.+
9 Jothamu wabese uyafa futsi wangcwatjwa lapho kwangcwatjwa khona bokhokho bakhe eDolobheni laDavide.+ Indvodzana yakhe Ahazi yaba yinkhosi esikhundleni sakhe.+
Imibhalo lengentansi
^ Lithalenta belilingana nemakhilogremu langu-34.2. Fundza Sandzisanchazo B14.
^ NgesiHebheru kutsi, “ema-cor.” Li-cor belilingana nemalitha langu-220. Fundza Sandzisanchazo B14.