2 Tikhronike 5:1-14
5 Ngako Solomoni wawucedza wonkhe lomsebenti wendlu yaJehova lobekufanele awente.+ Wabese ungenisa letintfo lebetingcweliswe ngubabe wakhe Davide,+ wafaka nelisiliva, ligolide nato tonkhe letinye tintfo lapho bekuhlala khona umcebo endlini yaNkulunkulu weliciniso.+
2 Ngaleso sikhatsi Solomoni wahlanganisa emadvodza lamadzala aka-Israyeli, bonkhe baholi betive kanye netinhloko temindeni yaka-Israyeli. Beta eJerusalema batoletsa libhokisi lesivumelwane saJehova, besuka nalo eDolobheni laDavide,+ iSiyoni.+
3 Onkhe emadvodza aka-Israyeli ahlangana embikwenkhosi emkhosini* logujwa ngenyanga yesi-7.+
4 Ngako onkhe emadvodza lamadzala aka-Israyeli efika futsi emaLevi aphakamisa leLibhokisi.+
5 Baletsa leLibhokisi, lithende lekuhlangana+ kanye nato tonkhe titja letingcwele lebetikulelithende. Baphristi nemaLevi* ngibo labeta nato.
6 INkhosi Solomoni kanye naso sonkhe sive saka-Israyeli lebesibitwe ngiyo kuze ibambe umhlangano naso, bebasembikwaleLibhokisi. Ngako kwentiwa umhlatjelo ngetimvu nangetinkhomo letinyenti kakhulu+ kangangekutsi bekulukhuni kutibala.
7 Baphristi babese bangenisa lelibhokisi lesivumelwane saJehova endzaweni yalo, ekamelweni lelingekhatsi lalendlu, lokuyiNgcwelengcwele. Balibeka ngephansi kwemaphiko emakherubhi.+
8 Ngaleyondlela, lamaphiko alamakherubhi bekavulekele ngetulu kwalendzawo yeLibhokisi, kangangekutsi lamakherubhi bekambonya leLibhokisi kanye netibambo talo.+
9 Letibambo betitindze kangangekutsi incenye lesekugcineni yato beyibonakala nawuseNgcwele embikwelikamelo lelingekhatsi kodvwa tingabonakali nawungephandle kwalo. Letibambo solo tilapho nalamuhla.
10 KuleLibhokisi bekutfolakala kuphela ematje lamabili latibhelekece lafakwa nguMosi eHorebe+ ngesikhatsi Jehova enta sivumelwane+ nebantfu baka-Israyeli nabaphuma eGibhithe.+
11 Ngesikhatsi baphristi baphuma endzaweni lengcwele (ngobe bonkhe baphristi lebebakhona bebatingcwelisile,+ ngisho nome ngabe bebabakuliphi licembu),+
12 onkhe emaLevi labahlabeleli+ lebekaholwa ngu-Asafa,+ nguHemani,+ nguJeduthuni+ kanye nemadvodzana awo nabomnakabo, bewagcoke ilineni lelikhetselo, aphetse emasimbali, tinsimbi temculo letinetintsambo kanye nemahabhu; beweme ngasemphumalanga yeli-al’thare futsi beweme nebaphristi labangu-120 lebebashaya emacilongo.+
13 Ngesikhatsi labo labashaya emacilongo nalabahlabelako badvumisa futsi babonga Jehova bamunye, njengobe bekuvakala umsindvo wemacilongo, wemasimbali newaletinye tinsimbi temculo nabadvumisa Jehova batsi, “ngobe muhle; lutsandvo lwakhe lolucotfo luhlala kuze kube phakadze,”+ lendlu, lokuyindlu yaJehova, yabese igcwala lifu.+
14 Baphristi abakhonanga kuchubeka benta imisebenti yabo ngenca yalelifu, ngobe inkhatimulo yaJehova yagcwala lendlu yaNkulunkulu weliciniso.+
