2 Tikhronike 31:1-21
31 Batsi nje nabacedza kwenta konkhe loku, onkhe ema-Israyeli lebekalapho aphuma aya emadolobheni akaJuda afike aphihlita ematje langcwele,+ abhidlita netinsika letingcwele,*+ futsi awisa tindzawo letiphakeme+ nema-al’thare*+ kulo lonkhe lakaJuda nelakaBhenjamini, lokufaka ekhatsi ka-Efrayimu kanye nakaManase,+ kwaze kwaba ngulapho sekakubhubhise ngalokuphelele. Atsi nakacedza kwenta loko, onkhe ema-Israyeli abuyela emadolobheni awo, nguloyo naloyo wabuyela endzaweni yakhe.
2 Hezekiya wabese ubeka baphristi ngemacembu abo,+ nemaLevi ngemacembu awo,+ ngamunye walabaphristi nemaLevi bekenta umsebenti wakhe+ wekwenta iminikelo yekushiswa nemihlatjelo yekuthula, asebenta, abonga aphindze advumisa asemagedeni lasemabaleni* aJehova.+
3 Incenye yemphahla yenkhosi yanikelwa yaba ngumnikelo wekushiswa+ lokufaka ekhatsi umnikelo wasekuseni newasentsambama+ kanye nemnikelo wekushiswa wangemaSabatha,+ wekwetfwasa kwetinyanga+ kanye newemikhosi.+ Loko bekwentiwa ngekuvumelana nalokubhalwe eMtsetfweni waJehova.
4 Ngetulu kwaloko, wayala bantfu lebebahlala eJerusalema kutsi banikete baphristi nemaLevi incenye lebekufanele bayitfole+ kuze bawulalele ngalokuphelele* umtsetfo waJehova.
5 Kwatsi nje nakucedza kuphuma lomyalo, ema-Israyeli aletsa sivuno lesinyenti sekucala salokutinhlavu, liwayini lelisha, emafutsa,+ luju nako konkhe lobekuvunwe emasimini;+ aletsa kwelishumi lokunyenti kwato tonkhe tintfo.+
6 Bantfu baka-Israyeli nebakaJuda lebebahlala emadolobheni akaJuda, nabo baletsa kwelishumi kwetinkhomo nekwetimvu nekwelishumi kwetintfo letingcwele+ lebetinikelwe* kuJehova Nkulunkulu wabo. Bangenisa leminikelo bayibeka yaba minyenti kakhulu.
7 Ngenyanga yesitsatfu+ bacala kubeka letintfo lebebatinikele, batibeka ngetincumbi; bacedza ngenyanga yesi-7.+
8 Watsi Hezekiya netindvuna nabeta futsi babona letincumbi, badvumisa Jehova baphindze babusisa labantfu bakhe ema-Israyeli.
9 Hezekiya wabuta baphristi nemaLevi ngaleminikelo,
10 futsi Azariya umphristi lomkhulu lovela emndenini waSadoki watsi kuye: “Kusukela ngesikhatsi bacala kuletsa iminikelo endlini yaJehova,+ bantfu bebasolo badla besutsa futsi solo kunekudla lokunyenti lokusele ngobe Jehova ubabusisile bantfu bakhe. Lokudla lokunyenti lokubonako ngulokusele.”+
11 Nakeva loko, Hezekiya wabatjela kutsi abalungise emakamelo ekugcina kudla*+ endlini yaJehova, ngako bawalungisa.
12 Bachubeka baletsa iminikelo ngekwetsembeka, baletsa kwelishumi+ netintfo letingcwele; Khonaniya umLevi wabekwa kutsi abe yindvuna lebuke leminikelo, futsi Shimeyi umnakabo bekawesibili ngesikhundla.
13 BoJehiyeli, Azaziya, Nahathi, Asaheli, Jerimothi, Jozabadi, Eliyeli, Jismakhiya, Mahathi naBhenaya bebangemasekela aKhonaniya naShimeyi umnakabo balandzela umyalo weNkhosi Hezekiya futsi Azariya bekengamele indlu yaNkulunkulu weliciniso.
14 Khore indvodzana yaJimna, umLevi longugadzi welisango lelingasemphumalanga,+ bekengamele iminikelo yekutitsandzela+ leya kuNkulunkulu weliciniso futsi bekaba iminikelo leyentelwe Jehova+ kanye netintfo letingcwele kakhulu.+
15 Bekaphetse bo-Edeni, Miniyamini, Jeshuwa, Shemaya, Amariya naShekhaniya, emadolobheni ebaphristi,+ emsebentini lebebawenta ngobe betsenjwa, wekutsi babele bomnakabo incenye lelinganako kulamacembu abo,+ labancane nalabakhulu ngendlela lefanako.
16 Loku bekwengeta kuloko lokwabelwa bantfu labadvuna kusukela kulabaneminyaka lemitsatfu budzala kuya etulu lebebabhaliswe eluhlwini lwekutalana, lebebeta onkhe emalanga batosebenta endlini yaJehova baphindze bente nemisebenti yemacembu abo.
17 Loluhla lwekutalana lwebaphristi beluhleleke ngemindeni yabo+ njengobe bekunjalo nakumaLevi lebekaneminyaka lengu-20 kuya etulu,+ kuye ngemisebenti yemacembu abo.+
18 Loluhla lwekutalana belufaka ekhatsi bantfwababo, bafati babo, emadvodzana abo, nemadvodzakati abo, lonkhe libandla labo ngobe bebahlale batingcwelisele umsebenti longcwele lebebanikwe wona ngobe betsenjwa.
19 Loluhla lwekutalana beluphindze lufake ekhatsi intalelwane ya-Aroni, baphristi lebebahlala emasimini lasemadlelweni labekatungelete emadolobha abo.+ Kuwo onkhe lamadolobha bekunemadvodza lebekabitwe ngemagama kute anikete bonkhe labadvuna bemindeni yebaphristi incenye yabo kanye nawo wonkhe umuntfu lobekaseluhlwini lwekutalana lwemaLevi.
20 Hezekiya wakwenta loku kulo lonkhe lakaJuda futsi beketsembekile kuJehova Nkulunkulu wakhe, achubeka enta lokuhle nalokulungile emehlweni akhe.
21 Wonkhe umsebenti lebekawenta kute afune Nkulunkulu wakhe, ngisho nobe kungumsebenti wendlu yaNkulunkulu weliciniso+ nobe uMtsetfo nemyalo, wakwenta ngenhlitiyo yonkhe futsi waphumelela.
Imibhalo lengentansi
^ Fundza Tinchazelo Temagama.
^ Fundza Tinchazelo Temagama.
^ NgesiHebheru kutsi, “lasetinkanjini.”
^ Nobe “ngekucophelela.”
^ Nobe “lebetingcweliselwe.”
^ Nobe “tindlu tekudlela.”
