2 Tikhronike 35:1-27
35 Josaya wentela Jehova liPhasika+ eJerusalema. Kwatsi ngelilanga lesi-14 lenyanga yekucala,+ kwahlatjwa umhlatjelo weliPhasika.+
2 Josaya wabela baphristi imisebenti yabo waphindze wabakhutsata kutsi bente imisebenti yabo endlini yaJehova.+
3 Wabese utsi kumaLevi, lebekungiwo lafundzisa onkhe ema-Israyeli+ futsi langcwele kuJehova: “Bekani Libhokisi lelingcwele endlini leyakhiwa nguSolomoni indvodzana yaDavide inkhosi yaka-Israyeli;+ akusafanele niletfwale ngemahlombe.+ Nyalo sebentelani Jehova Nkulunkulu wenu kanye nebantfu bakhe, lokungema-Israyeli.
4 Tilungiseleleni ngemindeni yenu, kuye ngemacembu enu, nilandzele loko lokwabhalwa yiNkhosi Davide+ yaka-Israyeli kanye naSolomoni indvodzana yayo.+
5 Kufanele nime ngemacembu enu endzaweni lengcwele, nime ngendlela yekutsi emndenini ngamunye kube nemndeni wemaLevi lotawusita.
6 Nibohlaba umhlatjelo weliPhasika+ bese niyatingcwelisa niphindze nilungiselele bomnakenu kute nente loko Jehova lakusho asebentisa Mosi.”
7 Josaya wanikelela bantfu emazinyane etimvu lamadvuna nemazinyane etimbuti lamadvuna kute kwentiwe imihlatjelo yeliPhasika, yentelwe bonkhe bantfu lebebakhona. Wanikela ngalangu-30 000 kanye nangetinkhomo letingu-3 000, konkhe kutsetfwe emfuyweni yenkhosi.+
8 Tindvuna takhe nato tenta iminikelo yekutitsandzela tentela labantfu, baphristi kanye nemaLevi. Hilkiya,+ Zakhariya naJehiyeli, labebengamele indlu yaNkulunkulu weliciniso, baniketa baphristi imihlatjelo yeliPhasika lengu-2 600 netinkhomo letingu-300.
9 Khonaniya nebanakabo boShemaya naNethaneli, kanye naHashabiya, naJeyiyeli, naJozabadi lebebatindvuna temaLevi, banikelela emaLevi ngeminikelo yeliPhasika lengu-5 000 kanye netinkhomo letingu-500.
10 Aphela emalungiselelo alomkhosi futsi baphristi bema etindzaweni tabo nemaLevi ema ngemacembu awo,+ njengobe inkhosi beyikhiphe lowo myalo.
11 Kwahlatjwa imihlatjelo yeliPhasika+ futsi baphristi bafafata ingati yayo,+ emaLevi wona abehlindza letilwane.+
12 Ngemuva kwaloko, kwalungiselelwa iminikelo yekushiswa kute iniketwe bonkhe labantfu lebebeme ngemindeni yakubo batonikela kuJehova njengobe kubhaliwe encwadzini yaMosi; kwentiwa lokufanako nangaletinkhomo.
13 Kwaphekwa* lomnikelo weliPhasika emlilweni ngelisiko lakhona;+ kwaphindze kwaphekwa iminikelo lengcwele emabhodweni, kubogalaza* nasemapanini, ngemuva kwaloko, kwaniketwa bonkhe labantfu ngekushesha.
14 EmaLevi abese atilungiselela wona kanye nebaphristi, ngobe baphristi, lokuyintalelwane ya-Aroni, banikela iminikelo yekushiswa nemanoni kwaze kwahlwa. Kungako emaLevi atilungiselela wona kanye nebaphristi, labayintalelwane ya-Aroni.
15 Bahlabeleli, lokungemadvodzana a-Asafa,+ bebasetindzaweni tabo ngekuhambisana nemyalo waDavide,+ Asafa,+ Hemani naJeduthuni+ umboni wemibono wenkhosi; kantsi bogadzi bebasemagedeni lehlukahlukene.+ Bekute sidzingo sekutsi bashiye umsebenti wabo ngobe banakabo emaLevi babalungiselela nabo.
16 Ngako wonkhe lomsebenti waJehova walungiselelwa ngalelolanga kute kugujwe liPhasika+ kuphindze kunikelwe iminikelo yekushiswa e-al’thare laJehova ngekuhambisana nemyalo weNkhosi Josaya.+
17 Ema-Israyeli lebekakhona agubha leliPhasika ngaleso sikhatsi kanye neMkhosi Wesinkhwa Lesite Imvubelo, kwaze kwaphela emalanga langu-7.+
18 Belingakaze libe khona liPhasika lelinjengalo ka-Israyeli kusukela ngetikhatsi temphrofethi Samuweli; futsi onkhe lamanye emakhosi aka-Israyeli awazange sekaligubhe liPhasika lelinjengaleli lelagujwa nguJosaya,+ baphristi, emaLevi, onkhe emaJuda kanye nema-Israyeli lebekakhona, lokufaka ekhatsi nebantfu baseJerusalema.
19 LeliPhasika lagujwa ngemnyaka wesi-18 wekubusa kwaJosaya.
20 Nasekwenteke konkhe loku, ngesikhatsi Josaya asalungiselele lithempeli,* iNkhosi Nekho+ yaseGibhithe yakhuphuka yatokulwa eKhakhemishi lengaseYufrathe. Josaya wabese uyaphuma uyokulwa nayo.+
21 INkhosi Nekho yatfumela titfunywa kuJosaya tafike tatsi: “Ungenaphi kuloku wena nkhosi yakaJuda? Angiketi kutokulwa nawe lamuhla kodvwa ngitokulwa nalenye indlu futsi Nkulunkulu utsi kufanele ngisheshise. Kuze utisindzise, yekela lokuphikisana naNkulunkulu longakimi ngobe utakucotfula nawungenti njalo.”
22 Nome kunjalo, Josaya akazange ayiyekele kodvwa watifihla+ kuze alwe nayo futsi akawalalelanga emavi aNekho labekavela kuNkulunkulu. Ngako weta watokulwa naye eTsafeni laseMegido.+
23 Emasotja lalwa ngebutjoki adubula iNkhosi Josaya, yase itsi etincekwini tayo: “Ngehliseni lapha ngobe ngilimele kakhulu.”
24 Ngako tinceku tayo tayikhipha encoleni yayo tayigibelisa incola yayo yesibili yemphi, tayimikisa eJerusalema. Yafa kanjalo-ke lenkhosi futsi yangcwatjwa ethuneni labokhokho bayo.+ Onkhe emaJuda nebantfu baseJerusalema bamlilela Josaya.
25 Jeremiya+ wahlabelela Josaya ingoma yekulila futsi bonkhe bahlabeleli labadvuna nalabasikati+ bebasolo bahlabela ngaJosaya etingomeni tabo tekulila kuze kube ngulamuhla; kwentiwa sincumo sekutsi letingoma kufanele tihlatjelwe ka-Israyeli futsi tibhaliwe etingomeni tekulila.
26 Lomunye umlandvo waJosaya, imisebenti yekwetsembeka* layenta ngekugcina lebekubhalwe eMtsetfweni waJehova,
27 kanye naloko lakwenta, kusukela ekucaleni kuze kube sekugcineni, kubhaliwe eNcwadzini Yemakhosi aka-Israyeli newakaJuda.+
Imibhalo lengentansi
^ Nobe “emabhodweni lamakhulu.”
^ Kungaphindze kubekwe ngekutsi, “Kosiwa.”
^ NgesiHebheru kutsi, “indlu.”
^ Nobe “yelutsandvo lolucotfo.”
