2 Tikhronike 36:1-23
36 Bantfu balelo live batsatsa Jehoyahazi,+ indvodzana yaJosaya, bambeka waba yinkhosi eJerusalema esikhundleni sababe wakhe.+
2 Jehoyahazi bekaneminyaka lengu-23 budzala nakaba yinkhosi futsi wabusa tinyanga letintsatfu eJerusalema.
3 Kodvwa inkhosi yaseGibhithe yamsusa esikhundleni sebukhosi eJerusalema futsi yahlawulisa lelive emathalenta elisiliva langu-100* nelithalenta linye leligolide.+
4 Ngetulu kwaloko, inkhosi yaseGibhithe yabeka Eliyakimu umnakaboJehoyahazi waba yinkhosi kaJuda naseJerusalema futsi yashintja libito lakhe laba nguJehoyakimu; kodvwa Nekho+ watsatsa umnakabo-Eliyakimu longuJehoyahazi wamyisa eGibhithe.+
5 Jehoyakimu+ bekaneminyaka lengu-25 budzala nakaba yinkhosi futsi wabusa iminyaka lengu-11 eJerusalema. Wachubeka enta lokubi emehlweni aJehova Nkulunkulu wakhe.+
6 INkhosi Nebukhadnezari+ yaseBhabhulona yamhlasela kuze imbophe ngetinketane telitfusi letimbili, kuze ihambe naye eBhabhulona.+
7 Nebukhadnezari watsatsa letinye tetitja tendlu yaJehova waya nato eBhabhulona futsi watibeka esigodlweni sakhe eBhabhulona.+
8 Lomunye umlandvo waJehoyakimu, tintfo letenyanyekako latenta kanye netento takhe letimbi, tibhaliwe eNcwadzini Yemakhosi aka-Israyeli newakaJuda; indvodzana yakhe Jehoyakhini yaba yinkhosi esikhundleni sakhe.+
9 Jehoyakhini+ bekaneminyaka lengu-18 budzala nakaba yinkhosi futsi wabusa tinyanga letintsatfu nemalanga langu-10 eJerusalema; wachubeka enta lokubi emehlweni aJehova.+
10 Ekucaleni kwemnyaka,* iNkhosi Nebukhadnezari yatfumela kutsi ayolandvwa aletfwe eBhabhulona+ kanye netintfo telikhetselo tendlu yaJehova.+ Nebukhadnezari wabeka babe lomncane waJehoyakhini longuSedekiya waba yinkhosi kaJuda naseJerusalema.+
11 Sedekiya+ bekaneminyaka lengu-21 budzala nakaba yinkhosi futsi wabusa iminyaka lengu-11 eJerusalema.+
12 Wachubeka enta lokubi emehlweni aJehova Nkulunkulu wakhe. Akazange atitfobe kumphrofethi Jeremiya+ lowakhuluma naye atfunywe nguJehova.
13 Sedekiya waphindze wavukela iNkhosi Nebukhadnezari+ leyayimfungise kuNkulunkulu futsi abesolo anenkhani nenhlitiyo lelukhuni, akavumanga nekubuyela kuJehova Nkulunkulu wema-Israyeli.
14 Tonkhe tindvuna tebaphristi kanye nebantfu bebangaketsembeki ngelizinga lelisetulu, benta tonkhe tintfo letenyanyekako letentiwa nguletinye tive futsi bangcolisa indlu yaJehova+ lebekayingcwelisile eJerusalema.
15 Jehova Nkulunkulu wabokhokho babo wachubeka abecwayisa asebentisa titfunywa takhe, wabecwayisa tikhatsi letinyenti ngobe bekabavela bantfu bakhe nendzawo yakhe yekuhlala.
16 Kodvwa bachubeka bahlekisa ngetitfunywa taNkulunkulu weliciniso+ futsi bawedzelela emavi akhe,+ bahlekisa nangebaphrofethi bakhe+ kangangekutsi bekute nelitsemba lekutsi bangasitakala, futsi lulaka lwaJehova lwagcine lubavutsela bantfu bakhe.+
17 Nkulunkulu wabangela kutsi bahlaselwe yinkhosi yemaKhaledi+ leyabulala emajaha ngenkemba+ endlini yabo lengcwele;+ Nkulunkulu akazange abe neluvelo ngisho nasemajaheni nome etintfombini, kulabakhulile nome kulabagulako.+ Wanikela konkhe esandleni salenkhosi.+
18 Lenkhosi yatsatsa tonkhe titja tendlu yaNkulunkulu weliciniso kanye nemcebo wendlu yaJehova nemcebo wenkhosi kanye newetindvuna, yakumikisa eBhabhulona.+
19 Yashisa indlu yaNkulunkulu weliciniso,+ yabhidlita lubondza lwaseJerusalema,+ yashisa tonkhe takhiwo takhona letivikelekile yaphindze yabhubhisa tonkhe tintfo telikhetselo.+
20 Yatsatsa bantfu lebebasindze enkembeni yayobatfumba eBhabhulona+ futsi baba tinceku tayo+ netemadvodzana ayo kwaze kwaba ngulapho umbuso wasePheresiya ucala kubusa,+
21 kuze kugcwaliseke emavi labekakhulunywe nguJehova asebentisa Jeremiya,+ kwaze kwaba ngulapho lelive libhadala emasabatha alo.+ Sonkhe leso sikhatsi belingahlali muntfu, lagcina emasabatha kwaze kwaphela leminyaka lengu-70.+
22 Ngemnyaka wekucala wekubusa kwaKhuresi inkhosi+ yasePheresiya, Jehova watsintsa inhlitiyo yaKhuresi iNkhosi yasePheresiya kutsi akhiphe simemetelo kuwo wonkhe umbuso wakhe futsi asibhale phansi,+ kute kugcwaliseke livi laJehova lelashiwo nguJeremiya.+ Lesimemetelo besitsi:
23 “Naku lokushiwo nguKhuresi iNkhosi yasePheresiya: ‘Jehova longuNkulunkulu wemazulu unginike yonkhe imibuso emhlabeni+ futsi ungitfume kutsi ngimakhele indlu eJerusalema lekaJuda.+ Nobe ngubani lokhonta yena emkhatsini wenu nonkhe, akakhuphukele eJerusalema lekaJuda futsi shengatsi Jehova Nkulunkulu wakhe angaba naye.’”+
Imibhalo lengentansi
^ Lithalenta belilingana nemakhilogremu langu-34.2. Fundza Sandzisanchazo B14.
^ Kungenteka kusentfwasahlobo.
