2 Tikhronike 34:1-33
34 Josaya+ bekaneminyaka lengu-8 budzala nakaba yinkhosi, futsi wabusa iminyaka lengu-31 eJerusalema.+
2 Wenta lokulungile emehlweni aJehova futsi walingisa Davide khokho wakhe; akazange aphambukele ngesekudla nome ngesencele.
3 Ngemnyaka wesi-8 wekubusa kwakhe, ngesikhatsi asengumfana, wacala kufuna Nkulunkulu waDavide khokho wakhe;+ futsi ngemnyaka wesi-12 wacala kuhlanta live lakaJuda nelaseJerusalema+ wasusa tindzawo letiphakeme,+ tinsika letingcwele,*+ tithico netitfombe tensimbi.*
4 Ngetulu kwaloko, babhidlita ema-al’thare aboBhali embikwakhe kanye netindzawo tekushisela imphepho lebetingetulu kwawo. Waphindze waphihlita tinsika letingcwele,* tithico kanye netithico tensimbi* futsi watisila taba yimphuphu, wase uyivuvutela emathuneni ebantfu lebebenta imihlatjelo kuto.+
5 Washisela nematsambo ebaphristi etikwema-al’thare abo.+ Ngaleyo ndlela wahlanta live lakaJuda nelaseJerusalema.
6 Emadolobheni akaManase, aka-Efrayimu,+ akaSimeyoni kuze kuyofika kaNaftali, etindzaweni letitindzala lebetakhelene nawo,
7 wabhidlita ema-al’thare, waphihlita tinsika letingcwele* kanye netithico,+ wakuphushuta kwaze kwaba yimphuphu; wabhidlita tonkhe tindzawo tekushisela imphepho lebetikulo lonkhe laka-Israyeli,+ ngemuva kwaloko, wabuyela eJerusalema.
8 Ngemnyaka wesi-18 wekubusa kwakhe nase alihlantile lelive kanye nelithempeli,* watfumela Shafani+ indvodzana ya-Asaliya, Maseya umphatsi welidolobha naJowa indvodzana yaJowahazi umgcini mabhuku kutsi balungise indlu yaJehova Nkulunkulu wakhe.+
9 Befika kuHilkiya umphristi lophakeme, bamniketa imali lebeyinikelwe endlini yaNkulunkulu, leyo lebeyikolekwe ngemaLevi labekagadza eminyango. Bekayitsetse esiveni sakaManase, saka-Efrayimu, nakuwo onkhe ema-Israyeli,+ lokufaka ekhatsi sive sakaJuda, sakaBhenjamini nakubantfu lebebahlala eJerusalema.
10 Yabese inikwa labo lebebakhetselwe kubuka umsebenti wendlu yaJehova. Tisebenti tendlu yaJehova tayisebentisela kulungisa umonakalo lobewenteke kulendlu.
11 Yanikwa tisebenti letinelikhono kanye nebakhi kuze batsenge ematje lalungiswe kahle netingodvo tekusimisa netekwakha letindlu lebetiyekelwe ngemakhosi akaJuda taze tadzilika taba tindzala.+
12 Lamadvodza enta lomsebenti ngekwetsembeka.+ Kwabekwa emaLevi, boJahathi na-Obadiya labangemaMerari+ kanye naZakhariya naMeshulamu labangemaKhohati+ kutsi babe baphatsi. Onkhe emaLevi labekanelikhono lekuhlabela,+
13 bekabuke tisebenti letivamile* aphindze abaphatsi babo bonkhe lebebasebenta imisebenti leyehlukehlukene; futsi lamanye emaLevi bekabomabhalane, atindvuna nabogadzi basemagedeni.+
14 Ngesikhatsi basakhipha imali lebeyinikelwe endlini yaJehova,+ Hilkiya umphristi watfola incwadzi yeMtsetfo waJehova+ lebewunikwe Mosi.*+
15 Hilkiya wabese utsi kuShafani mabhalane: “Ngitfole incwadzi yeMtsetfo endlini yaJehova.” Ngako Hilkiya wayiniketa Shafani lencwadzi.
16 Shafani wabese uletsa lencwadzi enkhosini, wase utsi kuyo: “Tinceku takho tenta konkhe loko letitfunywe kutsi tikwente.
17 Tiyikhiphile lemali letfolakele endlini yaJehova futsi tiyinikete emadvodza lakhetsiwe nalawo lenta lomsebenti.”
18 Shafani mabhalane waphindze watjela inkhosi watsi: “Kunencwadzi lengiyinikwe nguHilkiya umphristi.”+ Shafani wabese ucala kuyifundza embikwenkhosi.+
19 Ngekushesha nje inkhosi nayiva emavi aloMtsetfo, yadzabula tembatfo tayo.+
20 Inkhosi yabese inika Hilkiya, Ahikamu+ indvodzana yaShafani, Abdoni indvodzana yaMikha, Shafani mabhalane kanye na-Asaya inceku yenkhosi, umyalo lotsi:
21 “Hambani niyongibutela kuJehova, nibutele nalabantfu labasele baka-Israyeli nebakaJuda mayelana nemavi alencwadzi letfolakele; ngobe intfukutselo yaJehova letasivutsela yinkhulu, ngobe bokhokho betfu abazange balilalele livi laJehova lekutsi bagcine konkhe lokubhalwe kulencwadzi.”+
22 Ngako Hilkiya kanye netitfunywa tenkhosi bahamba baya kuHulda umphrofethikati.+ Lomphrofethikati bekangumfati waShalumi indvodzana yaThikva loyindvodzana yaHahasi lobekanakekela indzawo lokugcinwa kuyo timphahla futsi Hulda bekahlala eNcenyeni Lensha Yelidolobha iJerusalema; bafike bakhuluma naye lapho.+
23 Watsi kubo: “Naku lokushiwo nguJehova Nkulunkulu wema-Israyeli, ‘Tjelani lendvodza lenitfume kimi, nitsi:
24 “Naku lokushiwo nguJehova, ‘Ngitawuletsa inhlekelele kulendzawo nakubantfu labahlala kuyo,+ nato tonkhe ticalekiso letibhalwe kulencwadzi+ labayifundzile embikwenkhosi yakaJuda.
25 Ngesizatfu sekutsi bangishiyile+ futsi bashuncisela labanye bonkulunkulu imihlatjelo kuze bangivise buhlungu+ ngayo yonkhe imisebenti yetandla tabo, intfukutselo yami itayifikela lendzawo futsi ngeke iphele.’”+
26 Kodvwa kulenkhosi yakaJuda lenitfumele kutsi nibute kuJehova, nibotsi kuyo, “Naku lokushiwo nguJehova Nkulunkulu wema-Israyeli: ‘Mayelana nemagama lowevile,+
27 ngenca yekutsi inhlitiyo yakho ilalele* nekutsi utitfobile embikwami nawuva lengikukhulumile mayelana nalendzawo nebantfu labahlala kuyo, wase uyatitfoba kimi, wadzabula tembatfo takho, wakhala embikwami, futsi nami ngikuvile,+ kusho Jehova.
28 Kungako ngitakuyisa kubokhokho* bakho futsi utawungcwatjwa ethuneni lakho ngekuthula, nemehlo akho angeke ayibone yonkhe lenhlekelele lengitayiletsa kulendzawo nakubantfu labahlala kuyo.’”’”+
Labantfu babese baletsa imphendvulo enkhosini.
29 Ngako inkhosi yatfumela livi, yabita onkhe emadvodza lamadzala akaJuda newaseJerusalema.+
30 Ngemuva kwaloko, lenkhosi yenyukela endlini yaJehova nawo onkhe emadvodza akaJuda, takhamuti taseJerusalema, baphristi nemaLevi—bonkhe bantfu, kusukela kulomncane kuya kulomdzala.* Yafundza onkhe emavi alencwadzi yesivumelwane lebeyitfolakele endlini yaJehova, bonkhe labantfu beva.+
31 Lenkhosi yema endzaweni yayo yase yenta sivumelwane*+ embikwaJehova, sekutsi itawulandzela Jehova iphindze igcine imiyalo yakhe, tikhumbuto takhe kanye nemitsetfo yakhe ngayo yonkhe inhlitiyo yayo, nangawo wonkhe umphefumulo* wayo,+ ngekutsi igcine onkhe emavi alesivumelwane labekabhalwe kulencwadzi.+
32 Ngetulu kwaloko, yenta kutsi bonkhe labaseJerusalema nesive sakaBhenjamini bakuvume loko. Bantfu baseJerusalema benta ngekuvumelana nesivumelwane saNkulunkulu, Nkulunkulu wabokhokho babo.+
33 Josaya wabese ususa tonkhe tintfo letenyanyekako* kuyo yonkhe indzawo yema-Israyeli+ futsi wabangela kutsi wonkhe umuntfu lebekahlala ka-Israyeli akhonte Jehova Nkulunkulu wawo. Ngesikhatsi sekuphila kwakhe,* ema-Israyeli akazange aphambuke ekulandzeleni Jehova Nkulunkulu wabokhokho bawo.
Imibhalo lengentansi
^ Fundza Tinchazelo Temagama.
^ Nobe “titfombe letincibilikisiwe.”
^ Fundza Tinchazelo Temagama.
^ Nobe “titfombe letincibilikisiwe.”
^ Fundza Tinchazelo Temagama.
^ NgesiHebheru kutsi, “nendlu.”
^ Nobe “betfwali bemitfwalo.”
^ NgesiHebheru kutsi, “ngesandla saMosi.”
^ NgesiHebheru kutsi, “itsambile.”
^ Lena yinkhulumo leyinkondlo lesho kufa.
^ Nobe “umuntfukatana nalomkhulu.”
^ Nobe “yavuselela sivumelwane.”
^ Fundza Tinchazelo Temagama.
^ Nobe “tithico.”
^ NgesiHebheru kutsi, “Onkhe emalanga akhe.”
