Ezra 9:1-15
9 Ngekushesha nje nasetentiwe letintfo, tindvuna teta kimi tafike tatsi: “Bantfu baka-Israyeli kanye nebaphristi nemaLevi abakatehlukanisi kubantfu baletive letisitungeletile kanye nasemikhubeni yabo lemibi,+ lokuyimikhuba yemaKhenani, yemaHethi, yemaPheresi, yemaJebhusi, yema-Amoni, yemaMowabi, yebaseGibhithe+ neyema-Amori.+
2 Batitsatsele bafati emadvodzakatini aletive futsi batsatsela nemadvodzana abo bafati kuto.+ Nyalo ema-Israyeli, layintalelwane* lengcwele,+ atihlanganise nebantfu bakuletive.+ Tindvuna nemasekela ebabusi bahambe embili ekwenteni lesono.”
3 Ngatsi nje nangiva loko, ngadzabula timphahla tami, ngahlutfula tinwele tami enhloko nasesilevini, futsi ngahlala phansi ngetfuke kakhulu.
4 Bonkhe bantfu lebebawahlonipha* emavi aNkulunkulu wema-Israyeli beta kimi ngenca yesono lebesentiwe ngulabo bebatfunjiwe, njengobe bengihleti ngetfuke kakhulu kwaze kwaba sikhatsi sekwenta umnikelo walokutinhlavu wakusihlwa.+
5 Ngesikhatsi sekwenta umnikelo walokutinhlavu wakusihlwa,+ ngasukuma lapho bengihleti khona ngilila futsi ngidzabule timphahla tami, ngaguca ngelulela tandla tami kuJehova Nkulunkulu wami.
6 Ngatsi: “Awu Nkulunkulu wami, ngitiva nginemahloni futsi ngiyesaba kuthantaza kuwe, Nkulunkulu wami, ngobe tono tetfu setinyenti kakhulu nemaphutsa etfu asancwabelene aze afika emazulwini.+
7 Kusukela ngemalanga abokhokho betfu kuze kube ngulamuhla tono tetfu tibe tinyenti kakhulu,+ futsi ngenca yemaphutsa etfu, unikele tsine nemakhosi etfu kanye nebaphristi esandleni semakhosi aletive letisitungeletile, sabulawa ngenkemba,+ sayiswa ekutfunjweni,+ semukwa tintfo tetfu+ futsi sahlaziswa, njengobe nje kwenteka lamuhla.+
8 Kodvwa nyalo Jehova Nkulunkulu wetfu usentele umusa kwesikhashana ngekutsi avumele labanye betfu baphunyule nangekutsi asilondze* endzaweni yakhe lengcwele+ kute sijabule, futsi Nkulunkulu wetfu usikhululile kwesikhashana ekubeni tigcili.
9 Ngobe ngisho nobe sitigcili,+ Nkulunkulu wetfu akakasilahli ekugcilatweni kwetfu, kodvwa ngenca yelutsandvo lwakhe lolucotfo wente kutsi emakhosi asePheresiya asentele umusa+ kuze asikhulule sakhe kabusha indlu yaNkulunkulu wetfu+ futsi sivusetele tindvonga tayo, waphindze wasivikela* kaJuda naseJerusalema.
10 “Kodvwa nyalo singatsini nje Nkulunkulu wetfu, ngemuva kwaloku lokwentekile? Ngobe siyishiyile imitsetfo yakho,
11 lowasinika yona usebentisa tinceku takho letibaphrofethi, ngesikhatsi utsi: ‘Lelive lenitawungena nilitsatse libe lifa lenu lilive lelingcolile ngenca yekutsi bantfu bakhona bangcolile, nangenca yemikhuba yabo lemibi leyente kutsi kugcwale kungcola kulo lonkhe lelive, kusukela ngala kuya ngale kwalo.+
12 Ngako emadvodzakati enu ningawendziseli emadvodzana abo, nobe nitsatsele emadvodzana enu bafati emadvodzakatini abo,+ futsi ningabobasita kutsi babe nekuthula nobe baphumelele,+ khona nitewucina futsi nidle tintfo letinhle talelive niphindze nilitsatse libe lifa lemadvodzana enu kuze kube phakadze.’
13 Ngemuva kwako konkhe lokusehlele ngenca yetento tetfu letimbi nesono setfu lesikhulu, nanobe wena Nkulunkulu wetfu ungakasijezisi ngendlela lefanele tono tetfu,+ futsi wasivumela kutsi siphunyule,+
14 kufanele yini siphindze sephule imitsetfo yakho futsi sendziselane naletive letenta tintfo letimbi?+ Angeke yini usitfukutselele kakhulu uze usibhubhise sonkhe, kubebete losalako nobe losindzako?
15 Awu Jehova Nkulunkulu wema-Israyeli, wena ulungile,+ ngobe kuze kube ngulamuhla, labanye betfu baphunyulile. Nyalo silapha embikwakho ngenca yesono setfu, ngobe kute ngisho namunye kitsi lonelilungelo lekuma embikwakho ngenca yako konkhe loku.”+
Imibhalo lengentansi
^ NgesiHebheru kutsi, “layinhlanyelo.”
^ NgesiHebheru kutsi, “labebachachateliswa.”
^ NgesiHebheru kutsi, “asinike sikhonkwane.”
^ NgesiHebheru kutsi, “wasentela lubondza lwematje.”
