2 Tikhronike 7:1-22
7 Watsi nje Solomoni nakacedza kuthantaza,+ kwehla umlilo emazulwini+ washwabadzela lomnikelo wekushiswa nalemihlatjelo futsi inkhatimulo yaJehova yagcwala kulendlu.+
2 Baphristi abakhonanga kungena kulendlu yaJehova ngobe inkhatimulo yaJehova beyigcwele kulendlu yaJehova.+
3 Bonkhe bantfu baka-Israyeli bebabukile ngalesikhatsi lomlilo wehla, nenkhatimulo yaJehova yehlela etikwalendlu, base bayakhotsama, buso babo batsintsa phansi esiyilweni sematje futsi babonga Jehova, “ngobe muhle; lutsandvo lwakhe lolucotfo luhlala kuze kube phakadze.”
4 Inkhosi kanye nabo bonkhe labantfu babese benta imihlatjelo embikwaJehova.+
5 INkhosi Solomoni yanikela ngetinkhomo letingu-22 000 nangetimvu letingu-120 000. Inkhosi nabo bonkhe labantfu bayivula kanjalo-ke lendlu yaNkulunkulu weliciniso.+
6 Baphristi bebeme etindzaweni tabo tekusebentela, njengobe nje nemaLevi lebekaphetse tinsimbi temculo lebetisetjentiswa nakuhlatjelelwa Jehova, nawo bekeme etindzaweni tawo.+ (INkhosi Davide beyakhe letinsimbi temculo tekubonga Jehova kute imdvumise isebentisa tona,* “ngobe lutsandvo lwakhe lolucotfo luhlala kuze kube phakadze.”) Labaphristi bebashaya lamacilongo+ kakhulu embikwabo, ngesikhatsi lamanye ema-Israyeli emile.
7 Solomoni wabese ungcwelisa incenye lesemkhatsini yelibala* lebelisembikwendlu yaJehova ngobe kuleyo ndzawo bekufanele anikele iminikelo yekushiswa+ kanye nemanoni emihlatjelo yekuthula, ngobe li-al’thare lelitfusi+ lebelakhiwe nguSolomoni belingeke likhone kwetfwala lemihlatjelo yekushiswa, iminikelo yalokutinhlavu+ kanye nalamanoni.+
8 Ngaleso sikhatsi Solomoni wenta umkhosi wemalanga langu-7+ akanye nawo onkhe ema-Israyeli, kwaba libandla lelikhulu lelisuka eLebo-hamathi* kwehle kuze kuyofika eSihosheni* saseGibhithe.+
9 Kodvwa ngelilanga lesi-8* babamba umbutsano lokhetsekile+ ngobe kunikelwa kweli-al’thare bekutsetse emalanga langu-7, futsi lomkhosi watsatsa emalanga langu-7.
10 Ngelilanga lesi-23, enyangeni yesi-7, inkhosi yabakhulula labantfu babuyela emakhaya bajabule kakhulu+ ngenca yetintfo letinhle Jehova latentela Davide, Solomoni kanye nebantfu bakhe ema-Israyeli.+
11 Solomoni wayicedza kanjalo-ke indlu yaJehova nendlu* yenkhosi+ kanye nako konkhe labefise kukwenta endlini yaJehova nasendlini yakhe, konkhe wakwenta ngemphumelelo.+
12 Jehova wabese uyabonakala kuSolomoni+ ngalobo busuku watsi kuye: “Ngiwuvile umthantazo wakho, futsi ngiyikhetsile lendzawo kutsi ibe yindlu yemhlatjelo.+
13 Nakungenteka ngivale emazulu bese imvula ayisani, futsi nangabe ngiyala tintsetse kutsi ticotfule lelive ngiphindze ngitfumele sifo lesibulalako kubantfu bami,
14 nangabe bantfu bami labebabitwa ngelibito lami+ batitfoba+ futsi bathantaza baphindze bafune buso bami, batishiye tindlela tabo letimbi,+ mine ngitawubese ngiyeva ngisemazulwini futsi ngitsetselele sono sabo, ngelaphe live labo.+
15 Nyalo ngitawuvula emehlo ami, netindlebe tami titawulalelisisa imithantazo lethantazwa kulendzawo.+
16 Sengiyikhetsile lendlu ngaphindze ngayingcwelisa kute libito lami lihlale kuyo phakadze,+ futsi emehlo ami kanye nenhlitiyo yami kutawuhlale kukuyo.+
17 “Nangabe uhamba embikwami njengobe babe wakho Davide enta ngekutsi wente konkhe lengikuyale ngako futsi ulalela imitsetfo kanye netehlulelo tami,+
18 ngitawumisa sihlalo sakho sebukhosi+ sicine njengobe ngenta sivumelwane nababe wakho Davide+ ngatsi, ‘Angeke kwenteke kutsi kungabi nendvodza esitukulwaneni sakho letawuhlala esihlaweni sebukhosi saka-Israyeli.’+
19 Kodvwa nangabe uphambuka futsi ungayigcini imiyalo nemitsetfo yami lengikunike yona bese uyahamba uyokhonta labanye bonkulunkulu futsi ukhotsame kubo,+
20 ngitawacotfula ema-Israyeli eveni lami lengiwanike lona,+ nalendlu lengiyingcwelisele libito lami ngitayifulatsela futsi ema-Israyeli atawuba yinhlekisa, abe yintfo yekuphukutwa bantfu bonkhe.+
21 Lendlu itawuba tindzala. Wonkhe umuntfu lowendlula eceleni kwayo utawumangala kakhulu+ aze atsi, ‘Jehova ukwenteleni loku kulelive nakulendlu?’+
22 Batawubese batsi, ‘Kungobe bamlahlile Jehova+ Nkulunkulu wabokhokho babo, lowabakhipha eveni laseGibhithe+ base baba nalabanye bonkulunkulu, babakhotsamela futsi babakhonta.+ Kungako-ke abaletsele yonkhe lenhlekelele.’”+
Imibhalo lengentansi
^ Kungenteka kubhekiselwe kumaLevi.
^ Nobe “sibuya.”
^ Nobe “esangweni laseHamathi.”
^ Fundza Tinchazelo Temagama.
^ Lilanga lelingemuva kwemkhosi, nobe lilanga lesi-15.
^ Nobe “sigodlo.”
