Hezekeli 17:1-24
17 Livi laJehova laphindze lefika kimi latsi:
2 “Ndvodzana yemuntfu, shano siphicwaphicwane, usho nesaga lesimayelana nebantfu baka-Israyeli.+
3 Kufanele utsi: ‘Naku lokushiwo yiNkhosi Lephakeme Jehova: “Lusweti lolukhulu,+ lolunetimphiko letinkhulu naletindze, futsi lolunetinsiba letiphelele naletimibalabala lufikile eLebanoni+ lwatsatsa sihloko semsedari.+
4 Luhlutfule ligala lelisetulu esicongweni lwalimikisa eveni lebatsengisi* futsi lwalibeka edolobheni lebatsengisi.+
5 Lwabese lutsatsa lenye yenhlanyelo yalelive+ lwayihlanyela ensimini levundzile. Lwayihlanyela njengesihlahla semnyetane eceleni kwemfula.
6 Yamila futsi yaba sihlahla semagilebisi lesimfisha lesinabako,+ emacembe aso abheke phansi futsi timphandze taso tamila ngephansi kwaso. Ngaleyondlela saba sihlahla semagilebisi, futsi sakhipha emahlumela sakhokha nemagala.+
7 “‘“Kwaphindze kwefika lolunye lusweti lolukhulu+ lolunetimphiko netinsiba letinkhulu.+ Lesihlahla senabisela timphandze taso ngakulolusweti, tatikhweshisa lapho besihlanyelwe khona, sabhekisa emagala aso ngakulo kuze luwanisele.+
8 Besivele sihlanyelwe ensimini lenhle leseceleni kwemfula kuze sikhiphe emagala, sitsele titselo futsi sibe sihlahla lesikhulu lesihle.”’+
9 “Naku lokufanele ukusho: ‘INkhosi Lephakeme Jehova itsi: “Sitawuphumelela yini? Timphandze taso+ angeke yini tisishulwe ngulotsite, abangele kutsi titselo taso tibole nemahlumela aso abune?+ Sitawukoma kangangekutsi angeke kudzingeke sandla lesinemandla nobe bantfu labanyenti kuze sisishulwe timphandze.
10 Nanobe sihlanyelwe kulenye indzawo, sitawuphumelela yini? Angeke yini sibune nasishaywa ngumoya wasephumalanga? Sitawubuna kulensimi lesikhulela kuyo.”’”
11 Livi laJehova laphindze lefika kimi latsi:
12 “Ngicela utjele labantfu labavukelako utsi: ‘Aniboni yini kutsi letintfo tisho kutsini?’ Ubotsi: ‘Inkhosi yaseBhabhulona ifikile eJerusalema yatsatsa inkhosi yakhona kanye netindvuna takhona yaya nabo eBhabhulona.+
13 Ngetulu kwaloko, yatsatsa umntfwana*+ wasebukhosini yenta sivumelwane naye futsi yamfungisa.+ Yabese ihamba nemadvodza lahlonishwako akulendzawo,+
14 kuze umbuso utowehla ungaphindzi ube nemandla, futsi uphumelele nje kuphela ngekutsi ugcine sivumelwane losente nayo.+
15 Kodvwa ekugcineni inkhosi yakaJuda yavukela+ inkhosi yaseBhabhulona ngekutfumela titfunywa eGibhithe kuze titsatse emahhashi+ nelibutfo lelikhulu khona.+ Itawuphumelela yini? Lona lowenta loko utasibalekela yini sijeziso? Angasephula yini sivumelwane bese uyaphunyula?’+
16 “‘INkhosi Lephakeme Jehova itsi: “Ngitifunga mine, kutsi utawufela eBhabhulona, lakuhlala khona lenkhosi* leyambeka* kutsi abe yinkhosi, ngobe wedzelele sifungo lasenta nayo wephula nesivumelwane lasenta nayo.+
17 Libutfo lelikhulu laFaro nemasotja akhe lamanyenti angeke lisite ngalutfo emphini,+ nakwakhiwa lutsango lwekuvimbetela nelubondza lwekuvimbetela kute kubulawe bantfu* labanyenti.
18 Yena usedzelele sifungo, wephula nesivumelwane. Ngisho nobe ente setsembiso,* utentile tonkhe letintfo futsi angeke aphunyule.”’
19 “‘Ngako-ke naku lokushiwo yiNkhosi Lephakeme Jehova: “Ngitifunga mine, ngitsi imiphumela yekwedzelela sifungo sami+ neyekwephula sivumelwane sami, ngitayiletsa enhloko yakhe.
20 Ngitawujikijela linethi lami kuye, futsi utawubambeka enethini lami lekutsiya.+ Ngitamletsa eBhabhulona bese ngiyamehlulela lapho, ngenca yekutsi akaketsembeki kimi.+
21 Onkhe emasotja akhe labalekako atawubulawa ngenkemba, futsi labo labatawuphunyula batawuhlakatekela kuyo yonkhe indzawo.*+ Wena utawubese uyati-ke kutsi mine Jehova ngikhulumile.”’+
22 “‘Naku lokushiwo yiNkhosi Lephakeme Jehova: “Ngitawutsatsa ligala esicongweni semsedari lomkhulu+ ngilihlanyele, etulu emagaleni aso, ngitawugamula ligala lelitsambile,+ futsi mine matfupha ngitalihlanyela entsabeni lendze kakhulu.+
23 Ngitalihlanyela entsabeni lendze yaka-Israyeli; futsi emagala alo atawukhula bese liyatsela, libe ngumsedari lomuhle kakhulu. Tonkhe tinhlobo tetinyoni titawuhlala ngephansi kwawo nangephansi kwemtfunti wemacembe awo.
24 Tonkhe tihlahla talensimu tiyawukwati kutsi mine Jehova ngisilahle phansi lesihlahla lesidze, ngaphakamisa lesihlahla lesifishane;+ ngisente sabuna sihlahla lesiluhlata ngabangela kutsi sihlahla lesibunile sichakaze.+ Mine Jehova lucobo lwami ngikhulumile futsi ngikwentile loko.”’”
Imibhalo lengentansi
^ NgesiHebheru kutsi, “eveni laseKhenani.”
^ NgesiHebheru kutsi, “inhlanyelo.”
^ Lokusho, Nebukhadnezari.
^ Lokusho, Sedekiya.
^ Nobe “imiphefumulo.”
^ NgesiHebheru kutsi, “anikele ngesandla sakhe.”
^ NgesiHebheru kutsi, “kuwo wonkhe umoya.”
