Hezekeli 20:1-49
20 Ngemnyaka wesi-7, ngenyanga yesihlanu, ngelilanga lesi-10 laleyo nyanga, lamanye emadvodza lamadzala aka-Israyeli efika ahlala phansi embikwami kuze abute kuJehova.
2 Livi laJehova labese liyefika kimi latsi:
3 “Ndvodzana yemuntfu, khuluma nalamadvodza lamadzala aka-Israyeli utsi: ‘INkhosi Lephakeme Jehova itsi: “Nite kutobuta kimi yini? ‘Ngitifunga mine ngitsi angeke nginiphendvule,’+ kusho iNkhosi Lephakeme Jehova.”’
4 “Sewukulungele yini kubehlulela?* Sewukulungele yini kubehlulela ndvodzana yemuntfu? Batjele ngetintfo letenyanyekako letentiwa bokhokho babo.+
5 Batjele utsi: ‘INkhosi Lephakeme Jehova itsi: “Ngelilanga lengakhetsa ngalo Israyeli,+ ngafunga* entalelwaneni* yendlu yaJakobe, futsi ngatenta ngatiwa kubo nabaseGibhithe.+ Ngafunga kubo ngatsi: ‘NginguJehova Nkulunkulu wenu.’
6 Ngalelolanga ngafunga kutsi ngitabakhipha eveni laseGibhithe ngibayise eveni lengabafunela lona,* live leligeleta lubisi neluju.+ Belilihle* liwendlula onkhe lamanye emave.
7 Ngabese ngitsi kubo: ‘Ngamunye wenu kufanele alahle letintfo letenyanyekako lenitikhontako; ningatingcolisi ngetithico letenyanyekako* taseGibhithe.+ NginguJehova Nkulunkulu wenu.’+
8 “‘“Kodvwa bangivukela futsi bebangakatimiseli kungilalela. Abazange batilahle letintfo letenyanyekako lebebatikhonta, futsi abazange batishiye tithico letenyanyekako taseGibhithe.+ Ngako ngetsembisa kutsi ngitawutfululela lulaka lwami kubo, futsi ngibakhombise yonkhe intfukutselo yami eveni laseGibhithe.
9 Ngabese ngitsatsa sinyatselo ngenca yelibito lami kuze lingahlanjalatwa etiveni labebahlala nato.+ Ngobe ngatenta ngatiwa kubo* kuletive, ngalesikhatsi ngibakhipha* eveni laseGibhithe.+
10 Ngako ngabakhipha eveni laseGibhithe futsi ngabahola ngabayisa ehlane.+
11 “‘“Ngabese ngibanika timiso tami ngabatjela netehlulelo tami,+ kuze umuntfu lotilandzelako aphile ngenca yato.+
12 Ngaphindze ngabanika emasabatha ami+ kuze abe luphawu emkhatsini wami nabo,+ khona batewukwati kutsi mine, Jehova, ngimi lobangcwelisako.
13 “‘“Kodvwa bantfu baka-Israyeli bangivukela ehlane.+ Abazange bahambe ngetimiso tami, abazange batihloniphe netehlulelo tami, leto letenta umuntfu aphile nakatilandzela. Bawahlambalata kakhulu emasabatha ami, ngako ngetsembisa kutsi ngitawutfululela intfukutselo yami kubo ehlane kuze ngibacotfule.+
14 Ngatsatsa sinyatselo ngenca yelibito lami kuze tive letabona nangibakhulula* tingalihlambalati.+
15 Ngaphindze ngafunga kubo ehlane kutsi angeke ngibayise eveni lebengibanike lona,+ lokulive leligeleta lubisi neluju,+ live lelihle kakhulu* kunawo onkhe lamanye emave,
16 ngobe abazange batilandzele tehlulelo tami, abazange bahambe ngetimiso tami, bahlambalata nemasabatha ami ngobe tinhlitiyo tabo betilandzela tithico tabo letenyanyekako.+
17 “‘“Kodvwa ngabavela* buhlungu futsi angizange ngibabhubhise; angizange ngibacotfule ehlane.
18 Ngatjela emadvodzana abo ehlane+ ngatsi: ‘Ningahambi ngemitsetfo yabokhokho benu,+ ningatigcini tehlulelo tabo futsi ningatingcolisi ngetithico tabo letenyanyekako.
19 NginguJehova Nkulunkulu wenu. Kufanele nihambe ngetimiso tami, nigcine netehlulelo tami futsi nitilandzele.+
20 Wangcweliseni emasabatha ami,+ futsi atawuba luphawu emkhatsini wenu nami kuze nati kutsi mine nginguJehova Nkulunkulu wenu.’+
21 “‘“Kodvwa lamadvodzana acala kungivukela.+ Awazange ahambe ngetimiso tami futsi akatigcinanga tehlulelo tami nobe atilalele, leto letenta umuntfu aphile nakatilandzela. Ahlambalata emasabatha ami. Ngako ngetsembisa kutfululela intfukutselo yami kuwo nalo lonkhe lulaka lwami etikwawo ngesikhatsi asehlane.+
22 Kodvwa ngatibamba+ futsi ngatsatsa sinyatselo ngenca yelibito lami+ kuze lingahlanjalatwa nguletive, leto letabona nangibakhulula.*
23 Ngafunga kubo ehlane kutsi ngitabasakatela etiveni ngibahlakatele nasemaveni,+
24 ngenca yekutsi abatilandzelanga tehlulelo tami, abatilalelanga timiso tami,+ bahlambalata nemasabatha ami futsi balandzela* tithico letenyanyekako tabokhokho babo.+
25 Ngabavumela kutsi balandzele timiso lebetingakalungi netehlulelo lebetingeke tibente baphile.+
26 Ngabayekela bangcoliswa yimihlatjelo yabo ngesikhatsi banikela ngematibulo abo ngekuwashisa emlilweni,+ kuze ngibacotfule, khona batewukwati kutsi mine nginguJehova.”’
27 “Ngako wena ndvodzana yemuntfu khuluma nebantfu baka-Israyeli utsi kubo: ‘INkhosi Lephakeme Jehova itsi: “Nabokhokho benu bangihlambalata ngalendlela, ngekutsi bangetsembeki kimi.
28 Ngabayisa eveni lebengifunge kutsi ngitabanika lona.+ Batsi nababona onkhe emagcuma laphakeme netihlahla letinemacembe lamanyenti,+ bacala kwenta imihlatjelo neminikelo yabo leyangivisa buhlungu. Baletsa iminikelo lenuka kamnandzi,* futsi batfululela khona lapho neminikelo yabo yalokunatfwako.
29 Ngako ngababuta ngatsi: ‘Nisuke niyokwentani kulendzawo lephakeme? (Solo ibitwa ngekutsi yiNdzawo Lephakeme kuze kube ngulamuhla.)’”’+
30 “Tjela bantfu baka-Israyeli utsi: ‘INkhosi Lephakeme Jehova itsi: “Nani nitingcolisa ngendlela bokhokho benu labatingcolisa ngayo yini ngekutsi nikhonte tithico futsi ningetsembeki kimi?*+
31 Solo niyachubeka yini nekutingcolisa kuze kube ngulamuhla ngekwentela tonkhe tithico tenu letenyanyekako imihlatjelo, nangekunikela ngemadvodzana enu ngekuwashisa emlilweni?+ Awu nine bantfu baka-Israyeli, kufanele yini nginiphendvule nanibuta kimi?”’+
“INkhosi Lephakeme Jehova itsi: ‘Ngitifunga mine, ngitsi angeke nginiphendvule.+
32 Nine nitsi: “Asilingise letive, silingise imindeni yalamanye emave lakhonta* lugodvo nelitje,”+ kodvwa loko leninako engcondvweni angeke kwenteke.’”
33 “INkhosi Lephakeme Jehova itsi: ‘Ngitifunga mine, ngitsi ngitanibusa ngibe yinkhosi yenu ngesandla lesinemandla nangemkhono lowelulekile, nangentfukutselo lenkhulu.+
34 Ngitanikhipha kuletive, nginibutsise ndzawonye nginikhiphe emaveni lebenisakatelwe kuwo, ngisebentisa sandla lesinemandla nemkhono lowelulekile kanye nentfukutselo lenkhulu.+
35 Ngitaniyisa ehlane letive bese ngiyanehlulela, sibukene buso nebuso.+
36 “INkhosi Lephakeme Jehova itsi: ‘Njengobe ngehlulela bokhokho benu ehlane laseGibhithe, nani ngitawunehlulela.
37 Ngitawunenta kutsi nendlule ngephansi kwendvuku yemelusi+ futsi nginente nititfobe* esivumelwaneni.
38 Ngitawubese ngisusa bonkhe labangivukelako emkhatsini wenu, nalabo labonako kimi.+ Ngobe ngitabakhipha kulelive lelingasilo labo, kodvwa angeke bangene eveni laka-Israyeli;+ nitawukwati kutsi mine nginguJehova.’
39 “Awu nine bantfu baka-Israyeli, iNkhosi Lephakeme Jehova itsi kini: ‘Nguloyo naloyo akahambe ayokhonta tithico takhe letenyanyekako.+ Kodvwa yatini loku: Nangabe ningangilaleli, sikhatsi siyeta lapho ningeke nisalihlambalata libito lami lelingcwele ngemihlatjelo yenu nangetithico tenu letenyanyekako.’+
40 “INkhosi Lephakeme Jehova itsi: ‘Ngobe entsabeni yami lengcwele, lokuyintsaba lephakeme yaka-Israyeli,+ ngulapho bonkhe bantfu baka-Israyeli batangikhontela khona, bonkhe baphelele.+ Nitangijabulisa lapho futsi ngitawulindzela kutsi ningiletsele iminikelo kanye neminikelo yetitselo tekucala, lokungito tonkhe letintfo tenu letingcwele.+
41 Ngenca yeliphunga lelimnandzi,* ngitawujabula ngani nanginikhipha kuletive, nginihlanganisa ndzawonye nginikhipha kulamave benisakatelwe kuwo;+ ngitawungcweliswa emkhatsini wenu embikwaletive.’+
42 “‘Niyawukwati kutsi mine nginguJehova+ ngalesikhatsi nginiletsa eveni laka-Israyeli,+ eveni lengafunga kulinika bokhokho benu.
43 Nanilapho, niyawukhumbula kutiphatsa kwenu kanye nato tonkhe tento tenu lenatingcolisa ngato,+ futsi nitatenyanya* ngenca yato tonkhe tintfo letimbi lenatenta.+
44 Awu nine bantfu baka-Israyeli, niyawubese niyati kutsi mine nginguJehova nanginijezisa ngenca yelibito lami,+ hhayi ngenca yekutiphatsa kwenu lokubi nemikhuba yenu lemibi,’ kusho iNkhosi Lephakeme Jehova.”
45 Livi laJehova laphindze lefika kimi latsi:
46 “Ndvodzana yemuntfu, bhekisa buso bakho ngaseningizimu futsi umemetele eningizimu bese uyaphrofetha ehlatsini lesiganga leliseningizimu.
47 Tjela lihlatsi leliseningizimu utsi: ‘Lalela nali livi laJehova. INkhosi Lephakeme Jehova itsi: “Ngitawulumeka umlilo lotakushisa,+ futsi utawucotfula tonkhe tihlahla letiluhlata naletomile letikuwe. Lelilangabi lemlilo angeke licimeke+ futsi bonkhe buso butawushiswa ngiwo, kusukela eningizimu kuya enyakatfo.
48 Bonkhe bantfu batawukwati kutsi mine Jehova lucobo lwami ngililumeke ngemlilo, futsi angeke ucimeke.”’”+
49 Ngase ngitsi: “Awu Nkhosi Lephakeme Jehova! Bakhuluma ngami batsi: ‘Usho tiphicwaphicwano lona!’”*
Imibhalo lengentansi
^ Nobe “kumemetela sehlulelo kubo?”
^ NgesiHebheru kutsi, “ngaphakamisa sandla sami.”
^ NgesiHebheru kutsi, “enhlanyelweni.”
^ Nobe “lengabahlolela lona.”
^ Nobe “Belingumhlobiso.”
^ Leligama lesiHebheru kungenteka lihlobene neligama lelisho “bulongo” futsi lisetjentiswa nakukhulunywa ngendzelelo.
^ Lokusho, ema-Israyeli.
^ Lokusho, ema-Israyeli.
^ Lokusho, ema-Israyeli.
^ Nobe “lelingumhlobiso.”
^ NgesiHebheru kutsi, “liso lami.”
^ Lokusho, ema-Israyeli.
^ NgesiHebheru kutsi, “emehlo abo alandzela.”
^ Nobe “lelibohlisa intfukutselo.”
^ Nobe “ningigwadlele.”
^ Nobe “lasebentela.”
^ NgesiHebheru kutsi, “niboshelwe.”
^ Nobe “lelibohlisa intfukutselo.”
^ NgesiHebheru kutsi, “nitawenyanya buso benu.”
^ Nobe “saga.”
