2 Tikhronike 9:1-31
9 Indlovukazi yaseSheba+ yeva ngetidvumo taSolomoni, ngako yeta eJerusalema yatomvivinya ngekumbuta imibuto lelukhuni.* Yefika ihamba nebantfu labanyenti* labaticumama. Bebahamba nemakamela lebekalayishe emafutsa ebhalisamu, ligolide lelinyenti+ kanye nematje laligugu. Yaya kuSolomoni futsi yakhuluma naye ngako konkhe lobekusenhlitiyweni yayo.+
2 Solomoni wayiphendvula yonkhe imibuto lebeyinayo. Bekute umbuto lomatima* kuSolomoni kutsi angehluleka kuphendvula lendlovukazi.
3 Ngesikhatsi lendlovukazi yaseSheba seyikubonile kuhlakanipha kwaSolomoni,+ indlu lebekayakhile,+
4 kudla lebekuba setafuleni lakhe,+ indlela tinceku takhe lebetihlala ngayo kulelitafula, indlela boweta bakhe lebebaletsa ngayo kudla nendlela yabo yekugcoka, ibone nebaphatsi betindzebe netembatfo tabo kanye nemihlatjelo yekushiswa lebekayinikela njalo endlini yaJehova,+ lendlovukazi yasala ibambe wangentansi.
5 Yase itsi enkhosini: “Umbiko lengiwuvile nangiseveni lami lomayelana netintfo lotentile kanye nekuhlakanipha kwakho, uliciniso.
6 Kodvwa angikawukholwa lombiko kwaze kwaba ngulapho mine ngita ngitotibonela matfupha.+ Sengiyabona kutsi kuncane lengitjelwe kona ngekuhlakanipha kwakho lokukhulu.+ Imphumelelo yakho ikwendlula khashane loko lengikuvile ngawe.+
7 Bayajabula bantfu bakho kanye netinceku takho letima embikwakho njalo, tilalele emavi ekuhlakanipha kwakho!
8 Shengatsi angadvunyiswa Jehova Nkulunkulu wakho lokutsandzile ngekutsi akubeke ube yinkhosi esihlalweni sakhe sebukhosi ubusele Jehova Nkulunkulu wakho. Ngenca yekutsi Nkulunkulu wakho utsandza Israyeli,+ kuze amente abe khona phakadze, ukubekile kutsi ube yinkhosi kuze ubuke kugcinwa kwemtsetfo kanye nekulunga.”
9 Lendlovukazi yabese inika inkhosi emathalenta langu-120* eligolide,+ emafutsa lamanyenti kakhulu ebhalisamu kanye nematje laligugu. INkhosi Solomoni ayizange iphindze inikwe emafutsa lamanyenti ebhalisamu kwendlula lawa leyawanikwa ngulendlovukazi yaseSheba.+
10 Ngetulu kwaloko, tinceku taHiramu netinceku taSolomoni letaletsa ligolide lelisuka e-Ofiri,+ taphindze taletsa netingodvo tem-algamu kanye nematje laligugu.+
11 Inkhosi yakha titebhisi tendlu yaJehova+ kanye netendlu* yenkhosi+ ngaletingodvo tem-algamu. Yaphindze yakhela bahlabeleli emahabhu netinsimbi temculo letinetintsambo.+ Bekungakaze kubonwe tingodvo letinjengaleti eveni lakaJuda.
12 INkhosi Solomoni yaphindze yanika indlovukazi yaseSheba nome ngabe yini lebeyiyifisa nalebeyiyicela. Yayipha tipho letinyenti kwendlula leto lebeyitinikwe ngulendlovukazi. Ngemuva kwaloko, lendlovukazi yahamba yabuyela eveni layo ikanye netinceku tayo.+
13 Sisindvo seligolide lebeliletfwa kuSolomoni ngemnyaka besingemathalenta langu-666,+
14 nasingalibali lelo lebelichamuka kubatsengisi nalebelingeniswa yibhizinisi kanye nalebelingeniswa ngiwo onkhe emakhosi ase-Arabiya netindvuna telive lebetiletsa ligolide nelisiliva kuSolomoni.+
15 INkhosi Solomoni yakha emahawu lamakhulu langu-200 ngeligolide+ lelihlanganiswe nalolunye luhlobo lwensimbi (lihawu ngalinye belingemashekeli* langu-600 eligolide lelihlanganiswe nalolunye luhlobo lwensimbi),+
16 yakha nemahawu lamancane* langu-300 eligolide lelihlanganiswe nalolunye luhlobo lwensimbi (lihawu ngalinye lelincane belakhiwe ngemakhilogremu* lacishe abe mabili eligolide). Inkhosi yabese ibeka lamahawu Endlini yeLihlatsi laseLebanoni.+
17 Inkhosi yaphindze yakha sihlalo sebukhosi lesikhulu ngematinyo endlovu futsi yasinameka ngeligolide lelicwengisisiwe.+
18 Bekunetitebhisi letisitfupha letiya kulesihlalo sebukhosi futsi besinesenabelo seligolide lesasinamatsiselwe kuso. Bekuphindze kube netindzawo tekubeka tandla etinhlangotsini totimbili talesihlalo kanye nemabhubesi lamabili+ lebekeme eceleni kwaletindzawo tekubeka tandla.
19 Bekuphindze kube nemabhubesi+ langu-12 lebekeme kuletitebhisi letisitfupha, kunelibhubesi linye ngala nangala kwesitebhisi ngasinye. Kute lomunye umbuso lowake wakha intfo lenjena.
20 Tonkhe tindzebe tekunatsa teNkhosi Solomoni betakhiwe ngeligolide, futsi tonkhe titja Tendlu yeLihlatsi laseLebanoni betakhiwe ngeligolide lelicwengisisiwe. Bekute lobekwakhiwe ngelisiliva, ngobe lisiliva belitsatfwa njengentfo lengenamsebenti ngetikhatsi taSolomoni.+
21 Imikhumbi yenkhosi beyihle iya eThashishi+ netisebenti taHiramu.+ Kanye ngemuva kweminyaka lemitsatfu lemikhumbi yaseThashishi beyita igcwele ligolide nelisiliva, ematinyo endlovu,+ tinhlobonhlobo tetimfene nemaphigogo.
22 Ngako iNkhosi Solomoni beyihlakaniphe kakhulu futsi injinge kakhulu kunawo onkhe emakhosi emhlabeni.+
23 Onkhe emakhosi emhlaba abefuna kubonana* naSolomoni kuze eve emavi ekuhlakanipha lebekafakwe nguNkulunkulu enhlitiyweni yakhe.+
24 Beketa aphetse tipho letifaka ekhatsi tintfo letakhiwe ngelisiliva, tintfo letakhiwe ngeligolide, tembatfo,+ tikhali, emafutsa ebhalisamu, emahhashi kanye neminyuzi. Loku bekwenteka umnyaka ngemnyaka.
25 Solomoni abenetindlwana temahhashi akhe letingu-4 000 netincola temphi kanye nemahhashi langu-12 000*+ futsi konkhe loku wakubeka emadolobheni etincola temphi, lokunye wakubeka dvutane naye eJerusalema.+
26 Wabusa onkhe emakhosi kusukela eMfuleni* kuze kuyofika eveni lemaFilisti nasemnceleni waseGibhithe.+
27 Inkhosi yenta lisiliva eJerusalema laba linyenti ngangematje, yenta netingodvo temsedari taba tinyenti ngangetihlahla temsikhamori letiseShefela.+
28 Bebaletsa emahhashi kuSolomoni lasuka eGibhithe+ nakuto tonkhe letinye tindzawo.
29 Lomunye umlandvo waSolomoni,+ kusukela ekucaleni kuze kuyofika ekugcineni, ubhaliwe emavini aNathani+ umphrofethi, esiphrofethweni sa-Ahiya+ umShilo nasemibhalweni lekhuluma ngemibono ya-Ido+ umboni wemibono lemayelana naJerobowamu+ indvodzana yaNebati.
30 Solomoni wabusa onkhe ema-Israyeli eJerusalema iminyaka lengu-40.
31 Solomoni wabese uyafa wangcwatjwa lapho kwangcwatjwa khona bokhokho bakhe. Ngako bamngcwaba eDolobheni laDavide babe wakhe,+ futsi indvodzana yakhe Rehobhowamu yaba yinkhosi ngemuva kwakhe.+
Imibhalo lengentansi
^ Nobe “ludvwendvwe.”
^ Nobe “ngetiphicwaphicwano.”
^ NgesiHebheru kutsi, “kute lebekufihlekile.”
^ Lithalenta lilinye lingu-34.2 kg (1 101 oz t). Fundza Sandzisanchazo B14.
^ Nobe “sigodlo.”
^ Lishekeli belilingana nemagremu langu-11.4. Fundza Sandzisanchazo B14.
^ Lamahawu bekavame kuphatfwa ngemasotja lasebentisa butjoki.
^ NgesiHebheru kutsi, “nemamina elisiliva lamatsatfu.” EmiBhalweni YesiHebheru, limina belilingana nemagremu langu-570. Fundza Sandzisanchazo B14.
^ NgesiHebheru kutsi, “bekafuna buso.”
^ Nobe “bagibeli bemahhashi.”
^ Lokusho, iYufrathe.
